୨୦୨୭ ଏପ୍ରିଲ୍ ୧ରୁ ପ୍ଲାଷ୍ଟିକ୍ ନୋଟ୍ ଟ୍ରାଏଲ୍ ଆରମ୍ଭ
ଭାରତରେ ୧୦ ଓ ୨୦ ଟଙ୍କିଆ ପ୍ଲାଷ୍ଟିକ୍ ନୋଟ୍ର ପରୀକ୍ଷାମୂଳକ ପ୍ରଚଳନ ପାଇଁ ପ୍ରସ୍ତୁତି ଚାଲିଛି। ଏଥିପାଇଁ ଭାରତୀୟ ରିଜର୍ଭ ବ୍ୟାଙ୍କ (RBI) ପକ୍ଷରୁ ଯୋଜନା କରାଯାଉଥିବା ବେଳେ ୨୦୨୭ ଏପ୍ରିଲ୍ ୧ରୁ ଏହାର ଟ୍ରାଏଲ୍ ଆରମ୍ଭ ହୋଇପାରେ ବୋଲି ରିପୋର୍ଟରେ ଦାବି କରାଯାଇଛି।
ତେବେ ପୂର୍ବରୁ ପ୍ରଚଳିତ କାଗଜ ନୋଟ୍ର ଲମ୍ବ ଓ ଚଉଡ଼ା ଯେମିତି ରହିଛି, ପ୍ଲାଷ୍ଟିକ୍ ନୋଟ୍ର ଆକାର ମଧ୍ୟ ସେହିଭଳି ରଖିବାକୁ ଯୋଜନା ରହିଛି। ପ୍ଲାଷ୍ଟିକ୍ ନୋଟ୍ର ଆକାର ପୁରୁଣା ନୋଟ୍ ଭଳି ରଖିବା ପଛରେ ରହିଛି ଏକ ବଡ଼ କାରଣ। ATM ମେସିନ୍ରେ ନୋଟ୍ର ଆକାର ଅନୁସାରେ ଟଙ୍କା ରଖିବା ବ୍ୟବସ୍ଥା, ସେନ୍ସର ଓ ଅନ୍ୟାନ୍ୟ ଯାନ୍ତ୍ରିକ ସୁବିଧା ରହିଥାଏ।
ଯଦି ନୂଆ ନୋଟ୍ର ଆକାର ବଦଳିଯାଏ, ତେବେ ATM ମେସିନ୍ରେ ମଧ୍ୟ ପରିବର୍ତ୍ତନ କରିବାକୁ ପଡ଼ିପାରେ। ଏଥିପାଇଁ ବ୍ୟାଙ୍କଗୁଡ଼ିକୁ ଅଧିକ ଅର୍ଥ ଖର୍ଚ୍ଚ କରିବାକୁ ହେବ। ମନିକଣ୍ଟ୍ରୋଲ୍ର ଏକ ରିପୋର୍ଟ ଅନୁସାରେ, ଏହି ଖର୍ଚ୍ଚ କମାଇବା ପାଇଁ RBI ନୋଟ୍ର ଲମ୍ବ ଓ ଚଉଡ଼ା ପୂର୍ବଭଳି ରଖିବାକୁ ଯୋଜନା କରୁଛି।
ତେବେ ନୋଟ୍ର ଆକାର ନ ବଦଳିବା ଦ୍ୱାରା ପ୍ରାରମ୍ଭିକ ପର୍ଯ୍ୟାୟରେ ପ୍ରାୟ ୨୧.୨୫ କୋଟି ଟଙ୍କାର ଖର୍ଚ୍ଚ ବଞ୍ଚିପାରିବ ବୋଲି ଜଣେ ଅଧିକାରୀ ଆକଳନ କରିଛନ୍ତି। ପ୍ରଥମ ପର୍ଯ୍ୟାୟରେ ପ୍ଲାଷ୍ଟିକ୍ ନୋଟ୍ଗୁଡ଼ିକୁ ATM ବଦଳରେ ବ୍ୟାଙ୍କ ଶାଖାର କାଉଣ୍ଟରରୁ ମଧ୍ୟ ଦିଆଯାଇପାରେ।
ପୂର୍ବରୁ ୧୦୦ ଓ ୨୦୦ ଟଙ୍କିଆ ନୂଆ ନୋଟ୍ ଆସିବା ସମୟରେ ଦେଶର ପ୍ରାୟ ୨.୪ ଲକ୍ଷ ATM ମେସିନ୍ରେ ପରିବର୍ତ୍ତନ କରିବାକୁ ପଡ଼ିଥିଲା। ଏଥିପାଇଁ ATM ଶିଳ୍ପକୁ ପ୍ରାୟ ୧୦୦ କୋଟି ଟଙ୍କା ଖର୍ଚ୍ଚ କରିବାକୁ ପଡ଼ିଥିଲା ବୋଲି ରିପୋର୍ଟରେ ଉଲ୍ଲେଖ ରହିଛି।
Powered by Froala Editor
