ବୈଷୟିକ ତ୍ରୁଟି ଏବଂ ପର୍ଯ୍ୟାପ୍ତ କର୍ମଚାରୀ ଅଭାବରୁ ବୁଧବାର ଇଣ୍ଡିଗୋ ଏୟାରଲାଇନ୍ ବେଙ୍ଗାଲୁରୁ, ମୁମ୍ବଇ ସମେତ ଅନ୍ୟ ସହରରେ ୧୫୦ରୁ ଅଧିକ ବିମାନ ଉଡାଣ ବାତିଲ କରିଛି। ବେଙ୍ଗାଲୁରୁରେ କର୍ମଚାରୀ ଅଭାବରୁ ୪୨ ବିମାନ ବାତିଲ ହୋଇଥିବାବେଳେ ମୁମ୍ବଇରେ ୩୨ ବିମାନ ଉଡାଣ ପ୍ରଭାବିତ ହୋଇଛି। ଦିଲ୍ଲୀ, ହାଇଦରାବାଦ, ଚେନ୍ନଇ, ଗୋଆ, କଲକାତା ଏବଂ ଲକ୍ଷ୍ନୌରେ ଅନେକ ବିମାନ ଉଡାଣ ବାତିଲ ହୋଇଛି। ଦିଲ୍ଲୀ ବିମାନ ବନ୍ଦରରେ ଇଣ୍ଡିଗୋର ୬୭ ବିମାନ ଉଡାଣରେ ବିଳମ୍ବ ହୋଇଛି।

ହାଇଦ୍ରାବାଦର ରାଜୀବ ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦର (RGIA) ପରିଚାଳନା ପକ୍ଷରୁ କୁହାଯାଇଛି ଯେ, ବିମାନବନ୍ଦରରେ ଇଣ୍ଡିଗୋ ବିମାନଗୁଡ଼ିକ ବାତିଲ ହେବା ବିମାନ କମ୍ପାନି ଭିତରେ ବୈଷୟିକ ଏବଂ କାର୍ଯ୍ୟକ୍ଷମ ସମସ୍ୟା ଯୋଗୁ ହୋଇଥିଲା, ଯାହା ଫଳରେ ବିମାନ ବାତିଲ ଏବଂ ବିଳମ୍ବ ହୋଇଥିଲା। ଇଣ୍ଡିଗୋ କହିଛି ଯେ, କର୍ମଚାରୀମାନେ ସ୍ୱାଭାବିକତା ଫେରାଇ ଆଣିବା ପାଇଁ କାମ କରୁଛନ୍ତି। ଯେଉଁ ଯାତ୍ରୀମାନଙ୍କର ବିମାନ ବାତିଲ ହୋଇଛି ସେମାନଙ୍କୁ ଅନ୍ୟ ବିମାନରେ ସ୍ଥାନ ଦିଆଯାଉଛି କିମ୍ବା ପୂର୍ଣ୍ଣ ଫେରସ୍ତ ପାଉଛନ୍ତି। ବିଳମ୍ବ ହୋଇଥିବା ବିମାନରେ ଯାତ୍ରୀମାନଙ୍କୁ ମଧ୍ୟ ସମସ୍ତ ପ୍ରକାରର ସହାୟତା ଯୋଗାଇ ଦିଆଯାଉଛି।

ବେସାମରିକ ବିମାନ ଚଳାଚଳ ମହାନିର୍ଦେଶାଳୟର ୱେବସାଇଟ୍ ଅନୁସାରେ ମଙ୍ଗଳବାର ୬ ମୁଖ୍ୟ ଘରୋଇ ବିମାନ ବନ୍ଦରରେ ଇଣ୍ଡିଗୋ ଅନ-ଟାଇମ୍ ପରଫର୍ମାନ୍ସ ମାତ୍ର ୩୫ ପ୍ରତିଶତ ରହିଥିଲା। ଇଣ୍ଡିଗୋ ୧୬୦ ଏ ୩୨୦ ଫ୍ୟାମିଲି ଏୟାରକ୍ରାଫ୍ଟର ଜରୁରୀ ଅପଗ୍ରେଡକୁ ପୂରା କରିସାରିଥିବାବେଳେ ଏଭଳି ଆଉ ୪୦ ଏୟାରକ୍ରାଫ୍ଟ ପାଇଁ ଜରୁରୀ ତଦାରଖ ଚାଲିଛି। ଅନ୍ୟପଟେ ଲଗାତାର ଉଡାଣ ବାତିଲ ଏବଂ ବିଳମ୍ବ ନେଇ ଡିଜିସିଏ ଯାଞ୍ଚ ଆରମ୍ଭ କରିବା ସହ ଇଣ୍ଡିଗୋକୁ ତାଗିଦା କରିଛି।

Powered by Froala Editor