ଛଟ୍ ପର୍ବ ସମୟରେ ମନ୍ତ୍ରୀଙ୍କ ଘରୁ ସୁନା ସହ ୭ ଲକ୍ଷ ଲୁଟ୍
ବିହାରର ରାଜଧାନୀ ପାଟନାର ଏଜି କଲୋନୀରେ ରହିଛି ବିହାର ମନ୍ତ୍ରୀ ସଞ୍ଜୟ ଟାଇଗରଙ୍କ ବହୁତଳ ବିଶିଷ୍ଟ ଘର। ଛଟ୍ ପର୍ବ ସମୟରେ ଏହି ଘରେ ଚୋରି ହୋଇଛି। ଘରେ କେହି ନଥିବାର ସୁଯୋଗ ନେଇ ଲୁଟିନେଲେ ଲକ୍ଷ ଲକ୍ଷ ଟଙ୍କାର ସୁନା, ରୁପା ଓ ନଗଦ ଟଙ୍କା। ଆଲମାରି ଭାଙ୍ଗି ଘରର ସବୁ ଜିନିଷ ଖେଳାଇଦେଲେ ଦୁର୍ବୃତ୍ତ। ନଭେମ୍ବର ୧୪ ତାରିଖ ରାତିରୁ ୧୫ ତାରିଖ ମଧ୍ୟରେ ଏହି ଲୁଟ୍ ହୋଇଥିବା ପୋଲିସ କହିଛି। ଏବେ ସିସିଟିଭି ଫୁଟେଜ୍ରେ କଏଦ ହୋଇଛି ଚୋରଙ୍କ କାରନାମା।
ଚୋରମାନେ ଘରେ ପଶିବା ପରେ ଗୋଟିଏ ପରେ ଗୋଟିଏ ରୁମ୍ରେ ଖୋଜାଖୋଜି କରିଥିଲେ। ଏପରିକି ପ୍ରାୟ ୭ରୁ ୮ଟି ଆଲମାରି ଭାଙ୍ଗି ଭିତରେ ଥିବା ମୂଲ୍ୟବାନ ସାମଗ୍ରୀ ଲୁଟି ନେଇଥିଲେ। ଲୁଟ୍ ସାମଗ୍ରୀ ମଧ୍ୟରେ ରହିଛି ପ୍ରାୟ ୬୦୦ ଗ୍ରାମ ସୁନା, ୨ କିଲୋଗ୍ରାମ ରୁପା ଏବଂ ୭ ଲକ୍ଷ ଟଙ୍କା ନଗଦ।
ଛଟ୍ ପର୍ବ ସମୟରେ ଅନେକ ଲୋକ ନିଜ ଘର ଛାଡ଼ି ଗାଁକୁ ଯାଉଥିବାରୁ ଅଞ୍ଚଳରେ ଲୋକଙ୍କ ଯାତାୟତ କମ୍ ରହିଥାଏ। ଏହି ସମୟରେ ଚୋରମାନେ ଖାଲି ଘରକୁ ଟାର୍ଗେଟ୍ କରୁଥିବା ଆଶଙ୍କା କରାଯାଉଛି। ରବିବାର ସକାଳ ପ୍ରାୟ ୯ଟାରେ ଘଟଣା ସମ୍ପର୍କରେ ପୋଲିସକୁ ଖବର ମିଳିଥିଲା। ଶାସ୍ତ୍ରୀନଗର ଥାନା ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା। ଘରେ ଲାଗିଥିବା ସିସିଟିଭି କ୍ୟାମେରା ଯାଞ୍ଚ ବେଳେ କିଛି ଅଜଣା ବ୍ୟକ୍ତି ବିଲ୍ଡିଂ ଭିତରକୁ ପଶି ଚୋରି କରୁଥିବା ଦୃଶ୍ୟ ସାମ୍ନାକୁ ଆସିଛି। ବିଲ୍ଡିଂରେ ମୋଟ ୬ଟି ଫ୍ଲାଟ୍ ରହିଛି। ମନ୍ତ୍ରୀଙ୍କ ତିନି ଭାଇ ମଧ୍ୟ ଏହି ବିଲ୍ଡିଂର ଅଲଗା ଅଲଗା ଫ୍ଲାଟ୍ରେ ରହୁଥିଲେ। ଚୋରମାନେ ବିଭିନ୍ନ ଫ୍ଲାଟ୍ରେ ପଶି ଆଲମାରି ଭାଙ୍ଗିଥିବା ଜଣାପଡ଼ିଛି।
Powered by Froala Editor