ଲୋ- ଭୋଲଟେଜ୍ ସମସ୍ୟା ସହ ବିଦ୍ୟୁତ୍ କାଟରେ ଆଉଟୁପାଉଟୁ ହେଉଛନ୍ତି ସାଧାରଣ ଲୋକେ
ଭୁବନେଶ୍ବର: ରାଜ୍ୟରେ ପ୍ରଚଣ୍ଡ ତାତି ଓ ଗୁଳୁଗୁଳି ଅନୁଭୂତ ହେଉଥିବା ବେଳେ ଅଘୋଷିତ ବିଦ୍ୟୁତ୍ କାଟ ଓ ଲୋ- ଭୋଲଟେଜ୍ ସମସ୍ୟା ତାତିଠାରୁ ବଳି ପଡ଼ୁଛି। ଗ୍ରାମାଞ୍ଚଳ ଓ ସହରାଞ୍ଚଳରେ ଅଘୋଷିତ ବିଦ୍ୟୁତ୍ କାଟ ଦ୍ବାରା ଜନଅସନ୍ତୋଷ ବଢ଼ିବାରେ ଲାଗିଛି। ବିଗତ ଦିନରେ ବିଦ୍ୟୁତ୍ କାଟ ଅଭିଯୋଗ ନେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏବଂ ଉପମୁଖ୍ୟମନ୍ତ୍ରୀ ତଥା ଶକ୍ତିମନ୍ତ୍ରୀ କନକ ବର୍ଦ୍ଧନ ସିଂହଦେଓ କହିଥିଲେ, ଅଘୋଷିତ ବିଦ୍ୟୁତ୍ କାଟ ହେବନାହିଁ। ହେଲେ ଗ୍ରୀଷ୍ମ ଲହରୀ ଏବଂ ଓଭରଲୋଡିଂ ଦର୍ଶାଇ ଅଘୋଷିତ ବିଦ୍ୟୁତ୍ କାଟ ଓ ଲୋ- ଭୋଲଟେଜ୍ ସମସ୍ୟା ଉପରୁ ହାତ ଟେକି ଦେଇଛନ୍ତି ରାଜ୍ୟ ସରକାର।
ପ୍ରତିଦିନ ଲୋ- ଭୋଲଟେଜ୍ ସମସ୍ୟା ସହ ବିଦ୍ୟୁତ୍ କାଟରେ ସାଧାରଣ ଲୋକେ ଆଉଟୁପାଉଟୁ ହେଉଛନ୍ତି। ଏଥିସହ କାଳବୈଶାଖୀ ହେଲେ କଥା ସରିଲା। ଗାଁକୁ ଗୋଟିଏ ସପ୍ତାହେ ପର୍ଯ୍ୟନ୍ତ ବିଦ୍ୟୁତ୍ ଆସୁନାହିଁ। ବାରମ୍ବାର ସ୍ଥାନୀୟ ବାସିନ୍ଦାଙ୍କ ଅଭିଯୋଗ ସତ୍ତ୍ବେ ବିଦ୍ୟୁତ୍ ବିତରଣ କର୍ତ୍ତୃପକ୍ଷ ନ ଶୁଣିବାରୁ କେଉଁଠି ଲୋକେ ବିଦ୍ୟୁତ୍ ସବ୍- ଷ୍ଟେସନ ଘେରିଲେଣି ତ’ ଆଉ କେଉଁଠି ରାସ୍ତା ଅବରୋଧ କଲେଣି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଘୋଷଣା କରିଥିଲେ ଯେ, ରାଜ୍ୟରେ ଅଘୋଷିତ ବିଦ୍ୟୁତ୍ କାଟ ହେବନାହିଁ। ବିଦ୍ୟୁତ୍ କାଟ କଲେ ଅଧିକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ। ଏପରିକି ବିଦ୍ୟୁତ୍ ବିଭାଗ କର୍ମଚାରୀ ଓ ଅଧିକାରୀଙ୍କୁ ଜେଲ ଯିବାକୁ ପଡ଼ିପାରେ। ଉପମୁଖ୍ୟମନ୍ତ୍ରୀ ତଥା ଶକ୍ତିମନ୍ତ୍ରୀ ଶ୍ରୀ ସିଂହଦେଓ ମଧ୍ୟ ତାଗିଦା କରିଥିଲେ, କିନ୍ତୁ ଅସହ୍ୟ ଗରମ ଓ ଗୁଳୁଗୁଳି ବେଳେ ଅଘୋଷିତ ବିଦ୍ୟୁତ୍ କାଟ ଓ ଲୋ- ଭୋଲଟେଜ୍ ଦାଉ ସାଧୁଛି। ପ୍ରତିବାଦରେ ଲୋକେ ରାସ୍ତାକୁ ଓହ୍ଲାଇବା ସହ ଦୃଢ଼ ପ୍ରତିବାଦ କରୁଛନ୍ତି।
ଭରତପୁର ଅଞ୍ଚଳରେ ବୁଧବାର ରାତିରୁ ବିଦ୍ୟୁତ୍ କାଟ ହୋଇଥିବା ସତ୍ତ୍ବେ ପୁନଃ ବିଦ୍ୟୁତ୍ ସଂଯୋଗରେ ବିଳମ୍ବ ପରିଲକ୍ଷିତ ହୋଇଛି। ଅନ୍ୟପଟେ ନଖରା- ଖାରବେଳ ଇଷ୍ଟେଟ ଅଞ୍ଚଳରେ କେବୁଲ ପୋଡ଼ିଯିବାରୁ ଗୁରୁବାର ରାତି ୧୧ଟାରୁ ଅଦ୍ୟାବଧି ବିଦ୍ୟୁତ୍ ସଂଯୋଗ ଦିଆଯାଇ ପାରିନାହିଁ। ସ୍ଥାନୀୟ ବାସିନ୍ଦା ବିଦ୍ୟୁତ୍ ବିତରଣ ସଂସ୍ଥାର କର୍ମଚାରୀ ଓ ଅଧିକାରୀଙ୍କୁ ବାରମ୍ବାର ଫୋନ କରିଥିଲେ ମଧ୍ୟ କେହି ଉଠାଇ ନ ଥିଲେ। ଶେଷରେ ସ୍ଥାନୀୟ ଲୋକେ ବିଦ୍ୟୁତ୍ କାର୍ଯ୍ୟାଳୟ ଘେରଉ କରିବା ସହ ଧାରଣାରେ ବସିଥିଲେ। ଏନେଇ ଶକ୍ତିମନ୍ତ୍ରୀ ଶ୍ରୀ ସିଂହଦେଓ କହିଛନ୍ତି, ଅଘୋଷିତ ବିଦ୍ୟୁତ୍ କାଟ ହେବନି ବୋଲି ପ୍ରତିଶ୍ରୁତି ଦେଇଥିଲୁ, କିନ୍ତୁ ବର୍ତ୍ତମାନ ସାରା ରାଜ୍ୟରେ ଗ୍ରୀଷ୍ମ ଲହରୀ ଜାରି ରହିଛି। ଯଥାଶୀଘ୍ର ବିଦ୍ୟୁତ୍ ପହଞ୍ଚାଇବା ପାଇଁ ଚେଷ୍ଟା କରାଯାଉଛି।
Powered by Froala Editor
