ଭୁବନେଶ୍ବର: ଯାଜପୁର ଜିଲାରେ ୩୬ ସୁଭଦ୍ରା ହିତାଧିକାରୀଙ୍କୁ ବଞ୍ଚି ଥାଉ ଥାଉ ସରକାରୀ ବାବୁମାନେ ମାରି ଦେଇଥିବା ଚର୍ଚ୍ଚା ହେଉଛି। ରାଖି ପୂର୍ଣ୍ଣିମାରେ ରାଜ୍ୟର ୧ କୋଟି ମହିଳାଙ୍କୁ ସୁଭଦ୍ରା ଯୋଜନା ତୃତୀୟ କିସ୍ତି ଟଙ୍କା ମିଳିଛି। କୋରେଇ ବ୍ଲକ୍‌ର ୩୪ ହଜାର ମହିଳା ଏହି କିସ୍ତି ପାଇଛନ୍ତି। କେତେଜଣ ହିତାଧିକାରୀଙ୍କ ନାଁ ତୃତୀୟ କିସ୍ତି ବେଳକୁ ତାଲିକାରୁ କଟିଯାଇଛି। ବ୍ଲକ୍‌ରେ ମୋଟ ୩୫, ୮୨୩ ଜଣଙ୍କୁ ସୁଭଦ୍ରା ଯୋଜନାର ପ୍ରଥମ କିସ୍ତି ଏବଂ ଦ୍ବିତୀୟ କିସ୍ତି ୩୪, ୭୮୩ ଜଣଙ୍କୁ ମିଳିଥିଲା। ବିଭିନ୍ନ କାରଣରୁ ୧୭୨୦ ଜଣଙ୍କ ନାଁ ଯାଞ୍ଚ ବେଳେ କଟିଥିଲା। ୨୧ଜଣ ମହିଳା ନିଜ ଇଚ୍ଛାରେ ଯୋଜନାରୁ ଓହରି ଯାଇଥିଲେ। ଚଳିତ ଅଗଷ୍ଟ ୯ ତାରିଖରେ ପୂର୍ବରୁ ଦୁଇଟି କିସ୍ତି ପାଇଥିବା ସମସ୍ତ ହିତାଧିକାରୀଙ୍କ ଆକାଉଣ୍ଟକୁ ତୃତୀୟ କିସ୍ତି ଟଙ୍କା ଆସିଥିବାବେଳେ ୪୧ ଜଣଙ୍କ ପାଖକୁ ଆସି ନଥିଲା। ଏହି ମହିଳାମାନେ ସୁଭଦ୍ରା ପୋର୍ଟାଲ ଯାଞ୍ଚ କରିବାପରେ ସେମାନଙ୍କୁ ମୃତ ଦର୍ଶାଯାଇଥିବା ଦେଖିଥିଲେ। ଏମାନଙ୍କ ମଧ୍ୟରୁ ୯ଜଣ ବ୍ୟାସନଗର ପୌରାଞ୍ଚଳର ହୋଇଥିବା ବେଳେ ୩୨ଜଣ କୋରେଇ ବ୍ଲକ୍‌ ଅଞ୍ଚଳର।

ଘଟଣାକୁ ନେଇ ହିତାଧିକାରୀମାନେ ବ୍ଲକ ମହିଳା ଶିଶୁ ସମନ୍ବିତ ବିଭାଗରେ ଅଭିଯୋଗ କରିବା ପରେ ବିଭାଗ ପକ୍ଷରୁ ଖୋଳତାଡ଼ ଆରମ୍ଭ ହୋଇଥିଲା। ତଦନ୍ତ ପରେ କୋରେଇ ବ୍ଲକ୍‌ର ୩ ଏବଂ ବ୍ୟାସନଗର ପୌରାଞ୍ଚଳର ୨ ହିତାଧିକାରୀଙ୍କ ମୃତ୍ୟୁ ହୋଇଥିବା ଜଣାପଡ଼ିଥିଲା। ବ୍ଲକ୍‌ର ମୃତ ହିତାଧିକାରୀ ହେଲେ ପଥରପଦା ପଞ୍ଚାୟତର ରଙ୍ଗେଇ ମୁଣ୍ତା, ମୂଳାପାଳ ପଞ୍ଚାୟତର ଆରତୀ ପାଲ୍‌ ଓ ତାରାକୋଟ ପଞ୍ଚାୟତର ଶାନ୍ତି ମଳିକ। ବାକି ୩୬ ଜଣ ବଞ୍ଚିଥିଲେ ମଧ୍ୟ ସେମାନଙ୍କୁ ପୋର୍ଟାଲରେ ମୃତ ଦର୍ଶାଯାଇଛି ବୋଲି ସିଡିପିଓ ଶାନ୍ତିଲତା ବେଶ୍ରା କହିଛନ୍ତି। 

Powered by Froala Editor