ପେଟ୍ରୋଲ୍ ଦାମ୍ ୫ ଟଙ୍କା ବଢ଼ାଇଲା ନାୟରା
ପେଟ୍ରୋଲ୍ ଓ ଡିଜେଲ୍ ଦାମ୍ରେ ବୃଦ୍ଧି କରାଯାଇଛି। ମଧ୍ୟପ୍ରାଚ୍ୟ ଯୁଦ୍ଧ ପରେ ପ୍ରଥମ ଥର ପାଇଁ ଦେଶରେ ତେଲ ଦରରେ ଏଭଳି ବଡ଼ ଧରଣର ବୃଦ୍ଧି ଘଟିଛି। ନାୟାରା ହେଉଛି ଦେଶର ସର୍ବବୃହତ୍ ଘରୋଇ ତେଲ ବିପଣନ କମ୍ପାନି। ଏହା ଅଧୀନରେ ୬୯୬୭ଟି ପେଟ୍ରୋଲ୍ ପମ୍ପ୍ ରହିଛି। କମ୍ପାନି ପକ୍ଷରୁ ପେଟ୍ରୋଲ୍ ଲିଟର ୫ ଟଙ୍କା ଓ ଡିଜେଲ୍ ଦର ୩ ଟଙ୍କା ବୃଦ୍ଧି କରାଯାଇଛି।
ତେବେ ସରକାରୀ ତୈଳ କମ୍ପାନିଗୁଡ଼ିକର ପେଟ୍ରୋଲ୍, ଡିଜେଲ୍ ଦାମ୍ ଅପରିବର୍ତ୍ତିତ ରହିଛି। ବିପୁଳ କ୍ଷତି ସତ୍ତ୍ବେ ଅନ୍ୟତମ ଘରୋଇ କମ୍ପାନି ଜିଓ-ବିପି ମଧ୍ୟ ତେଲ ଦର ବଢ଼ାଇ ନାହିଁ। ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ୧୧୯ ଡଲାରକୁ ବୃଦ୍ଧି ପାଇବାରୁ ନାୟରା ତେଲ ଦର ବଢ଼ାଇବାକୁ ବାଧ୍ୟ ହୋଇଛି।
ଇରାନ ଉପରେ ଆମେରିକା ଓ ଇସ୍ରାଏଲର ଆକ୍ରମଣ ଚତୁର୍ଥ ସପ୍ତାହରେ ପହଞ୍ଚିଥିବା ବେଳେ ବର୍ତ୍ତମାନ ଯୁଦ୍ଧ ବିରତି ରହିଛି। ଯୁଦ୍ଧ ବନ୍ଦ କରିବାକୁ ଆଲୋଚନା ଜାରି ରହିଛି। ଯୁଦ୍ଧ ପ୍ରଭାବରେ ବିଶ୍ବର ପ୍ରମୁଖ ସାମୁଦ୍ରିକ ଜଳପଥ ହର୍ମୁଜ ପ୍ରଣାଳୀ ଦେଇ ଜାହାଜଗୁଡ଼ିକ ସ୍ବାଭାବିକ ଭାବେ ଚଳାଚଳ କରିପାରୁନଥିବାରୁ ଦେଶକୁ ତେଲ ଓ ଗ୍ୟାସ୍ ଆସିପାରୁନାହିଁ। ସେଥିପାଇଁ ଭାରତରେ ଘୋର ଏଲ୍ପିଜି ସଙ୍କଟ ଦେଖାଦେଇଛି। ତେଲକୁ ନେଇ ଯଦିଓ ସେଭଳି ଜରୁରୀକାଳୀନ ସ୍ଥିତି ନାହିଁ, କିନ୍ତୁ ଗୁଜବ ପ୍ରଭାବରେ କିଛି ରାଜ୍ୟରେ ପେଟ୍ରୋଲ୍ ପମ୍ପ୍ଗୁଡ଼ିକରେ ଗ୍ରାହକଙ୍କ ପ୍ରବଳ ଭିଡ଼ ଦେଖିବାକୁ ମିଳୁଛି।
କିଛି ଦିନ ତଳେ ସରକାରୀ ତୈଳ କମ୍ପାନି ଇଣ୍ଡିଆନ ଅଏଲ୍ ଓ ଭାରତ ପେଟ୍ରୋଲିୟମ୍ ପକ୍ଷରୁ ପ୍ରିମିୟମ୍ ପେଟ୍ରୋଲ୍ ଦାମ୍ରେ ୨-୩ ଟଙ୍କା ପର୍ଯ୍ୟନ୍ତ ବୃଦ୍ଧି କରାଯାଇଥିଲା। ଫଳରେ ଏକ୍ସପି୯୫ ଓ ପାୱାର ଭଳି ବ୍ରାଣ୍ଡେଡ୍ ପେଟ୍ରୋଲ୍ର ଲିଟର ପିଛା ଦାମ୍ ଯଥାକ୍ରମେ ୧୧୧.୬୮ ଟଙ୍କା ଓ ୧୧୩.୭୭ ଟଙ୍କାକୁ ବୃଦ୍ଧି ପାଇଥିଲା।
Powered by Froala Editor
