ନୂଆଦିଲ୍ଲୀ: ଭୁବନେଶ୍ୱର କ୍ୟାପିଟାଲ ରିଜନ ରିଂରୋଡ଼ ଟେଣ୍ଡର ପ୍ରକ୍ରିୟା ଆସନ୍ତା ମାର୍ଚ୍ଚ ୨୦୨୬ ସୁଦ୍ଧା ସମ୍ପୂର୍ଣ୍ଣ ହୋଇ ନିର୍ମାଣ ଲାଗି ଠିକା ପ୍ରଦାନ କରାଯିବ। ତିନୋଟି ପ୍ୟାକେଜରେ ପ୍ରସ୍ତାବିତ ୧୧୧ କିଲୋମିଟର ଲମ୍ବ ଭୁବନେଶ୍ୱର କ୍ୟାପିଟାଲ ରିଜନ ରିଙ୍ଗରୋଡ଼ ନିର୍ମାଣ ଲାଗି ଏନଏଚଏଆଇ ଟେଣ୍ଡରରେ ଠିକା ସଂସ୍ଥା ଗୁଡ଼ିକର ଅଂଶଗ୍ରହଣ ଉତ୍ସାହଜନକ ରହିଛି। ପ୍ୟାକେଜ-୧ରେ ୨୩ଟି, ପ୍ୟାକେଜ-୨ରେ ୨୫ଟି ଏବଂ ପ୍ୟାକେଜ-୩ରେ ୧୬ଟି ସଂସ୍ଥା ନିର୍ମାଣ ପାଇଁ ଆଗ୍ରହ ପ୍ରକାଶ କରିଛନ୍ତି।

ଭୁବନେଶ୍ୱର ଓ କଟକ ସହରରେ ଟ୍ରାଫିକ ଭିଡ଼ କମାଇବା ପାଇଁ ପ୍ରସ୍ତାବିତ ୧୧୦.୮୭ କିଲୋମିଟର ଲମ୍ବ ରାମେଶ୍ୱର-ଟାଙ୍ଗି ବାଏପାସ ଗ୍ରୀନଫିଲଡ ରାଜପଥ ପ୍ରକଳ୍ପକୁ ଗତ ଅଗଷ୍ଟ ୧୯ରେ କେନ୍ଦ୍ର କ୍ୟାବିନେଟ ଅର୍ଥନୈତିକ ବ୍ୟାପାର କମିଟି ମଞ୍ଜୁର କରିଥିଲା। ଆଧୁନିକ ଜ୍ଞାନକୌଶଳରେ ଏଚଏଏମ ମଡେଲରେ ଛଅଥାକିଆ ରାଜପଥ ନିର୍ମାଣ ଲାଗି ୮୩୦୭.୭୪ କୋଟି ବ୍ୟୟ ଅଟକଳ ରହିଛି। ଏଥିରେ ପରିଚାଳନା ଓ ମରାମତି ଖର୍ଚ୍ଚ ସାମିଲ ଅଛି। ପ୍ରକଳ୍ପ ନିର୍ମାଣ ଅବଧି ୨.୫ ବର୍ଷ ଏବଂ ପରିଚାଳନା ଓ ମରାମତି ସମୟସୀମା ୧୫ ବର୍ଷ ରହିଛି।

ପ୍ରକଳ୍ପ ଜମି ଅଧିଗ୍ରହଣ ବାବଦରେ ୧୦୨୯.୪୩ କୋଟି, ସିଭିଲ କାର୍ଯ୍ୟ ବାବଦରେ ୪୬୪୦.୮୬ କୋଟି, ୟୁଟିଲିଟି ସ୍ଥାନାନ୍ତର ବାବଦରେ ୪୫.୯୧ କୋଟି ଏବଂ ଜଙ୍ଗଲ ଓ ପରିବେଶ ପରିଚାଳନା ବାବଦରେ ୫୦.୬୬ କୋଟି ଖର୍ଚ୍ଚ ଅନ୍ତର୍ଭୁକ୍ତ ରହିଛି। ପ୍ରତି ଏକ କିଲୋମିଟର ରାଜପଥ ନିର୍ମାଣ ବାବଦରେ ହାରାହାରି ୭୪.୯୩ କୋଟି ଖର୍ଚ୍ଚ ପ୍ରସ୍ତାବ ଅଛି। ରାଜପଥ ନିର୍ମାଣ ଲାଗି ଆବଶ୍ୟକ ୮୪୦.୩୯ ହେକ୍ଟର ଜମିର ୫୦ ପ୍ରତିଶତ ଅର୍ଥ ଓଡ଼ିଶା ସରକାର ବହନ କରିବେ। ପ୍ରକଳ୍ପ ଜମି ବାବଦରେ ରାଜ୍ୟ ସରକାର ୨ଶହ କୋଟି ଜମା କରି ସାରିଛନ୍ତି। ପ୍ରସ୍ତାବିତ ବାଏପାସରେ ଦୈନିକ ଯାନବାହନ ଚଳାଚଳ କ୍ଷମତା ୩୦ ହଜାର ରହିଛି ଏବଂ ଦୁଇ ଘଣ୍ଟାରେ ସମୁଦାୟ ରାଜପଥକୁ ଅତିକ୍ରମ କରି ହେବ।

ଭୁବନେଶ୍ୱର କ୍ୟାପିଟାଲ ରିଜନ ଗ୍ରୀନଫିଲଡ ଛଅଥାକିଆ ରିଙ୍ଗରୋଡଟି ଜାତୀୟ ରାଜପଥ ସଂଖ୍ୟା ୧୬ ଅନ୍ତର୍ଗତ ଖୋର୍ଦ୍ଧା ଜିଲା ରାମେଶ୍ୱର ନିକଟସ୍ଥ କୁସପଙ୍ଗୀ ଗ୍ରାମ ଠାରୁ ବାହାରି କଟକ ଜିଲା ଟାଙ୍ଗୀ ନିକଟସ୍ଥ ବନ୍ଦାଳ ଟୋଲ ବ୍ରିଜ ଠାରେ ପୁଣି ଥରେ ଜାତୀୟ ରାଜପଥକୁ ସଂଯୋଗ କରିବ। ନୂତନ ରାଜପଥଟି ଜାତୀୟ ରାଜପଥ ସଂଖ୍ୟା ୫୫, ୫୭ ଓ ୬୫୫କୁ ସଂଯୋଗ ସହ ଅତିକ୍ରମ କରିବ। ଘରୋଇ ଭାଗିଦାରୀ (ଏଚଏଏମ)ରେ ନିର୍ମାଣ ପାଇଁ ପ୍ରସ୍ତାବିତ ଭୁବନେଶ୍ୱର ବାଏପାସ ରାଜ୍ୟର ଖୋର୍ଦ୍ଧା, ଢ଼େଙ୍କାନାଳ ଓ କଟକ ଜିଲ୍ଲାରେ ନିର୍ମାଣ ହେବ। ପ୍ରକଳ୍ପର ୬ଟି ସ୍ଥାନରେ ଇଣ୍ଟରଚେଞ୍ଜ ରହିବ। ଏଥିରେ ସମୁଦାୟ ୫ଟି ବଡ଼ପୋଲ, ୪୪ଟି ଛୋଟପୋଲ, ୩୦୧ଟି କଲଭର୍ଟ ନିର୍ମାଣ ପ୍ରସ୍ତାବ ରହିଛି। 

Powered by Froala Editor