ଭୁବନେଶ୍ୱର: ସାର ନେବାକୁ ଚାହୁଁଛନ୍ତି ତ ମୋବାଇଲ୍ ନେଇ ଆସନ୍ତୁ । ପ୍ରାଥମିକ କୃଷି ସମବାୟ ସମିତି(ପାକ୍ସ)ରେ ଥିବା ୟୁପିଆଇ୍ କ୍ୟୁଆର୍ କୋଡ୍‌ରେ ସ୍କାନ୍ କରି ଟଙ୍କା ଜମା କଲେ ଯାଇ ଚାଷୀଙ୍କୁ ମିଳିବସାର । ନଗଦ ଟଙ୍କା ଦେଇ ନେଇପାରିବେନି ସାର । ଏଭଳି କଟକଣା ପରେ ମୋବାଇଲ୍ ନଥିବା ଚାଷୀମାନେ ମୁଣ୍ଡରେ ହାତ ଦେଇ ବସିଲେଣି । କେମିତି କିଣିବେ ସାର, ସେ ନେଇ ଚିନ୍ତାରେ ପଡ଼ିଲେଣି ।ତେବେ ମିଳିଥିବା ସୂଚନା ମୁତାବକ ନବରଙ୍ଗପୁର ଜିଲ୍ଲାଗୁଡ଼ିକର ଲ୍ୟାମ୍ପ୍‌ସ ଗୁଡିକରେ କ୍ୟୁଆର୍ କୋଡ୍‌ରେ ଚାଷୀ ଟଙ୍କା ଜମା କଲେ ସାର ମିଳିବ କହି ଚାଷୀଙ୍କୁ ଫେରାଇ ଦିଆଯାଉଛି । ଜିଲ୍ଲାରେ ଅଧିକାଂଶ ଲ୍ୟାମ୍ପ୍‌ସ ରେ ଚାଷୀଙ୍କୁ ସାର୍ ମିଳିପାରୁନି । ଗତ ଦିଶା ବୈଠକରେ ସାଂସଦ ବଳଭଦ୍ର ମାଝୀ ଏଣ୍ଡ୍ରୋଏଡ୍ ମୋବାଇଲ୍ ଫୋନ୍ ନ ଥିବା ଚାଷୀ କେମିତି କ୍ୟୁଆର୍ କୋଡ୍‌ରେ ଟଙ୍କା ଜମା କରିବେ ବୋଲି ପ୍ରଶ୍ନ କରିଥିଲେ । ତେବେ ଏଭଳି ଅବସ୍ଥା କେବଳ ନବରଙ୍ଗପୁର ଜିଲ୍ଲାରେ ନୁହଁ, ରାଜ୍ୟର ବିଭିନ୍ନ ସ୍ଥାନରେ ଦେଖିବାକୁ ମିଳୁଛି । ଯାହାକୁ ନେଇ ଚାଷୀମାନେ ସାର ପାଇବା ପାଇଁ ଚିନ୍ତାରେ ପଡ଼ିଲେଣି । ଏଭଳି ଅବସ୍ଥା ସାରା ରାଜ୍ୟରେ ଦେଖିବାକୁ ମିଳିଥିବା ବେଳେ ଝାରସୁଗୁଡ଼ା ଓ କନ୍ଧମାଳ ଜିଲ୍ଲାରେ ଏଗ୍ରିଷ୍ଟାକ୍ ଆଧାରିତ ସାର ବିତରଣ କରାଯାଉଛି । ଏହି ଦୁଇ ଜିଲ୍ଲାରେ ସାର କିଣିବା ପୂର୍ବରୁ ଚାଷୀଙ୍କୁ ମୋବାଇଲ୍‌ର ଗୁଗୁଲ୍ ପ୍ଲେ ଷ୍ଟୋରରୁ ଫ୍ରେମୱାର୍କ ଫର ଫର୍ଟିଲାଇଜର୍ ସେଲ୍ ଆପ୍ ଡାଉନଲୋଡ୍ କରିବାକୁ ପଡ଼ିବ । ପରେ ସାର ଦୋକାନ ଓ କେଉଁ ସାର କିଣିବେ ତାହା ଚୟନ କରିବାକୁ ହେବ । ଆବେଦନ ପରେ ଏକ କ୍ୟୁଆର୍ କୋଡ୍ କିମ୍ବା ଟୋକନ୍ ପାଇବେ । ଯାହା ମାତ୍ର ଦୁଇ ଦିନ ପାଇଁ ବୈଧ ରହିବ । ତେବେ ଏହି ଦୁଇ ଜିଲ୍ଲାରେ ଯେଉଁ ଚାଷୀଙ୍କର ମୋବାଇଲ୍ ନଥିବ, ସେମାନେ କିଭଳି ସାର ପାଇବେ ତାହା ସ୍ପଷ୍ଟ କରାଯାଇନି । ନବରଙ୍ଗପୁର ଜିଲ୍ଲାର ଲ୍ୟାମ୍ପ୍ସରେ କ୍ୟାସ୍ ସେଲ୍ ମଧ୍ୟ କ୍ୟୁଆର୍ କୋଡ୍‌ରେ ହିଁ ଟଙ୍କା ଜମା କଲେ ଯାଇ ଚାଷୀଙ୍କୁ ସାର୍ ମିଳୁଛି । ତେଣୁ ଶୁକ୍ରବାର ନବରଙ୍ଗପୁର ବିଧାୟକ ଗୌରୀଶଙ୍କର ମାଝୀ କୋଷାଗୁମୁଡ଼ାର ଲ୍ୟାମ୍ପ୍ସ ଗସ୍ତ କରି ଚାଷୀଙ୍କ ସମସ୍ୟା ବୁଝିଥିଲେ । ଚାଷୀଙ୍କୁ ନଗଦରେ ସାର୍ ବିକ୍ରି ଲାଗି ଲ୍ୟାମ୍ପ୍‌ସ ଗୁଡ଼ିକୁ ଚିଠି କରିବାକୁ ନବରଙ୍ଗପୁର ଡିଆର୍‌ସିଏସ୍ ଶରତ ଚନ୍ଦ୍ର ପାଣିଗ୍ରାହୀଙ୍କୁ ନିର୍ଦ୍ଦେଶ ଦେଇଥିଲେ । କିନ୍ତୁ ଡିଆର୍‌ସିଏସ୍ ଚିଠି କରାଯିବ କହି ଶନିବାର ଛୁଟିରେ ଗାଁକୁ ଯାଇଛନ୍ତି । ଫଳରେ ମୋବାଇଲ ଫୋନ୍ ନ ଥିବା ଛୋଟ ଓ ମଧ୍ୟମ ଚାଷୀ ସାର୍ ପାଇଁ ଲ୍ୟାମ୍ପସକୁ ଧାଇଁ ନୟାନ୍ତ ହେଉଛନ୍ତି । ବିଶେଷ କରି ଜୁଲାଇ ମାସ ଚାଷୀଙ୍କ ପାଇଁ ଗୁରୁତ୍ୱ ପୂର୍ଣ୍ଣ ମାସ । ସାର୍ ନ ପାଇଲେ ଫସଲ ଅମଳ ବାଧାପ୍ରାପ୍ତ ହେବ । ଗୋଟିଏ ପଟେ ଲ୍ୟାମ୍ପ୍ସରେ ଦୁର୍ନୀତି ରୋକିବା ସହ ସାର୍ ବିକ୍ରି ରେ ସ୍ୱଚ୍ଛତା ଆଣିବାକୁ ବିଭାଗ ପକ୍ଷରୁ ଚାଷୀଙ୍କଠାରୁ ୟୁପିଆଇ କ୍ୟୁଆର୍ କୋଡ଼ରେ ଟଙ୍କା ନେଇ ସାର୍ ଦେବାକୁ ଲ୍ୟାମ୍ପ୍ସକୁ ନିର୍ଦ୍ଦେଶ ଜାରି କରାଯାଇଛି।
ଏଣୁ ଲ୍ୟାମ୍ପ୍‌ସ ଗୁଡ଼ିକ ବିନା କ୍ୟୁଆର୍ କୋଡରେ କୌଣସି ଚାଷୀଙ୍କୁ ସାର୍ ଦେବାକୁ ସାହସ କରୁନାହାନ୍ତି । ଫଳରେ ଏବେ ଲ୍ୟାମ୍ପ୍‌ସରୁ ସାର୍ ପାଇବା ଚାଷୀଙ୍କ ପାଇଁ କ୍ୟୁଆର୍ କୋଡ୍ ପ୍ରତିବନ୍ଧକ ସାଜିଛି । କାରଣ ସବୁ ଚାଷୀଙ୍କ ପାଖରେ ସ୍ମାର୍ଟ ଫୋନ୍ ନ ଥିବାରୁ ଏଭଳି ସମସ୍ୟା ସୃଷ୍ଟି ହୋଇଛି । ଏହି ଜିଲ୍ଲାରେ ଖରିଫ୍ ଋତୁ ପାଇଁ ୫୩ ହଜାର ୮୦୦ ମେଟ୍ରିକ୍ ଟନ୍ ୟୁରିଆ ଆବଶ୍ୟକ । ହେଲେ ବର୍ତ୍ତମାନ ସୁଦ୍ଧା ୩୧ ହଜାର ମେଟ୍ରିକ୍ ଟନ୍ ସାର ଜିଲ୍ଲାକୁ ଆସିଛି । ଏବେ ସୁଦ୍ଧା ୧୫ ହଜାର ୧୦୦ ମେଟ୍ରିକ୍ ଟନ୍ ୟୁରିଆ ଚାଷୀଙ୍କୁ ବିକ୍ରି ହୋଇଥିବା ଜିଲ୍ଲା କୃଷି ବିଭାଗ ପକ୍ଷରୁ କୁହାଯାଇଛି । ଜିଲ୍ଲାର ସିଂହଭାଗ ଚାଷୀଙ୍କୁ ଆବଶ୍ୟକ ୟୁରିଆ ମିଳିନି। ଏଣୁ ଚାଷୀମାନେ ଅସନ୍ତୋଷ ପ୍ରକାଶ କରିଛନ୍ତି ।

Powered by Froala Editor