ଭୁବନେଶ୍ବର/ବଲାଙ୍ଗିର: ଗୋଟିଏ ହାତରେ ପାକିସ୍ତାନ ନାଗରିକତା ପାସ୍‌ପୋର୍ଟ। ଆର ହାତରେ ଭାରତୀୟ ଭୋଟର୍‌ ପରିଚୟପତ୍ର ଓ ଆଧାର କାର୍ଡ। ଏଠାରେ ଭୋଟ୍‌ ଦେଉଛନ୍ତି। ନେତା, ସରକାର ନିର୍ବାଚିତ କରୁଛନ୍ତି। ଜମ୍ମୁକାଶ୍ମୀର ପହଲଗାଓଁରେ
ପର୍ଯ୍ୟଟକଙ୍କୁ ଆତଙ୍କବାଦୀଙ୍କ ହତ୍ୟା ପରେ କେନ୍ଦ୍ର ଗୃହ ମନ୍ତ୍ରଣାଳୟ ରାଜ୍ୟ ସରକାରଙ୍କୁ ପାକିସ୍ତାନୀ ନାଗରିକଙ୍କୁ ଦେଶାନ୍ତର କରିବାକୁ ନିର୍ଦ୍ଦେଶ ଦେଇଛି। ଏହିକ୍ରମରେ ବଲାଙ୍ଗିର ଜିଲା ସଦର କୁମ୍ଭାରପଡ଼ାରେ ରହୁଥିବା ସାରଦା କୁକରେଜା ଚିନ୍ତାରେ ପଡ଼ିଛନ୍ତି। ପାକିସ୍ତାନ ସହ ମୋର କୌଣସି ସଂପର୍କ ନାହିଁ। ପିଲା ଛୁଆ ପରିବାର ସବୁ ଭାରତୀୟ। ମୋତେ ପରିବାର ସହ ରହିବାକୁ ଦିଅ। ପାକିସ୍ତାନ ଯାଇ କେଉଁଠି ରହିବି, କ’ଣ କରିବି ? ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମୋ ଗୁହାରି ବୁଝନ୍ତୁ ବୋଲି ସାରଦା ନିବେଦନ କରିଛନ୍ତି।
ବଲାଙ୍ଗିର ସହର ଠିକାଦାରପଡ଼ା ନିକଟ କୁମ୍ଭାରପଡ଼ାରେ ମହେଶ କୁକରେଜା, ପତ୍ନୀ ସାରଦା, ପୁଅ-ବୋହୂ, ନାତି ନାତୁଣୀ ସହ ରୁହନ୍ତି। ସୂଚନା ଅନୁସାରେ, ସାରଦାଙ୍କ ବାପା ୭୦ ଦଶକରେ ପାକିସ୍ତାନର ସିନ୍ଧ୍ ପ୍ରଦେଶରୁ ଆସି କୋରାପୁଟରେ ରହିଥିଲେ। ସାରଦାଙ୍କ ୩ ଭାଇ ଓ ୩ ଭଉଣୀ। ବଲାଙ୍ଗିରର ମହେଶଙ୍କୁ ସାରଦା ବାଈ ବିବାହ କରିଥିଲେ। ଦୀର୍ଘ ୩୫ ବର୍ଷ ହେଲା ମହେଶ ଓ ସାରଦା କୁମ୍ଭାରପଡ଼ାର ବାସିନ୍ଦା। ତାଙ୍କର ପୁଅ ଗୋଲୁ, ବୋହୂ, ନାତି ନାତୁଣୀ ଅଛନ୍ତି। ଝିଅ ବିବାହିତ। ଭାରତ ଆସିବା ପରେ କେବେ ବି ପାକିସ୍ତାନ ଯାଇ ନଥିବା ଓ ସଂପର୍କୀୟଙ୍କ ବିଷୟରେ ଜାଣି ନଥିବା ସାରଦା କହିଛନ୍ତି। ଭାରତୀୟ ଭୋଟର୍‌ ପରିଚୟପତ୍ର ଓ ଆଧାର କାର୍ଡ ତାଙ୍କ ପାଖରେ ଥିଲେ ବି ତାଙ୍କୁ ଭାରତୀୟ ନାଗରିକତ୍ୱ ମିଳିପାରି ନାହିଁ। ପୁଅ ଗୋଲୁଙ୍କ କହିବା ଅନୁସାରେ, ଆମେ ଭାରତୀୟ। ସବୁ ବର୍ଷ ମା’ଙ୍କ ଭାରତୀୟ ନାଗରିକତା ପାଇଁ ଆବେଦନ କରୁଥିଲେ ବି ତାହା ଗ୍ରହଣୀୟ ହେଉ ନାହିଁ। ମା’ଙ୍କର ପାକିସ୍ତାନ ସହିତ କୌଣସି ସମ୍ପର୍କ ନାହିଁ। ସେଠାରେ କେହି ସମ୍ପର୍କୀୟ ନଥିବା କହିଛନ୍ତି। ଆଉ ସାରଦା କହିଛନ୍ତି ଯେ, ପାକିସ୍ତାନ ପଠାଇଲେ କ’ଣ କରିବି। ମୋତେ ଭାରତରେ ଓ ମୋ ପରିବାର ସହ ରହିବାକୁ ଅନୁମତି ଦିଅନ୍ତୁ।
ସେହିପରି ଭୁବନେଶ୍ବରର ବଡ଼ଗଡ଼ ଥାନା ଅଞ୍ଚଳରେ ରହୁଥିବା ଉକ୍ତ ପାକିସ୍ତାନୀ ମହିଳା ହେଲେ ନଗମା ୟୁସୁଫ୍‌। ତାଙ୍କ ସ୍ୱାମୀ ହେଲେ ମହମ୍ମଦ ନିଜାମ ଉଦ୍ଦିନ। ନିଜାମ ବ୍ୟବସାୟ କରି ପରିବାର ପୋଷଣ କରନ୍ତି। ତାଙ୍କ ଘରେ ପୁଲିସ ପହଞ୍ଚି ନୋଟିସ ଜାରି କରିଛି। ୪୮ ଘଣ୍ଟା ମଧ୍ୟରେ ଭାରତ ଛାଡ଼ିବାକୁ ପୁଲିସ ତାଙ୍କୁ ତାଗିଦ କରିଛି। ସମ୍ପୃକ୍ତ ପାକିସ୍ତାନୀ ମହିଳା ଦୀର୍ଘ ମିଆଦି ଭିସାରେ ୨୦୦୮ରୁ ଭୁବନେଶ୍ବର ଆସିଥିଲେ। ଜଣେ ଓଡ଼ିଶାର ଯୁବକଙ୍କୁ ବିବାହ କରିବା ସହ ସେ ଏଠାରେ ରହୁଥିଲେ। ସମ୍ପୃକ୍ତ ପାକିସ୍ତାନୀ ମହିଳାଙ୍କ ଭିସା ଅବଧି ୨୦୨୪ରେ ଶେଷ ହୋଇଯାଇଛି। ଏକଜିଟ୍ ଭିସା ପାଇଁ ସେ କମିସନରେଟ ପୁଲିସ ନିକଟରେ ଆବେଦନ କରିଥିଲେ। ତାଙ୍କ ଆବେଦନ ପଡି ରହିଥିଲା। ସମ୍ପୃକ୍ତ ପାକିସ୍ତାନୀ ମହିଳାଙ୍କୁ ଭୁବନେଶ୍ବର ଛାଡି ଯିବା ପାଇଁ କମିସନରେଟ ପୁଲିସ ନୋଟିସ କରିଛି। ଏବେ ଜରୁରୀକାଳୀନ ପରିସ୍ଥିତ ସୃଷ୍ଟି ହୋଇଛି, ଏହି ପରିସ୍ଥିତିକୁ ସମସ୍ତେ ବୁଝିବା ଦରକାର ଅଛି, ସରକାର ଯାହା ଉଚିତ୍ ମନେକରିଛନ୍ତି, ଆମର କୌଣସି ଆପତ୍ତି ନାହିଁ। ଆମେ ସରକାରଙ୍କ ସହ ଅଛୁ ବୋଲି ସ୍ବାମୀ ନିଜାମ୍ ଉଦ୍ଦିନ ଗଣମାଧ୍ୟମ ସମ୍ମୁଖରେ କହିଛନ୍ତି।
ପ୍ରକାଶ ଯେ, ଗତ ୨୨ ପହଲଗାଓଁ ନରସଂହାର ପରେ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ ଦେଶରେ ଥିବା ପାକିସ୍ତାନୀଙ୍କୁ ଦେଶ ଛାଡ଼ିବା ପାଇଁ ନୋଟିସ୍ ଦେବାକୁ ଘୋଷଣା କରିଥିଲେ। ରାଜ୍ୟ ଗୃହ ବିଭାଗ ନିର୍ଦେଶରେ ବଲାଙ୍ଗିର ପୁଲିସ ମୁଖ୍ୟାଳୟରୁ ସାରଦାଙ୍କୁ ଦେଶାନ୍ତର ପାଇଁ ନୋଟିସ୍‌ ପ୍ରଦାନ କରାଯାଇଛି। ତାଙ୍କର ଦୀର୍ଘ ମିଆଦୀ ଭିସା ରଦ୍ଦ କରାଯାଇଛି। ତୁରନ୍ତ ଦେଶ ଛାଡ଼ିବାକୁ କୁହାଯାଇଛି। ନୋଟିସ୍‌ର ନିର୍ଦ୍ଦେଶ ପାଳନ ନକଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଚେତାବନୀ ମିଳିଛି। ଯାହାକୁ ନେଇ ବଲାଙ୍ଗିରରେ ରହି ଆସୁଥିବା ସାରଦା ଓ ପରିବାର ଚିନ୍ତାରେ ପଡ଼ିଛନ୍ତି। ଉଲ୍ଲେଖଯୋଗ୍ୟ, କେନ୍ଦ୍ର ଗୃହ ମନ୍ତ୍ରୀ ଶ୍ରୀ ଶାହଙ୍କ ନିର୍ଦ୍ଦେଶ ପରେ ରାଜ୍ୟରେ ୧୨ ଜଣ ପାକିସ୍ତାନ ନାଗରିକ ଥିବା ସରକାରୀ ଭାବେ ଚିହ୍ନଟ ହୋଇଛନ୍ତି। ଭୁବନେଶ୍ୱରରେ ଜଣେ ପାକିସ୍ତାନୀ ମହିଳା ଜଣେ ଓଡ଼ିଆଙ୍କୁ ବିବାହ କରି ରହିଛନ୍ତି। ତାଙ୍କର ଭିସା ଅବଧି ୨୦୨୪ରେ ସମାପ୍ତ ହୋଇଥିବା ଜଣାପଡ଼ିଛି।
ଓଡ଼ିଶାରେ ୧୨ ଜଣ ପାକିସ୍ତାନୀ ନାଗରିକ ରହିଥିବା ଜଣାପଡ଼ିଛି। ଦୀର୍ଘକାଳୀନ ଭିସାରେ ଏହି ପାକିସ୍ତାନୀ ଓଡ଼ିଶାରେ ଅଛନ୍ତି। ଗୃହ ମନ୍ତ୍ରଣାଳୟର ନିର୍ଦେଶ ପରେ ସେମାନଙ୍କୁ ଭାରତ ଛାଡ଼ିବାକୁ ନୋଟିସ୍ ଦେବା ପ୍ରକ୍ରିୟା ଆରମ୍ଭ ହୋଇଛି। ପହଲଗାଓଁ ଆତଙ୍କବାଦୀ ଆକ୍ରମଣ ଘଟଣା ‌ପରେ ଭାରତର ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରି ଭିସା ବାତିଲ ସହ ସାର୍କ ଭିସାରେ ଥିବା ପାକିସ୍ତାନ ନାଗରିକଙ୍କୁ ୪୮ ଘଣ୍ଟାରେ ଭାରତ ଛାଡ଼ିବାକୁ ମହଲତ୍ ଦିଆଯାଇଥିଲା। ମେଡିକାଲ ଭିସାରେ ଥିବା ନାଗରିକଙ୍କୁ ଏପ୍ରିଲ ୨୯ ସୁଦ୍ଧା ଭାରତ ଛାଡିବାକୁ କୁହାଯାଇଛି। ସମସ୍ତ ପାକିସ୍ତାନୀ ନାଗରିକଙ୍କୁ ଚିହ୍ନଟ କରାଯାଇଥିବା ଜଣାପଡ଼ିଛି।

Powered by Froala Editor