ମା’ ଦଶମଲ୍ଲୀ ମନ୍ଦିର ତାଲା ଭାଙ୍ଗି ଲୁଟିନେଲେ ଦୁର୍ବୃତ୍ତ
ଗୋପ : ଗୋପ ଥାନା ଅଧିନସ୍ଥ ଅଣ୍ଡରା-ଇଚ୍ଛାପୁର ଗ୍ରାମ ପଞ୍ଚାୟତର ତରଡାପଡା ଗ୍ରାମ ସନ୍ନିକଟ କୁଶଭଦ୍ରା ନଦୀ ପଠାରେ ଥିବା ପ୍ରାଚୀନ ଐତିହ୍ୟ ସଂପନ୍ନ ଦେବୀପୀଠ ମା’ ଦଶମଲ୍ଲୀ ମନ୍ଦିର ତାଲା ଭାଙ୍ଗି ଦୁର୍ବୃତ୍ତମାନେ ଗତ ମଙ୍ଗଳବାର ବିଳମ୍ବିତ ରାତିରେ ମା’ଙ୍କ ମୁକୁଟ ଓ ଆଖି ସମେତ ବହୁମୂଲ୍ୟ ସାମଗ୍ରୀ ଚୋରି କରିଥିବା ନେଇ ଗୋପ ଥାନାରେ ଅଭିଯୋଗ ହୋଇଛି। ଖବରରୁ ପ୍ରକାଶ ଯେ ଗତ କିଛି ମାସ ତଳେ ମା’ ଦଶମଲ୍ଲୀ ମନ୍ଦିରରୁ ଦୁର୍ବୃତ୍ତମାନେ ଅଳଙ୍କାର ଲୁଟି ନେଇଥିବା ବେଳେ ଗୋପ ପୁଲିସ ଦୁର୍ବୃତ୍ତମାନଙ୍କୁ ଧରିବାରେ ସକ୍ଷମ ହୋଇ ନାହିଁ । ମଙ୍ଗଳବାର ବିଳମ୍ବିତ ରାତିରେ ଉକ୍ତ ମନ୍ଦିରରୁ ପୁନର୍ବାର ଚୋରି ଘଟଣା ଗୋପ ପୁଲିସର ମୁଣ୍ଡ ବ୍ୟଥାର କାରଣ ପାଲଟିଛି ମା’ଙ୍କ ମୁକୁଟ ଓ ସୁନାର ଆଖି ମନ୍ଦିର ତାଲା ଭାଙ୍ଗି ଲୁଟ ହୋଇଛି। ବୁଧବାର ସକାଳ ସମୟରେ ମନ୍ଦିର ପୂଜକ ପୂଜା କରିବା ପାଇଁ ଯାଇଥିବା ବେଳେ ମନ୍ଦିର ତାଲା ଭାଙ୍ଗି ଲୁଟ ହୋଇଥିବା ଦେଖିବାକୁ ପାଇଥିଲେ। ଏହି ଘଟଣାକୁ ନେଇ ମନ୍ଦିର ପୂଜକ ଗୋପ ଥାନାରେ ଲିଖିତ ଅଭିଯୋଗ କରିବା ପରେ ଗୋପ ପୁଲିସ ଏହାର ତଦନ୍ତ ଆରମ୍ଭ କରିଛି।
Powered by Froala Editor
