ସଞ୍ଜୟ ଦତ୍ତ କିଛି ଦିନ ଧରି ଫିଲ୍ମ ଇଣ୍ଡଷ୍ଟ୍ରିରେ ଚର୍ଚ୍ଚାର ବିଷୟ ପାଲଟିଛନ୍ତି। ସଞ୍ଜୟଙ୍କୁ ଫିଲ୍ମ ‘ଧୁରନ୍ଧର’ରେ ଦେଖିବାକୁ ମିଳିଥିଲା, ଯେଉଁଠାରେ ସେ ପୋଲିସ ଅଧିକ୍ଷକ (ଏସପି) ଅସଲମ ଚୌଧୁରୀଙ୍କ ଭୂମିକାରେ ଅଭିନୟ କରିଥିଲେ। ଏବେ, ସେ ତାଙ୍କର ଆଗାମୀ ଫିଲ୍ମ ‘ଖଳନାୟକ ୨’ ଘୋଷଣା କରିଛନ୍ତି।

ସୂଚନା ଅନୁସାରେ ଜିଓ ଷ୍ଟୁଡିଓଜ୍‌ର ଜ୍ୟୋତି ଦେଶପାଣ୍ଡେ ଏହି ଫିଲ୍ମ ନିର୍ମାଣ କରିବାକୁ ଯାଉଛନ୍ତି। ନୂଆ ଫିଲ୍ମ ଘୋଷଣାର ଠିକ୍‌ ପରେ ପରେ ସଞ୍ଜୟ ଏହାର ଫାଷ୍ଟ୍‌ ଲୁକ୍‌ ମଧ୍ୟ ସେୟାର୍‌ କରିଛନ୍ତି। ସୋସିଆଲ୍‌ ମିଡିଆରେ ଏହାର ଏକ ଭିଡିଓ ସେୟାର୍‌ କରି ସେ ଲେଖିଛନ୍ତି, ‘‘କେତେକ କାହାଣୀର ଅନ୍ତ ଘଟେନାହିଁ। ଏହା ପୁଣି ଥରେ ଆରମ୍ଭ ହୋଇଥାଏ।’’ ଭିଡିଓରେ ଜଣେ ବ୍ୟକ୍ତିକୁ ସଞ୍ଜୟ ଧମକ୍‌ ଦେବା ସହ ତାଙ୍କ ଲୋକପ୍ରିୟ ସଂଳାପ ‘ନାୟକ୍‌ ନହୀଁ ଖଲ୍‌ନାୟକ୍‌ ହୁଁ ମୈଁ’କୁ ଦୋହରାଉଛନ୍ତି। ତାଙ୍କର ଏହି ସଂଳାପ ପ୍ରଶଂସକମାନଙ୍କୁ ପୁରୁଣା ଦିନକୁ ଫେରାଇ ନେଇଛି। 

୧୯୯୩ ମସିହାରେ, ସୁଭାଷ ଘାଇଙ୍କ ନିର୍ଦ୍ଦେଶିତ ଫିଲ୍ମ ‘ଖଳନାୟକ’ ରିଲିଜ୍ କରିଥିଲା ଏବଂ ଏହା ବକ୍ସ ଅଫିସରେ ହିଟ୍ ସାବ୍ୟସ୍ତ ହୋଇଥିଲା। ଏଥିରେ ସଞ୍ଜୟ ଦତ୍ତ ମୁଖ୍ୟ ଭୂମିକାରେ ଅଭିନୟ କରିଥିଲେ। ମାଧୁରୀ ଦୀକ୍ଷିତ ଏବଂ ଜ୍ୟାକି ଶ୍ରଫ୍ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିଥିଲେ। ଏହା ଭଲ ପ୍ରଦର୍ଶନ କରି ୧୯୯୩ ମସିହାର ଦ୍ୱିତୀୟ ସର୍ବାଧିକ ଆୟକାରୀ ଫିଲ୍ମ ହୋଇଥିଲା। ଫିଲ୍ମରେ ସଞ୍ଜୟ ଦତ୍ତ ଗ୍ୟାଙ୍ଗଷ୍ଟର ବଲ୍ଲୁ ବଳରାମ ପ୍ରସାଦ ଭୂମିକାରେ ନଜର ଆସିଥିଲେ, ଯାହା ଆଜି ପର୍ଯ୍ୟନ୍ତ ଲୋକପ୍ରିୟ ଚଳଚ୍ଚିତ୍ର ହୋଇ ରହିଛି। ତଥାପି, ରିପୋର୍ଟ ଅନୁସାରେ ସୁଭାଷ ଘାଇ ପ୍ରଥମେ ଅମିତାଭ ବଚ୍ଚନଙ୍କ ସହିତ ଏହି ଫିଲ୍ମ ତିଆରି କରିବାକୁ ଚାହୁଁଥିଲେ, ଯାହାର ନାଁ ‘ଦେବା’ ହେବାର ଥିଲା। କିନ୍ତୁ କୌଣସି କାରଣରୁ ଏହି ପ୍ରୋଜେକ୍ଟଟି ବନ୍ଦ ହୋଇଗଲା । କୁହାଯାଏ ଯେ ସୁଭାଷ ଘାଇ ପରେ ନୂଆ ଷ୍ଟାରକାଷ୍ଟ, ଟାଇଟଲ୍ ଏବଂ କିଛି ସ୍କ୍ରିପ୍ଟ ପରିବର୍ତ୍ତନ କରି ଫିଲ୍ମର କାମ ପୁଣି ଆରମ୍ଭ କରିଥିଲେ।

Powered by Froala Editor