ନୂଆଦିଲ୍ଲୀ:ବିଶ୍ଵର ଏକ ନମ୍ବର ଧନୀ ଏଲନ ମସ୍କ ଏବଂ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମଧ୍ୟରେ କଳି ଦିନକୁ ଦିନ ବଢ଼ିବା‌ରେ ଲାଗିଛି। ମସ୍କଙ୍କୁ ବରବାଦ କରିଦେବା ଲାଗି ଟ୍ରମ୍ପ ଧମକ ଦେବା ପରେ ମସ୍କଙ୍କ ବାପା ଏରୋଲ ମସ୍କ ଚିନ୍ତିତ ହୋଇପଡ଼ିଛନ୍ତି। ତେବେ ବର୍ତ୍ତମାନ ମସ୍କ ଏବଂ ଟ୍ରମ୍ପଙ୍କ କଳି ମଝିରେ ପଶିଛି ରୁଷ। ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ଉଭୟଙ୍କ ବିବାଦରେ ମଧ୍ୟସ୍ଥତା କରିବାକୁ ଆଗ୍ରହ ପ୍ରକାଶ କରିବା ସହିତ ମସ୍କଙ୍କୁ ରୁଷରେ ଶରଣ ନେବାକୁ ପ୍ରସ୍ତାବ ଦେଇଛନ୍ତି।

ପୁଟିନ କହିଛନ୍ତି, ଯଦି ଏଲନ ମସ୍କ ରୁଷରେ ରାଜନୈତିକ ଶରଣ ନେବାକୁ ଚାହୁଁଛନ୍ତି ତେବେ ଆମେ ପ୍ରସ୍ତୁତ ଅଛୁ। ରୁଷର ଏହି ପ୍ରସ୍ତାବ ପରେ ମସ୍କଙ୍କ ପିତା ଏରୋଲ ରୁଷ ଗସ୍ତ କରିଛନ୍ତି। ସେ ଭାରତରୁ ସିଧାସଳଖ ରୁ‌ଷ ଯାଇଛନ୍ତି। ଏରୋଲ ମସ୍କୋରେ ପହଞ୍ଚିବା ପରେ ତାଙ୍କୁ ଭବ୍ୟସ୍ଵାଗତ କରାଯାଇଛି। ଏରୋଲ ରୁଷରେ ପହଞ୍ଚିବା ପରେ ପୁଟିନଙ୍କୁ ଖୁବ୍‌ ପ୍ରଶଂସା କରିବା ସହିତ ପୁଟିନ ଜଣେ ପ୍ରଭାବଶାଳୀ ବ୍ୟକ୍ତି ବୋଲି କହିଥିଲେ।

ସୂଚନାଯୋଗ୍ୟ, ଟ୍ରମ୍ପଙ୍କ ଟିକସ ବିଲକୁ ମସ୍କ ବିରୋଧ କରି ଟ୍ରମ୍ପ ପ୍ରଶାସନରୁ ଇସ୍ତଫା ଦେଇଥିଲେ। ଏହା ପରଠାରୁ ଟ୍ରମ୍ପ ଏବଂ ମସ୍କଙ୍କ ମଧ୍ୟରେ ବାକ୍‌ଯୁଦ୍ଧ ଲାଗି ରହିଛି। ମସ୍କ ରାଜନୈତିକ ଦଳ ଗଠନ କରିବା ନେଇ ଘୋଷଣା କରିବା ପରେ ଟ୍ରମ୍ପ ଅଧିକ ବିରକ୍ତ ହୋଇପଡ଼ିଛନ୍ତି। ମସ୍କ ଯଦି ବିରୋଧୀମାନଙ୍କୁ ଆର୍ଥିକ ସହାୟତା କରନ୍ତି, ତେବେ ସେ ତାଙ୍କୁ ବରବାଦ କରିଦେବେ ବୋଲି ଚେତାବନୀ ଦେଇଛନ୍ତି।

Powered by Froala Editor