ଜୁଲାଇ ୧୫ସୁଦ୍ଧା ପ୍ରକାଶ ପାଇପାରେ ନିଟ୍-ୟୁଜି ପୁନଃପରୀକ୍ଷା ଫଳ
ଭୁବନେଶ୍ବର : ଡାକ୍ତରୀ ପାଠ୍ୟକ୍ରମରେ ନାମଲେଖା ନିମନ୍ତେ ନ୍ୟାସନାଲ ଟେଷ୍ଟିଂ ଏଜେନ୍ସି (ଏନ୍ଟିଏ) ଦ୍ବାରା ପରିଚାଳିତ ଜୁନ୍ ୨୧ରେ ଅନୁଷ୍ଠିତ ନିଟ୍-ୟୁଜି ପୁନଃପରୀକ୍ଷା ଫଳ ଜୁଲାଇ ୧୫ସୁଦ୍ଧା ପ୍ରକାଶ ପାଇବାର ସମ୍ଭାବନା ରହିଛି। ପରୀକ୍ଷାର୍ଥୀ ୱେବସାଇଟ୍ (www.nee.nta.nic.in)କୁ ଲଗଇନ କରି ପରୀକ୍ଷା ଫଳ ଦେଖିପାରିବେ।
ଚଳିତ ବର୍ଷ ନିଟ୍-ୟୁଜି ପରୀକ୍ଷା ଦେବା ନିମନ୍ତେ ମୋଟ ୨୨.୭୯ଲକ୍ଷ ବିଦ୍ୟାର୍ଥୀ ନାମ ପଞ୍ଜୀକରଣ କରିଥିଲେ। ସେମାନଙ୍କ ମଧ୍ୟରୁ ମେ ୩ରେ ଅନୁଷ୍ଠିତ ପରୀକ୍ଷାରେ ୨୨.୦୫ଲକ୍ଷ ଛାତ୍ରଛାତ୍ରୀ ପରୀକ୍ଷା ଦେଇଥିଲେ, ଯାହାକି ୯୬.୭୨% ଛାତ୍ରଛାତ୍ରୀ ପରୀକ୍ଷା ଦେଇଥିଲେ। କିନ୍ତୁ ନିଟ୍-ୟୁଜି ପ୍ରଶ୍ନପତ୍ର ପ୍ରଘଟ ହେବା ଦ୍ବାରା ଏନଟିଏ ପରୀକ୍ଷାକୁ ରଦ୍ଦ କରି ଜୁନ ୨୧ରେ ନିଟ୍-ୟୁଜି ପୁନଃପରୀକ୍ଷା କରିବାକୁ ଘୋଷଣା କରାଯାଇଥିଲା। କିନ୍ତୁ ମେ ୩ ନିଟ୍-ୟୁଜି ପରୀକ୍ଷା ଅପେକ୍ଷା ଜୁନ୍ ୨୧ରେ ଅନୁଷ୍ଠିତ ପୁନଃପରୀକ୍ଷାରେ ପରୀକ୍ଷାର୍ଥୀଙ୍କ ସଂଖ୍ୟା କମି ଯାଇଥିଲା। ପଞ୍ଜିକୃତ ୨୨.୭୯ଲକ୍ଷ ଛାତ୍ରଛାତ୍ରୀଙ୍କ ମଧ୍ୟରୁ ପ୍ରାୟ ୨୦ଲକ୍ଷ ପରୀକ୍ଷାର୍ଥୀ ନିଟ୍-ୟୁଜି ପୁନଃପରୀକ୍ଷା ଦେଇଥିଲେ, ଯାହାକି ୮୭.୭୫%ଥିଲା। ଅର୍ଥାତ ୨.୭୯ଲକ୍ଷ ଛାତ୍ରଛାତ୍ରୀ, ଯାହାକି ୧୨.୨୫% ଛାତ୍ରଛାତ୍ରୀ ପରୀକ୍ଷା ଦେଲେନାହିଁ ବୋଲି ଜଣାପଡ଼ିଛି।
ଜୁନ୍ ୨୧ରେ ନିଟ୍-ୟୁଜି ପୁନଃପରୀକ୍ଷା ଦେଶର ୫୫୧ଟି ସହରରେ ୫,୪୪୦ କେନ୍ଦ୍ରରେ ପରୀକ୍ଷା ହୋଇଥିବା ବେଳେ ବିଦେଶରେ ୧୪ଟି ସହରରେ ପୁନଃପରୀକ୍ଷା ହୋଇଥିଲା। ଓଡ଼ିଶାରେ ୨୭ଟି ସହରରେ ୧୩୨ଟି କେନ୍ଦ୍ରରେ ୫୬ହଜାର ୯୮୩ ଛାତ୍ରଛାତ୍ରୀ ପରୀକ୍ଷା ଦେବାକୁ ଥିବାବେଳେ କେବଳ ଭୁବନେଶ୍ୱରରେ ୧୦ ହଜାରରୁ ଅଧିକ ପରୀକ୍ଷାର୍ଥୀ ଥିଲେ।
Powered by Froala Editor
