ନେପାଳରେ ଆସିଥିବା ଆକସ୍ମିକ ବନ୍ୟା ଛାରଖାର କରି ଦେଇଥିବା ବେଳେ ଏହାଠାରୁ  ବି ଆହୁରି ଭୟଙ୍କର ବିପର୍ଯ୍ୟୟର ଆଶଙ୍କା ବିଶେଷଜ୍ଞମାନେ ସତର୍କ  କରାଇ ଦେଇଛନ୍ତି । ହିମବାହ ସମ୍ବନ୍ଧିତ ବୈଜ୍ଞାନିକ  ଦୀପେଶ ଚାପାଗେନ୍‌ଙ୍କ ନେତୃତ୍ୱରେ  ହୋଇଥିବା ଏହି ଗବେଷଣାରେ  ବିଗତ ଦଶନ୍ଧିଗୁଡ଼ିକ ମଧ୍ୟରେ ହିନ୍ଦୁକୁଶ  ହିମାଳୟରେ ବିପଦ କିଭଳି ବୃଦ୍ଧି ପାଇଛି ତାହା ଅନୁଧ୍ୟାନ କରାଯାଇଥିଲା । ଅଧ୍ୟୟନ ଅନୁସାରେ ହିନ୍ଦୁକୁଶ  ହିମାଳୟ (ଏଚ୍‌କେଏଚ୍‌) କ୍ଷେତ୍ରରେ  ଥିବା ୪୦୭ ହିମବାହ ହ୍ରଦ ଫାଟିବାର ବିପଦ ରହିଛି । ବହୁ ପୁରୁଣା  ରେକର୍ଡଠାରୁ ଆରମ୍ଭ କରି ୨୦୨୪  ପର୍ଯ୍ୟନ୍ତ ଘଟିଥିବା ୪୯୩ଟି ଜିଏଲ୍‌ଓଏଫ୍‌  ଘଟଣାର ସମୀକ୍ଷା କରାଯାଇଥିଲା ।  

ରିପୋର୍ଟରୁ ଜଣାପଡ଼ିଛି, ୧୯୫୦ ମସିହା  ପରଠାରୁ ହିମବାହ ହ୍ରଦ ବିସ୍ଫୋରଣ  ଜନିତ ବନ୍ୟା ବା ଜିଏଲ୍‌ଓଏଫ୍‌ ଘଟଣା  ବୃଦ୍ଧି ପାଇଛି । ଏଭଳି ବିପର୍ଯ୍ୟୟର ହାରାହାରି ସଂଖ୍ୟା ପ୍ରତି ଦଶନ୍ଧିରେ ୭ରୁ  ବୃଦ୍ଧି ପାଇ ୩୮ରେ ପହଞ୍ଚିଛି, ଯାହା କି  ପ୍ରାୟ ୫ ଗୁଣା ଅଧିକ । 

"ଗ୍ଲେସିଆଲ୍‌ ଲେକ୍‌ ଆଉଟବର୍ଷ୍ଟ ଫ୍ଲଡ୍‌ ରିସ୍କ୍‌, ରେସପନ୍ସ ଷ୍ଟ୍ରାଟେଜିଜ୍‌ ଆଣ୍ଡ ଆଡାପ୍ଟେସନ୍‌ ଗ୍ୟାପ୍ସ  ଇନ୍‌ ଦ ହିନ୍ଦୁକୁଶ ହିମାଳୟ ରିଜିଅନ୍‌' ଶୀର୍ଷକ  ଅଧ୍ୟୟନରେ ହିମବାହ ହ୍ରଦ ବିସ୍ଫୋରଣ ଜନିତ ବନ୍ୟାକୁ ହିନ୍ଦୁକୁଶ ହିମାଳୟ ଅଞ୍ଚଳ ପାଇଁ ଏକ ପ୍ରମୁଖ ତଥା ବଢ଼ିଚାଲିଥିବା ବିପଦ ବୋଲି  ବର୍ଣ୍ଣନା କରାଯାଇଛି । ବିଶ୍ୱତାପନ ବୃଦ୍ଧି ଯୋଗୁ  ହିନ୍ଦୁକୁଶ ହିମାଳୟର ହିମବାହଗୁଡ଼ିକ ଦ୍ରୁତ  ଗତିରେ ତରଳୁଛି । ଫଳରେ ବରଫ, ପଥର  କିମ୍ୱା ପଟୁମାଟିର ପ୍ରାକୃତିକ ଅବରୋଧ ପଛରେ ପାଣି ଜମା ହୋଇ ହିମବାହ ହ୍ରଦ ସୃଷ୍ଟି ହେଉଛି । ଆଖପାଖର ହିମବାହରୁ ବରଫ ତରଳିବା କାରଣରୁ  ଏହି ହ୍ରଦଗୁଡ଼ିକ ମଧ୍ୟରୁ କେତେକର ଆକାର ଆଶାତୀତ ଭାବେ ବଢ଼ିଯାଇଥାଏ । ଭୂମିକମ୍ପ,  ଭୂସ୍ଖଳନ କିମ୍ୱା ବାଦଲଫଟା ବର୍ଷା ଏହି ପ୍ରାକୃତିକ ଅବରୋଧକୁ  ଦୁର୍ବଳ କରିବାର ସମ୍ଭାବନା ରହିଥାଏ । ଏହା ଫଳରେ ବିପୁଳ ପରିମାଣର ପାଣି ତଳିଆ ଅଞ୍ଚଳକୁ  ମାଡ଼ି ଆସି  ବନ୍ୟାର ରୂପ ନେଇଥାଏ ।

ସେପଟେ ତିବ୍ଦତ-ନେପାଳରେ  ଆସିଥିବା ଭୀଷଣ ବନ୍ୟାରେ ମୃତ୍ୟୁ  ଓ ନିଖୋଜଙ୍କ ସଂଖ୍ୟା କ୍ରମାଗତ ଭାବେ  ବଢ଼ିଚାଲିଛି । ମୃତ୍ୟୁସଂଖ୍ୟା  ୮୦୪କୁ ବୃଦ୍ଧି ପାଇଥିଲା ବେଳେ  ୩ ହଜାରରୁ ଅଧିକ ନିଖୋଜ  ଥିବା ସୂଚନା ମିଳିଛି ।

Powered by Froala Editor