୧୧ରୁ ଦୁଗ୍ଧ ଚାଷୀଙ୍କ ପାଖରୁ କ୍ଷୀର ଲିଟର ପିଛା ୨ ଟଙ୍କା ବର୍ଦ୍ଧିତ ଦରରେ କିଣିବ ଓମ୍ଫେଡ୍
ଭୁବନେଶ୍ବର : ସେପ୍ଟେମ୍ବର ୧୧ରୁ ଓମ୍ଫେଡ୍ ପ୍ରାଥମିକ ସମବାୟ ଦୁଗ୍ଧ ଚାଷୀଙ୍କ ପାଖରୁ କ୍ଷୀର ଲିଟର ପିଛା ୨ ଟଙ୍କା ବର୍ଦ୍ଧିତ ଦରରେ କିଣିବ ଓମ୍ଫେଡ୍। ବିଭିନ୍ନ ମାନର କ୍ଷୀର ଲିଟର ପିଛା ୩୪ରୁ ୩୮ ଟଙ୍କାରେ କିଣୁଥିବା ଓମ୍ଫେଡ୍ ଏବେ ଏହି ଦରଠାରୁ ୨ଟଙ୍କା ଅଧିକ ଦରରେ କିଣିବ ବୋଲି ମତ୍ସ୍ୟ ଓ ପ୍ରାଣୀ ସମ୍ପଦ ବିକାଶ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ କହିଛନ୍ତି।
ଓମ୍ଫେଡ୍ ପକ୍ଷରୁ ଆୟୋଜିତ ସାମ୍ବାଦିକ ସମ୍ମିଳନୀରେ ମନ୍ତ୍ରୀ ଶ୍ରୀ ମଲ୍ଲିକ କହିଛନ୍ତି, ବିଭିନ୍ନ ସମୟରେ ପ୍ରାଥମିକ ଦୁଗ୍ଧ ସମବାୟ ସମିତି ମାଧ୍ୟମରେ ଓମ୍ଫେଡ୍ ଦୁଗ୍ଧ ଚାଷୀଙ୍କ ପାଖରୁ କ୍ଷୀର କିଣୁଛି। କ୍ଷୀର ଦର ବୃଦ୍ଧି କରିବାକୁ ପ୍ରାଥମିକ ସମବାୟ ସମିତି ସଙ୍ଗଠନଗୁଡ଼ିକ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ସାକ୍ଷାତ କରି ଦାବି କରି ଆସୁଥିଲେ। ମୁଖ୍ୟମନ୍ତ୍ରୀ ସେମାନଙ୍କ ଦାବିକୁ ଗୁୁରୁତର ସହ ବିଚାର କରି କ୍ଷୀର ଲିଟର ପିଛା ଆଉ ଦୁଇ ଟଙ୍କା ଅଧିକ ଦେବାକୁ ନିଷ୍ପତ୍ତି ନେଇଛନ୍ତି। ସେପ୍ଟେମ୍ବର ୧୧ରୁ କ୍ଷୀର ଲିଟର ପିଛା ୨ଟଙ୍କା ଅଧିକ ଦେବ ଓମ୍ଫେଡ୍। ଏହି ନିଷ୍ପତ୍ତି ଦ୍ୱାରା ରାଜ୍ୟର ପ୍ରାୟ ୩ ଲକ୍ଷରୁ ଊର୍ଦ୍ଧ୍ୱ ଦୁଗ୍ଧ ଚାଷୀ ଉପକୃତ ହେବେ।
ଅନ୍ୟପଟେ କ୍ଷୀର ଲିଟର ପିଛା ୨ଟଙ୍କା ବୃଦ୍ଧି ସ୍ୱାଗତ ଯୋଗ୍ୟ। କିନ୍ତୁ ଯଥେଷ୍ଟ ନୁହେଁ ବୋଲି ଓଡିଶା ଦୁଗ୍ଧ ଚାଷୀ ମହାସଂଘ ଅଧ୍ୟକ୍ଷ ରବି ବେହେରା କହିଛନ୍ତି। ନିକଟରେ ମୁମ୍ବଇରେ କ୍ଷୀର ଲିଟର ପିଛା ୯ଟଙ୍କା ଓ ତାମିଲନାଡୁରେ ଲିଟର ପିଛା ୪ଟଙ୍କା ବୃଦ୍ଧି କରାଯାଇଛି। ଫଳରେ ଚାଷୀମାନେ ମୁମ୍ବଇରେ ଲିଟର ପିଛା ୧୦୧ ଟଙ୍କା ଓ ତାମିଲନାଡୁରେ ୪୪ଟଙ୍କା ପାଉଛନ୍ତି। ସେହି ତୁଳନାରେ ଓଡ଼ିଶାରେ ୪୦ ଟଙ୍କାରେ ଓମ୍ଫେଡ୍ କ୍ଷୀର କିଣିବ, ଏହା ବହୁତ କମ।
Powered by Froala Editor
