ଭୋଟର ତାଲିକାରେ ସଂଶୋଧନ କରିବା ପାଇଁ ଜାରି ରହିଥିବା ସ୍ପେଶାଲ ଇଣ୍ଟେନସିଭ ରିଭିଜନ ବା ଏସ୍‌ଆଇଆର ସମୟସୀମାକୁ ବୃଦ୍ଧି କରିଛନ୍ତି ନିର୍ବାଚନ କମିଶନ। ୬ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳରେ ସମୟ ସୀମା ବୃଦ୍ଧି କରିଥିବା ନେଇ ନିର୍ବାଚନ କମିଶନ୍ ଘୋଷଣା କରିଛନ୍ତି। ଏଥିରେ ତାମିଲନାଡୁ, ଗୁଜରାଟ, ମଧ୍ୟ ପ୍ରଦେଶ, ଛତିଶଗଡ଼, ଆଣ୍ଡାମାନ ଓ ନିକୋବର ଏବଂ ଉତ୍ତର ପ୍ରଦେଶ ରହିଛି। ଏବେ ଏଠିକାର ମତାଦାତାଙ୍କୁ କିଛି ମାତ୍ରାରେ ଆଶ୍ବସ୍ତି ମିଳିଛି। ତେବେ ପୂର୍ବ ଘୋଷଣା ଅନୁସାରେ, ଗୋଆ, ଲାକ୍ଷାଦ୍ୱୀପ, ରାଜସ୍ଥାନ ଓ ପଶ୍ଚିମବଙ୍ଗରେ ଏସ୍‌ଆଇଆର ପ୍ରକ୍ରିୟା ଶେଷ ହୋଇଛି।

ତାମିଲନାଡୁ ଓ ଗୁଜରାଟରେ ଏସଆଇଆର ଫର୍ମ ଜମା କରିବାର ସମୟ ସୀମା ୧୪ ଡିସେମ୍ବର ୨୦୨୫ ଥିଲା,ଯାହାକୁ ନିର୍ବାଚନ କମିଶନ ବଢାଇକି ଏହି ଦୁଇ ରାଜ୍ୟରେ ଏବେ ୧୯ ଡିସେମ୍ବର ୨୦୨୫ କରିଦେଇଛନ୍ତି। ଏହାର ଅର୍ଥ ଏହି ରାଜ୍ୟରେ ହିତାଧିକାରୀଙ୍କୁ ଆବଶ୍ୟକୀୟ ଡକ୍ୟୁମେଣ୍ଟ ପ୍ରସ୍ତୁତ କରିବା ଓ ଜମା କରିବା ପାଇଁ ୫ ଦିନର ଅତିରିକ୍ତ ସମୟ ମିଳିଛି। ନିର୍ବାଚନ କମିଶନ ମଧ୍ୟ ପ୍ରଦେଶ, ଛତିଶଗଡ ଏବଂ ଆଣ୍ଡାମାନ ଓ ନିକୋବର ପାଇଁ ଅନ୍ତିମ ତାରିଖ ୧୮ ଡିସେମ୍ବର ୨୦୨୫ (ଗୁରୁବାର)କୁ ବଢାଇ ୨୩ ଡିସେମ୍ବର ୨୦୨୫ (ମଙ୍ଗଳବାର) କରିଦେଇଛନ୍ତି। ସେଭଳି ୟୁପିରେ ଏସଆଇଆର ଅନ୍ତିମ ତାରିଖ ୨୬ରୁ ବଢାଇ ୩୧ ଡିସେମ୍ବର (ବୁଧବାର) କରିଦେଇଛନ୍ତି। ନିର୍ବାଚନ କମିଶନ ଏହି ସବୁ ରାଜ୍ୟର ନାଗରିକଙ୍କୁ ଅପିଲ କରିଛନ୍ତି, ବଢିଥିବା ତାରିଖର ଲାଭ ଉଠାଇ ଶୀଘ୍ର ନିଜର କାମ ପୁରା କରିନିଅ।

ଏସ୍‌ଆଇଆର ସମୟ ସୀମା ବୃଦ୍ଧି ପୂର୍ବରୁ ନିର୍ବାଚନ କମିଶନ କେରଳ କ୍ଷେତ୍ରରେ ମଧ୍ୟ ସ୍ୱତନ୍ତ୍ର ସଂଶୋଧନ କରିଥିଲେ। କେରଳରେ ଡିସେମ୍ବର ୧୮ ଯାଏ ଭୋଟର ତାଲିକା ସର୍ଭେ ଚାଲିବ ଓ ଡିସେମ୍ବର ୨୩ରେ ଡ୍ରାଫ୍ଟ ଭୋଟର ତାଲିକା ପ୍ରକାଶ ପାଇବ ବୋଲି ନିର୍ବାଚନ କମିଶନ କହିଥିଲେ।

୧୯୫୧ରୁ ୨୦୦୪ ମଧ୍ୟରେ ଦେଶରେ ୮ଥର ଏସ୍‌ଆଇଆର ହୋଇଛି। ୨୧ ବର୍ଷ ପରେ ପୂରା ଦେଶରେ ଏସ୍‌ଆଇଆର ହେବ। ଅର୍ଥାତ ଦେଶରେ ୯ମ ଥର ପାଇଁ ଏସ୍‌ଆଇଆର ହେଉଛି। ଭୋଟର ତାଲିକାରୁ ନକଲି ମତଦାତାଙ୍କୁ ହଟାଇବା ହିଁ ଏସ୍‌ଆଇଆରର ମୂଳ ଉଦ୍ଦେଶ୍ୟ। ଅନେକ ସମୟରେ ଲୋକମାନେ ଗୋଟିଏ ସ୍ଥାନରୁ ଆଉ ଗୋଟିଏ ସ୍ଥାନକୁ ଚାଲି ଯାଆନ୍ତି।

Powered by Froala Editor