କେନ୍ଦ୍ର ସରକାର ତେଲ ଏବଂ ଗ୍ୟାସ କମ୍ପାନୀଗୁଡ଼ିକୁ ୧ ଏପ୍ରିଲରୁ ଦେଶର ବିଭିନ୍ନ ପେଟ୍ରୋଲ ପମ୍ପରେ ୨୦ ପ୍ରତିଶତ ଇଥାନଲ୍ ମିଶ୍ରିତ ପେଟ୍ରୋଲ ବିକ୍ରୟ କରିବାକୁ ନିର୍ଦ୍ଦେଶ ଦେଇଛନ୍ତି। ଏପ୍ରିଲ ୧ତାରିଖରୁ ସାରା ଦେଶରେ ୨୦ପ୍ରତିଶତ ପର୍ଯ୍ୟନ୍ତ ଇଥାନଲ୍ (ଇ-୨୦) ମିଶ୍ରିତ ପେଟ୍ରୋଲ ବିକ୍ରୟ ପାଇଁ ପେଟ୍ରୋଲିୟମ୍ ଓ ପ୍ରାକୃତିକ ଗ୍ୟାସ୍ ମନ୍ତ୍ରଣାଳୟ ଏକ ବିଜ୍ଞପ୍ତି ଜାରି କରି ତୈଳ କମ୍ପାନୀଗୁଡ଼ିକୁ ନିର୍ଦ୍ଦେଶ ଦେଇଛନ୍ତି। ଏହା ସର୍ବନିମ୍ନ ୯୫ ରିସର୍ଚ୍ଚ ଅକ୍ଟେନ୍ ନମ୍ବର (RON) ପୂରଣ କରିବାର ଆବଶ୍ୟକତା ରହିଛି। ଆରଓଏନ୍ ଏକ ଇନ୍ଧନର ସ୍ଥିରତା ମାପ କରେ, ଯାହା ସୂଚାଇଥାଏ ଯେ ଏହା ଜଳିବା ପୂର୍ବରୁ କେତେ କମ୍ପ୍ରେସନ ସହ୍ୟ କରିପାରିବ ଏବଂ ଏହାର ଉଚ୍ଚ ଗୁଣବତ୍ତା ଉତ୍ତମ କାର୍ଯ୍ୟଦକ୍ଷତାକୁ ସୂଚିତ କରିବ।

୨୦୨୩-୨୫ ପରେ ଭାରତରେ ନିର୍ମିତ ଅଧିକାଂଶ ଯାନ ଇ୨୦ ରେ ଚାଲିବା ପାଇଁ ଡିଜାଇନ୍ କରାଯାଇଛି ଏବଂ ଏଥିରେ କୌଣସି ବଡ଼ ସମସ୍ୟା ଦେଖାଯିବନି ବୋଲି ଆଶା କରାଯାଉଛି। ତଥାପି, ପୁରୁଣା ଯାନଗୁଡ଼ିକ ମାଇଲେଜ୍ରେ ସାମାନ୍ୟ ହ୍ରାସ (୩-୭%) ଅନୁଭବ କରିପାରେ ଏବଂ ରବର କିମ୍ବା ପ୍ଲାଷ୍ଟିକ୍ ଅଂଶ ମଧ୍ୟ କ୍ଷତିଗ୍ରସ୍ତ ହୋଇପାରେ।

ଇଥାନଲ୍ ଆଖୁ, ମକା ଓ ଅନ୍ୟାନ୍ୟ ଶସ୍ୟରୁ ଉତ୍ପାଦିତ ହୁଏ। ଏହା ଏକ ନବୀକରଣୀୟ ଇନ୍ଧନ ଏବଂ ନିୟମିତ ପେଟ୍ରୋଲ ତୁଳନାରେ କମ୍ ପ୍ରଦୂଷଣକାରୀ। ସରକାର କହିଛନ୍ତି ଯେ ଇଥାନଲ୍ ମିଶ୍ରଣ ଅଶୋଧିତ ତୈଳ ଆମଦାନୀ ଉପରେ ନିର୍ଭରଶୀଳତା ହ୍ରାସ କରିବ, ଯାହାଦ୍ୱାରା ପ୍ରଦୂଷଣ ହ୍ରାସ ପାଇବ। ଏହା ବ୍ୟତୀତ, ଆଖୁ ଓ ମକାର ଚାହିଦା ବୃଦ୍ଧି ପାଇବା ସହିତ ଚାଷୀମାନେ ଲାଭବାନ ହେବେ।

Powered by Froala Editor