ନ୍ୟୁୟର୍କ: ମାନବାଧିକାର ପ୍ରସଙ୍ଗରେ ଜାତିସଂଘର ମାନବାଧିକାର ପରିଷଦ ଦ୍ବୈତ ମାନଦଣ୍ଡ ଆପଣାଉଥିବା ଅଭିଯୋଗ ଆଣିଛି ଭାରତ। ଯଦି ନିଜର ବିଶ୍ୱସନୀୟତା ଓ ପ୍ରତିଷ୍ଠା ବଞ୍ଚାଇବାକୁ ଚାହୁଁଛ, ତେବେ ସମସ୍ତ ଦେଶ ପ୍ରତି ସମାନ ମାନଦଣ୍ଡ ଆପଣାଅ, ମାନବାଧିକାରକୁ ରାଜନୈତିକ ଅସ୍ତ୍ର ଭାବେ ବ୍ୟବହାର କରିବା ବନ୍ଦ କର ବୋଲି ଜାତିସଂଘ ସାଧାରଣ ସଭାରେ ଭାରତ ତରଫରୁ ସ୍ପଷ୍ଟ କରି ଦିଆଯାଇଛି।

ନ୍ୟୁୟର୍କରେ ଜାତିସଂଘ ସାଧାରଣ ସଭାରେ ମାନବାଧିକାର ପରିଷଦର ରିପୋର୍ଟ ଉପରେ ଆଲୋଚନା ବେଳେ ଭାରତ ପକ୍ଷରୁ ଏହି ମତ ରଖିଥିଲେ ଜାତିସଂଘରେ ଭାରତୀୟ ସ୍ଥାୟୀ ମିଶନର ପ୍ରଥମ ସଚିବ ଭାବିକା ମଙ୍ଗଳାନନ୍ଦନ। ସେ କହିଥିଲେ, କୌଣସି ଦେଶକୁ ଆଲୋଚନାରେ ସାମିଲ ନକରି ତା’ ବିରୋଧରେ ଏକପାଖିଆ ନିର୍ଦ୍ଦେଶ ଜାରି କଲେ ତୃଣମୂଳ ସ୍ତରରେ କୌଣସି ପରିବର୍ତ୍ତନ ଆସିବ ନାହିଁ, ବରଂ ଏହାଦ୍ୱାରା ପରିଷଦ ମଧ୍ୟରେ ମତଭେଦ ବଢ଼ିବ। ଭାରତ କହିଛି ମାନବାଧିକାରର ସୁରକ୍ଷା ପାଇଁ ଦେଶଗୁଡ଼ିକୁ ଟାର୍ଗେଟ କରିବା କିମ୍ବା ନିର୍ଦ୍ଦିଷ୍ଟ ଦେଶ ପ୍ରତି ଭିନ୍ନ ମାନଦଣ୍ଡ ଆପଣାଇବା ଉଚିତ୍ ନୁହେଁ। ଏହା ବଦଳରେ ପାରସ୍ପରିକ ଆଲୋଚନା, ସହଯୋଗ, କ୍ଷମତା ବିକାଶ ଏବଂ ପ୍ରକୃତ ସହଭାଗିତା ମାଧ୍ୟମରେ ମାନବାଧିକାରର ସୁରକ୍ଷା ହେବା ଆବଶ୍ୟକ। ଏଥିସହ ଭାରତ ମାନବାଧିକାର ଆଲୋଚନା ପାଇଁ ୟୁନିଭର୍ସାଲ୍ ପିରିୟଡିକ୍ ରିଭ୍ୟୁ କିମ୍ବା ୟୁପିଆରକୁ ଏକ ଉପଯୁକ୍ତ ମଞ୍ଚ ବୋଲି କହିଛି। କାରଣ ଏହି ବ୍ୟବସ୍ଥାରେ ଜାତିସଂଘର ସମସ୍ତ ସଦସ୍ୟ ଦେଶର ମାନବାଧିକାର ରେକର୍ଡର ସମୀକ୍ଷା କରାଯାଏ। ଏଠାରେ ପ୍ରତ୍ୟେକ ଦେଶକୁ ସମାନ ଭାବରେ ବିଚାର କରାଯାଏ ଏବଂ ଆଲୋଚନା ମାଧ୍ୟମରେ ସୁଧାର ଉପରେ ଗୁରୁତ୍ୱ ଦିଆଯାଏ। ଚଳିତ ବର୍ଷ ଭାରତ ସପ୍ତମ ଥର ପାଇଁ ମାନବାଧିକାର ପରିଷଦର ସଦସ୍ୟ ହୋଇଛି।
ସେହିପରି ଆତଙ୍କବାଦକୁ ମାନବାଧିକାର ପାଇଁ ଏକ ଗମ୍ଭୀର ବିପଦ ବୋଲି ବର୍ଣ୍ଣନା କରିଛି ଭାରତ। ଆତଙ୍କବାଦ ବିରୋଧରେ ଶୂନ୍ୟ ସହନଶୀଳତା ନୀତି ଆପଣାଇବାକୁ ପରିଷଦକୁ ଆହ୍ୱାନ ଦେଇଛି। ଭାରତ ଆହୁରି କହିଛି, ମାନବାଧିକାର ମଧ୍ୟରେ କେବଳ ନାଗରିକ ଓ ରାଜନୈତିକ ଅଧିକାର ନୁହେଁ, ବରଂ ଆର୍ଥିକ, ସାମାଜିକ, ସାଂସ୍କୃତିକ ଏବଂ ବିକାଶର ଅଧିକାରକୁ ମଧ୍ୟ ସମାନ ଗୁରୁତ୍ୱ ମିଳିବା ଦରକାର।

ଏହି ସମସ୍ୟାର ସମାଧାନ ଚାପ ନୁହେଁ, ବରଂ ଅନ୍ତର୍ଜାତୀୟ ସହଯୋଗ ମାଧ୍ୟମରେ ସମ୍ଭବ।ଏହା ସହ ମାନବାଧିକାର ପରିଷଦର କାର୍ଯ୍ୟରେ ସ୍ୱଚ୍ଛତା, ସଦସ୍ୟ ଦେଶଙ୍କ ନେତୃତ୍ୱରେ ସଂସ୍କାର ଏବଂ ଜାତିସଂଘର ନିୟମିତ ବଜେଟରୁ ପର୍ଯ୍ୟାପ୍ତ ପାଣ୍ଠି ଯୋଗାଇବାକୁ ମଧ୍ୟ ଭାରତ ଦାବି କରିଛି।

Powered by Froala Editor