କଟକ: ‘ମୁଁ ଦାଦା (ହାଇଦର)ଙ୍କୁ ବଡ଼ ମେଡିକାଲ ସର୍ଜରି ୱାର୍ଡରେ ୩ ଥର ବିରିଆନି ନେଇ ଦେଇଛି । ବାଲିଘାଟ ଓ ଠିକା କାମ ପାଇଁ ବଡ଼ ମେଡିକାଲରେ ତାଙ୍କୁ ଭେଟିବାକୁ ଯାଇଥିବା ବେଳେ ବିରିଆନି ନେଇଥିଲି । ତାଙ୍କ ପରିବାର ଲୋକଙ୍କ କହିବା ପରେ ପୀର ବଜାରରୁ ବିରିଆନି ନେଇ ତାଙ୍କୁ ଦେଇଥିଲି । କିନ୍ତୁ ଏଭଳି ସେ ଖସି ପଳାଇବେ ବୋଲି ଜାଣିନଥିଲି... । ଏଭଳି ଚାଞ୍ଚଲ୍ୟ କର ବୟାନ ଦେଇଛି ଫେରାର ଗ୍ୟାଙ୍ଗଷ୍ଟାର ହାଇଦରର ସହଯୋଗୀ କୁହାଯାଉଥିବା ୟାକୁବ ଓରଫ କଲ୍ଲୁ ଖାଁ । ହାଇଦର ସମ୍ବଲପୁରରୁ ଗଲା ଦୁଇ ମାସ ତଳେ ବଡ଼ ଡାକ୍ତରଖାନାକୁ ଚିକିତ୍ସା ପାଇଁ ଆସିଥିବା ବେଳେ ମହାନଦୀ ବିହାରର କଲ୍ଲୁ ତାକୁ ସେଠାରେ ଭେଟିଥିବା ଗଣମାଧ୍ୟମକୁ ସୂଚନା ଦେଇଛି । କଲ୍ଲୁର କହିବା ଅନୁସାରେ ଯୋବ୍ରା ରହେମାନ ଛକରେ ଥିବା ହାଇଦରର ଧରମପୁଅ ତାକୁ ଦୁଇ ମାସ ତଳେ ବଡ଼ ଡାକ୍ତରଖାନାରେ ହାଇଦର ସହିତ ପରିଚୟ କରାଇଥିଲା । ସେଦିନ ମଙ୍ଗଳବାର ଥାଏ ବୋଲି କଲ୍ଲୁ କହିଛି । ହାଇଦର ଫେରାର ହେବା ପରେ ପୁଲିସ ବଡ଼ ଡାକ୍ତରଖାନାରୁ ଜବତ କରିଥିବା ସିସି କ୍ୟାମେରା ଫୁଟେଜ ଆଧାରରେ କଲ୍ଲୁର ମହାନଦୀ ବିହାର ଘରେ ଶନିବାର ରାତି ଗୋଟାଏ ଓ ୩ଟାରେ ଦୁଇଥର ଚଢ଼ାଉ କରିଥିବା ସେ ସୂଚନା ଦେଇଛି । ସେ ଆହୁରି କହିଛି ଯେ, ଦାଦା (ହାଇଦର) ମତେ କ୍ରାଇମ ଲାଇନ ବେକାର ବୋଲି କହିଥିଲେ । ଭଲ କାମ କର ବୋଲି କହିବା ସହ ସେ ନିଜେ ୧୬/୧୭ ବର୍ଷ ହେବ ଘରଦ୍ୱାର ଦେଖିପାରିନଥିବା କହିଥିଲେ । ଭଲ କଥା ବୁଝାଇଥିଲେ ମତେ । ୧୨ ରୁ ୧୩ ଦିନ ତଳେ ପୁଣି ବଡ଼ ଡାକ୍ତରଖାନାରେ ତାଙ୍କ ସହ ଭେଟ ହୋଇଥିଲା । କାମ କଥା ପଚାରିଥିଲି । ଏପି୍ରଲ ୧୭/୧୮ ତାରିଖ ଯାଉ କଥା ହେବା ବୋଲି ଦାଦା କହିଥିଲେ । ସିଏ ଏଭଳି କରିବେ ଜାଣି ନଥିଲୁ । ଦୁଇ ଦିନ ତଳେ ଆଳିରେ ଏକ ବାହାଘର ପାଇଁ ଯାଇଥିଲି । କଟକ ଫେରି କାଲି ସେଲୁନରେ ଚୁଟି କାଟିଥିଲୁ । ନିଉଜରେ ସିଏ ଫେରାର ହୋଇଥିବା ଜାଣିବାକୁ ପାଇଥିଲି । ପୁଲିସ ଭୟରେ ଆମେ ଲୁଚିଲୁ । ମୁଁ ପୁଲିସ ନିକଟରେ ଆତ୍ମସମର୍ପଣ କରିବାକୁ ଚାହୁଁଛି । ପୁଲିସକୁ ତଦନ୍ତରେ ସହଯୋଗ କରିବାକୁ ପ୍ରସ୍ତୁତ । ହାଇଦର କେଉଁଠି ଅଛି ମୁଁ ଜାଣେ ନାହିଁ । ମୁଁ ଜାଣି ନଥିଲି ଯେ ହାଇଦର ଫେରାର ହୋଇଯିବ । ମୁଁ ଚାହୁଁନାହିଁ ମୋ ପରିବାର ମୋ ପାଇଁ ଅସୁବିଧାରେ ପଡୁ ବୋଲି କଲ୍ଲୁ ଗଣମାଧ୍ୟମ ସାମନାରେ ବୟାନ ରଖିିଛି । କଲ୍ଲୁର ଏଭଳି ବୟାନ ପରେ କମିସନରେଟ ପୁଲିସରେ ହଇଚଇ ସୃଷ୍ଟି ହୋଇଛି ।