ବାଂଲାଦେଶ ରେ ହାଇଦର! କଟକ: ଓଡିଶାର ଦୁର୍ଦ୍ଧାନ୍ତ ଗ୍ୟାଙ୍ଗଷ୍ଟର ହାଇଦର ଓ ତା’ର ପରିବାର ଲୋକ କେନ୍ଦ୍ରାପଡ଼ା ଜିଲ୍ଲା ଜମ୍ବୁ ବାଟ ଦେଇ ବଙ୍ଗୋପସାଗରରେ ବୋଟରେ ବାଂଲାଦେଶ ଚମ୍ପଟ ମାରିଛନ୍ତି । କିମ୍ବା ସପରିବାର ବାଂଲାଦେଶ ଚାଲିଯିବା ପାଇଁ ଯୋଜନା କରୁଛନ୍ତି ବୋଲି ଅନୁମାନ କରାଯାଉଛି । ଏହିଭଳି ଖବର ଜଣାପଡିବା ପରେ କଟକ କମିସନରେଟ ପୁଲିସର ଏକ ଟିମ ଜମ୍ବୁର ବିଭିନ୍ନ ସ୍ଥାନରେ ଚଢ଼ଉ କରିଛି । ଜଳେରେ ଆଉ ଏକ ସ୍ୱତନ୍ତ୍ର ପୁଲିସ ଟିମ ଛାନଭିନ ଜାରି ରଖିଛି । ସୂଚନା ଅନୁଯାୟୀ, ଗ୍ୟାଙ୍ଗଷ୍ଟର ହାଇଦର ବଡ଼ ମେଡିକାଲରୁ ଅପରାହ୍ନ ପ୍ରାୟ ୪ଟାରୁ ୪ଟା ୩୦ ଭିତରେ ଯାଇଥିବା ବେଳେ କମିସନରେଟ ପୁଲିସ ରାତି ପ୍ରାୟ ୭ଟା ବେଳକୁ ଖବର ପାଇଥିଲା । ଏହି ସମୟ ଭିତରେ ହାଇଦରକୁ ଖସିଯିବାକୁ ପରୋକ୍ଷରେ ଏକ ପ୍ରକାର ସୁଯୋଗ ଦିଆଯାଇଥିବା କୁହାଯାଉଛି । ବଡ଼ ମେଡିକାଲକୁ ଶନିବାର ଆସିଥିବା ହାଇଦରର ମଝିଆ ପୁଅ ଆଝାରୁଦ୍ଧିନ ସମେତ ଭାଇ କାଳିଆ, ପୁତୁରା କାଲା, ଶାଳକ ଗୋରା ଏବଂ ସାନ ଜ୍ୱାଇଁଙ୍କ ମୋବାଇଲ ପାଖାପାଖି ୪ଟା ୩୦ ବେଳେ ମଙ୍ଗଳବାଗ ଅଂଚଳରେ ହିଁ ସୁଇଚ ଅଫ ହୋଇଥିବା ଜଣାପଡିଛି । ତା ପରଠାରୁ ସେମାନଙ୍କ ମୋବାଇଲ ଆଉ ଖୋଲାଯାଇ ନାହିଁ । ଏବେ ହାଇଦରର ବଡ଼ ପୁଅ ସେକ ମୁନ୍ନା ଜେଲରେ ଥିବା ବେଳେ ବାହାରେ ଥିବା ମଝିଆ ପୁଅ ସେକ ଆଝାରୁଦ୍ଧିନ, ସାନ ପୁଅ ସେକ ବୁନ୍ନେଇ, ଭାଇ, ପୁତୁରା, ସଳା ଓ ସାନ ଜ୍ୱାଇଁଙ୍କ ପତ୍ତା ମିଳୁନାହିଁ । ହାଇଦର ସହିତ ଏମାନେ ଥିବା ବେଳେ ଅଧାରାସ୍ତାରୁ ଅଲଗା ଅଲଗା ହୋଇ ବାଂଲାଦେଶ ଆଡକୁ ଯାଇଥିବା କୁହାଯାଉଛି । ପୁଲିସର ଆଉ ଚାରଟି ଟିମ କୋଲକାତା ସମେତ ଝାଡ଼ଖଣ୍ଡ, ଛତିଶଗଡ଼, ଆନ୍ଧ୍ରପ୍ରଦେଶ ଯାଇ ସର୍ଚ ଅପରେସନ୍ ଜାରି ରଖିଛନ୍ତି ।