ପଟ୍ଟାଙ୍ଗି : କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅଧୀନ ଆନ୍ଧ୍ର-ଓଡିଶା ସୀମାନ୍ତ ବିବାଦୀୟ କୋଟିଆ ଗ୍ରାମପୁଞ୍ଜରେ ଆନ୍ଧ୍ର ପୁଣି ଅନୁପ୍ରବେଶ କରି ଜନଗଣନା କାର୍ଯ୍ୟ ଆରମ୍ଭ କରିଛି। କିଛିଦିନ ପୂର୍ବେ ତଳସେମ୍ବି, କୋଟିଆ, ଉପରସେମ୍ବି, ନେରେଡିବାଲ୍‌ସା ଓ ଫାଟୁସିନେରୀର ଲୋକେ ଜନଗଣନା କାର୍ଯ୍ୟକ୍ରମରେ ଓଡ଼ିଶାର ଅଧିକାରୀଙ୍କୁ କୌଣସି ସୂଚନା ଦେବାକୁ ରୋକଠୋକ ମନା କରିଦେଇଥିଲେ। ଫଳରେ ଜନଗଣନା ଅଧିକାରୀଙ୍କୁ ଖାଲି ହାତରେ ଫେରିବାକୁ ପଡ଼ିଥିଲା। ଜିଲା ଓ ବ୍ଲକ ପ୍ରଶାସନ ହସ୍ତକ୍ଷେପ କରିବା ପରେ ଜନଗଣନା କାର୍ଯ୍ୟ ହୋଇପାରିଥିଲେ ହେଁ ପରବର୍ତ୍ତୀ ସମୟରେ ଆନ୍ଧ୍ର ଦଲାଲଙ୍କ
ପ୍ର‌େରାଚନାରେ ଜନଗଣନା କାର୍ଯ୍ୟକ୍ରମ ବାଧାପ୍ରାପ୍ତ ହୋଇଥିଲା। ଏଥିପାଇଁ ଓଡ଼ିଶା ପୁଲିସ ସେଠାକାର ଦୁଇ ଦଲାଲଙ୍କୁ ଗିରଫ କରିଥିଲା। ତା ପରଠାରୁ ଜନଗଣନା ହୋଇଥିଲା।
ଉଲ୍ଲେଖଯୋଗ୍ୟ, ଓଡିଶା ଜନଗଣନା କରିସାରିବା ପରେ ଏବେ ଆନ୍ଧ୍ରପ୍ରଦେଶ ସରକାର କୋଟିଆ ଗ୍ରାମ ପଞ୍ଚାୟତରେ ଜନଗଣନା କାର୍ଯ୍ୟକ୍ରମ ଆରମ୍ଭ କରିଛନ୍ତି। ବିବାଦୀୟ କୋଟିଆର କେତେକ ଆଦିବାସୀ ଲୋକେ ଆନ୍ଧ୍ରପ୍ରଦେଶର ଆଦିବାସୀ କଲ୍ୟାଣ ବିଭାଗ ମନ୍ତ୍ରୀ ଗୁମାଡ଼ି ସନ୍ଧ୍ୟାରାଣୀଙ୍କୁ ଭେଟିଛନ୍ତି। ସେପଟେ ଗତ ଏପ୍ରିଲ ୧୮ ତାରିଖରେ ଓଡିଶା ପକ୍ଷରୁ କରାଯାଉଥିବା ଜନଗଣନାକୁ ବିରୋଧ କରିଥିବା ଦୁଇ ଦଲାଲ ମନ୍ତ୍ରୀ ସନ୍ଧ୍ୟାରାଣୀଙ୍କୁ ସାକ୍ଷାତ କରି ଧନ୍ୟବାଦ ଜଣାଇଥିଲେ।

Powered by Froala Editor