ଝାରସୁଗୁଡ଼ା : ଝାରସୁଗୁଡ଼ା ଜିଲାର ରେଙ୍ଗାଲି ଥାନା ଅନ୍ତର୍ଗତ ଓଡ଼ିଶା–ଛତିଶଗଡ଼ ସୀମାନ୍ତବର୍ତ୍ତୀ ଅଞ୍ଚଳରେ ଚାଲିଥିବା ବେଆଇନ ଦେଶୀ ମଦ ପ୍ରସ୍ତୁତି ଓ ଚୋରା ଚାଲାଣ ର଼୍ୟାକେଟ୍ ଉପରେ ଜିଲା ପୁଲିସ ବଡ଼ଧରଣର ଚଢ଼ଉ କରିଛି। ହୀରାକୁଦ ଜଳଭଣ୍ଡାରର ପଛୁଆ ଅଞ୍ଚଳ ଏବଂ ଆନ୍ତଃରାଜ୍ୟ ସୀମାନ୍ତରେ ବ୍ୟାପକ ଭାବେ ବେଆଇନ ମଦ ପ୍ରସ୍ତୁତ ହେଉଥିବା ନେଇ ବିଶ୍ୱସ୍ତ ସୂତ୍ରରୁ ସୂଚନା ମିଳିଥିଲା। ଏହାକୁ ଆଧାର କରି ରେଙ୍ଗାଲି ଥାନା ଅଧୀନସ୍ଥ ବଡ଼ଧରା ଗ୍ରାମର ଖଜୁରିଆପଡ଼ାଠାରେ ପୁଲିସ ପକ୍ଷରୁ ଭୋର ସମୟରେ ଚଢ଼ଉ କରାଯାଇଥିଲା। ଏହି ସମୟରେ ପୁଲିସ ସେଠାରେ ବେଆଇନ ଭାବେ ଚାଲିଥିବା ଏକାଧିକ ମଦ ପ୍ରସ୍ତୁତି କେନ୍ଦ୍ର ଠାବ କରିବା ସହ ମଦ ରନ୍ଧା ପାଇଁ ବ୍ୟବହୃତ ପ୍ରାୟ ୧୭ଟି ବେଆଇନ ଚୁଲି/ଭାଟିକୁ ଘଟଣାସ୍ଥଳରେ ଭାଙ୍ଗି ନଷ୍ଟ କରିଦେଇଥିଲା। ଏହାସହ ପ୍ରାୟ ୮୭୦ ଲିଟର ଦେଶୀ ରନ୍ଧା ମଦ ଜବତ କରାଯାଇଥିବା ବେଳେ ମହୁଲ ପୋଚ ୩୦ କ୍ୱିଣ୍ଟାଲରୁ ଅଧିକ ଜବତ କରାଯାଇଛି। ଏଥିସହ ୨୦ କ୍ୱିଣ୍ଟାଲରୁ ଅଧିକ ମହୁଲ ପୋଚ ନଷ୍ଟ କରାଯାଇଥିଲା। ଗୋଟିଏ ୪ ଚକିଆ ଯାନ ଏବଂ ୪ଟି ୨ ଚକିଆ ଯାନଜବତ କରାଯାଇଥିବା ବେଳେ ମଦ ପ୍ରସ୍ତୁତିରେ ବ୍ୟବହୃତ ବୃହତ ପାତ୍ର, ସରଞ୍ଜାମ ଏବଂ ଅନ୍ୟାନ୍ୟ ସାମଗ୍ରୀ ମଧ୍ୟ ଜବତ କରାଯାଇଥିଲା। ଏହି ମାମଲାରେ ୮ ଜଣଙ୍କୁ ଗିରଫ କରାଯାଇଛି।  ସେମାନେ ହେଲେ କୁଞ୍ଜ ବେହେରା (୨୮), ପ୍ରଫୁଲ୍ଲ ବେହେରା (୨୪), କାର୍ତ୍ତିକ ବେହେରା (୬୦), ଅକ୍ଷୟ କୁମାର ବେହେରା (୨୩), ଭରତ ବେହେରା (୪୭), ସଞ୍ଜୟ ବେହେରା (୪୫), ରୂପରାମ ବେହେରା (୫୭) ଏବଂ ଭୂମିସୁତା ବେହେରା (୪୫) ପ୍ରମୁଖ।

Powered by Froala Editor