ବାଣପୁର : ବାଣପୁର ବାଲୁଗାଁ ବନ୍ୟପ୍ରାଣୀ ରେଞ୍ଜ ଅଧୀନରେ ପାରିକୁଦ ବନ୍ୟ ପ୍ରାଣୀ ସେକ୍ସନର କର୍ମଚାରୀମାନେ ରେଞ୍ଜ ଅଧିକାରୀ ରଶ୍ମିତା ଜେନା ଏବଂ ଫରେଷ୍ଟର ଶ୍ରୀ ଜିତେନ୍ଦ୍ରିୟ ଜେନାଙ୍କ ନେତୃତ୍ୱରେ ଚିଲିକା ବନ୍ୟପ୍ରାଣୀ ଅଭୟାରଣ୍ୟ ଭିତରେ ପାଟ୍ରୋଲିଂ ବେଳେ ବଡ ସଫଳତା ମିଳିଛି। ନଳବଣ ନିକଟରେ ୨୪ ଜଣ ବ୍ୟକ୍ତି (ଚନ୍ଦ୍ରପୁଟ ଗ୍ରାମର ୧୧ ଜଣ, ପୋ-ବଡକୂଳ, ପି.ଏସ୍-ବାଲୁଗାଁ, ଜିଲ୍ଲା-ଖୋର୍ଦ୍ଧା ଏବଂ ବାଲିପାଟପୁର ଗ୍ରାମର ୧୩ ଜଣ, ପୋ-ଭୁଷଣ୍ଡପୁର, ପି.ଏସ୍-ଟାଙ୍ଗୀ, ଜିଲ୍ଲା-ଖୋର୍ଦ୍ଧା) ୦୩ ଗୋଟି ଯାନ୍ତ୍ରିକ ଡଙ୍ଗାରେ ଚିଲିକା ବନ୍ୟପ୍ରାଣୀ ଅଭୟାରଣ୍ୟ, ନଳବଣ ଭିତରେ ସୁପର ଡୁବିନେଟ୍ ଏବଂ ଗଣିଆ ଜାଲ ବିଛାଇ ବେଆଇନ ମାଛ ଧରିବାରେ ଲିପ୍ତ ଥିଲେ। ସେମାନେ ଅଭୟାରଣ୍ୟ ସୀମାରେ ପ୍ରବେଶ କରିବା ପାଇଁ କୌଣସି ଅନୁମତିପତ୍ର/ଡକ୍ୟୁମେଣ୍ଟ୍ ଦେଖାଇ ପାରିଲେ ନାହିଁ ଏବଂ ଏହା ସ୍ପଷ୍ଟ ହୋଇଥିଲା ଯେ ସେମାନେ ଧାରା – ୨୭, ୨୯ ଏବଂ ୩୯ ସହିତ ଧାରା – ୨ (୧୬) (ବ) ବନ୍ୟପ୍ରାଣୀ (ସୁରକ୍ଷା) ଆଇନ ୧୯୭୨ ଉଲ୍ଲଂଘନ କରିଛନ୍ତି, ଉକ୍ତ ଆଇନର ଧାରା – ୫୧ ଅନୁଯାୟୀ ଦଣ୍ଡନୀୟ ଅଟେ। ତା’ପରେ ପାଟ୍ରୋଲିଂ ଦଳ ୦୩ଟି ଯାନ୍ତ୍ରିକ ଡଙ୍ଗା ଜବତ କରିଥିଲେ, ଯେଉଁଥିରେ ଲମ୍ବାର୍ଡାଇନ୍ ଇଞ୍ଜିନ୍, ସୁପର ଡୁବି ଜାଲ, ଗଣିଆ ଜାଲ, ବାଉଁଶ ଓଆର୍, ଥର୍ମୋକଲ୍ ବାକ୍ସ ଏବଂ ମାଛ ଅନ୍ତର୍ଭୁକ୍ତ ଥିଲା। ତେଣୁ ଅଭିଯୁକ୍ତମାନଙ୍କ ବିରୁଦ୍ଧରେ OR କେସ୍ ନଂ-୧୫B, ୧୬B ଏବଂ ୧୭Bର ୨୦୨୬-୨୭ ଅନୁଯାୟୀ ୦୩ଟି ବନ୍ୟପ୍ରାଣୀ ଅପରାଧ ମାମଲା ରୁଜୁ କରାଯାଇଛି ଏବଂ ଅଭିଯୁକ୍ତମାନଙ୍କୁ ଗିରଫ କରାଯାଇ କୋର୍ଟକୁ ପଠାଯାଇଛି।

Powered by Froala Editor