ଆରମ୍ଭ ହୋଇଯାଇଛି ଶ୍ରାବଣ ମାସ । ମହାଦେବଙ୍କ ଖୁବ୍ ପ୍ରିୟ ଏହି ମାସଟିର ଅନେକ ମହତ୍ୱ ରହିଛି । ଏହି ମାସରେ ସମସ୍ତ ବିଧିବିଧାନ ଅନୁସାରେ କାମ କଲେ ମହାଦେବଙ୍କ କୃପା ମିଳିଥାଏ । ଏହି ମାସରେ ମହାଦେବଙ୍କୁ ଗଙ୍ଗା ଜଳରେ ଅଭିଷେକ କରିବା ଦ୍ୱାରା ସମସ୍ତ ମନସ୍କାମନା ପୂର୍ଣ୍ଣ ହୋଇଥାଏ ବୋଲି କୁହାଯାଏ । ଅନ୍ୟପକ୍ଷରେ ଏହି ମାସର ପ୍ରକୃତି ସହିତ ଅନେକ ସମ୍ବନ୍ଧ ରହିଛି । ଏହି ମାସରେ ପ୍ରବଳ ବର୍ଷା ହେଉଥିବାରୁ ଧରାପୃଷ୍ଠ ସବୁଜ ରଙ୍ଗର ଶାଢୀ ପିନ୍ଧିଲା ପରି ଲାଗେ । ତେଣୁ ଏହି ମାସରେ ସବୁଜ ରଙ୍ଗର ଏକ ବିଶେଷ ମହତ୍ୱ ରହିଛି । ତେଣୁ ବିଶ୍ୱାସ ରହିଛି ଯେ ଏହି ମାସରେ ଯେତେଦୂର ସମ୍ଭବ ସବୁଜ ରଙ୍ଗର ବସ୍ତ୍ର ପିନ୍ଧିବା ଉଚିତ୍ । ମହିଳାମାନେ ମଧ୍ୟ ହାତରେ ସବୁଜ ରଙ୍ଗର ଚୁଡି ପିନ୍ଧିବା ଉଚିତ୍ । ଶ୍ରାବଣରେ ସବୁଜ ରଙ୍ଗକୁ ସୌନ୍ଦର୍ଯ୍ୟ ଓ ସଧବାର ପ୍ରତୀକ ଭାବେ ବିବେଚନା କରାଯାଏ । ଧାର୍ମିକ ଦୃଷ୍ଟିରୁ ଏହି ମାସରେ ସବୁଜ ରଙ୍ଗ ପରିଧାନ କରିବା ଦ୍ୱାରା ଭଗବାନ ଶିବ ଓ ମାତା ପାର୍ବତୀ ପ୍ରସନ୍ନ ହୋଇଥାନ୍ତି । ଏହା ସହିତ ଏହି ମାସରେ ପଡୁଥିବା ପର୍ବପର୍ବାଣୀରେ ମାତା ପାର୍ବତୀଙ୍କୁ ସଧବା ଜିନିଷ ଚଢାନ୍ତୁ ଓ ସବୁଜ ବସ୍ତ୍ର ପରିଧାନ କରନ୍ତୁ । ଏହାଦ୍ୱାରା ଦାମ୍ପତ୍ୟ ଜୀବନରେ ସୁଖ ବଢିଥାଏ । ଜ୍ୟୋତିଷ ଶାସ୍ତ୍ରରେ ବୁଧ ଗ୍ରହକୁ ସବୁଜ ରଙ୍ଗର ପ୍ରତିନିଧି ଭାବରେ ଧରାଯାଏ । ତେଣୁ ଏହା ଦ୍ୱାରା ବୁଧଙ୍କ କୃପା ମଧ୍ୟ ଲାଭ ହୋଇଥାଏ ।    

Powered by Froala Editor