ମଧ୍ୟପ୍ରାଚ୍ୟରେ ଲାଗିରହିଥିବା ଯୁଦ୍ଧ ପରିସ୍ଥିତି ମଧ୍ୟରେ ଦେଶବାସୀଙ୍କୁ ଏକଜୁଟ ହେବାକୁ ବଡ଼ ଆହ୍ୱାନ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ପ୍ରଧାନମନ୍ତ୍ରୀ ଦେଇଥିବା ପରାମର୍ଶ ଗୁଡିକ ହଉଛି, ବିଦେଶ ଯାତ୍ରା ଓ ସୁନା କିଣା: ଅତିକମରେ ବର୍ଷେ ପର୍ଯ୍ୟନ୍ତ ବିଦେଶ ଯାତ୍ରାରୁ ନିବୃତ୍ତ ରୁହନ୍ତୁ ଏବଂ ସୁନା ଗହଣା କିଣନ୍ତୁ ନାହିଁ। ପେଟ୍ରୋଲ ଓ ଡିଜେଲର ବ୍ୟବହାର ଯଥାସମ୍ଭବ କମ କରନ୍ତୁ। ଇନ୍ଧନ ଉପରେ ନିର୍ଭରଶୀଳତା କମାଇବା ପାଇଁ ବିଦ୍ୟୁତ ଚାଳିତ ଗାଡ଼ି (EV) ବ୍ୟବହାର କରନ୍ତୁ। 

ରବିବାର ହାଇଦରାବାଦରେ ଏକ ସାଧାରଣ ସଭାକୁ ସମ୍ବୋଧିତ କରି ସେ କହିଛନ୍ତି ଯେ, କେବଳ ସୀମାରେ ଲଢ଼େଇ କରିବା ଦେଶପ୍ରେମ ନୁହେଁ, ବରଂ ଦେଶର ଅର୍ଥନୀତିକୁ ସୁଦୃଢ଼ କରିବା ପାଇଁ ସମ୍ବଳର ସଞ୍ଚୟ କରିବା ମଧ୍ୟ ଏକ ବଡ଼ ଦେଶଭକ୍ତି। ପ୍ରଧାନମନ୍ତ୍ରୀ କହିଛନ୍ତି ଯେ କରୋନା ମହାମାରୀ ସମୟରେ ଆମେ ଘରେ ରହି କାମ କରିବା (ୱାର୍କ ଫ୍ରମ ହୋମ) ଏବଂ ଅନଲାଇନ୍ ମିଟିଂ କରିବାରେ ଅଭ୍ୟସ୍ତ ହୋଇଥିଲେ। ବର୍ତ୍ତମାନର ପରିସ୍ଥିତିକୁ ଦୃଷ୍ଟିରେ ରଖି ଯଦି ଆମେ ପୁଣି ଥରେ ୱାର୍କ ଫ୍ରମ୍ ହୋମ୍‌କୁ ପ୍ରାଧାନ୍ୟ ଦେବା, ତେବେ ଯାତାୟାତ ପାଇଁ ଖର୍ଚ୍ଚ ହେଉଥିବା ପେଟ୍ରୋଲ ଓ ଡିଜେଲ ବଞ୍ଚିପାରିବ।

ସେହିଭଳି ଅଫିସ୍ ଯାତାୟାତ କମାଇବା ପାଇଁ 'ୱାର୍କ ଫ୍ରମ୍ ହୋମ୍', ଭର୍ଚୁଆଲ୍ ମିଟିଂ ଏବଂ ଅନଲାଇନ କନଫରେନ୍ସିଂକୁ ପ୍ରାଥମିକତା ଦିଅନ୍ତୁ। ଦୈନନ୍ଦିନ ଖାଦ୍ୟରେ ତେଲ ବ୍ୟବହାର କମ କରନ୍ତୁ। କୃଷି କ୍ଷେତ୍ରରେ ରାସାୟନିକ ସାର ବଦଳରେ ଜୈବିକ ପଦ୍ଧତି ଆପଣାଇବାକୁ ସେ ଗୁରୁତ୍ୱ ଦେଇଛନ୍ତି। ସାମଗ୍ରୀ ପଠାଇବା ପାଇଁ ସଡ଼କ ପଥ ପରିବର୍ତ୍ତେ ରେଲୱେ ଗୁଡ୍ସ ଟ୍ରେନର ସହାୟତା ନେବାକୁ କହିଛନ୍ତି।

Powered by Froala Editor