ଦିଲ୍ଲୀ ନିକଟସ୍ଥ ଗାଜିଆବାଦରେ ଜଣେ ରିଅଲ୍ ଇଷ୍ଟେଟ୍ ଡିଲର ବୁଧବାର ତାଙ୍କ ପତ୍ନୀଙ୍କୁ ଗୁଳି କରି ହତ୍ୟା କରିବା ପରେ ନିଜେ ଆତ୍ମହତ୍ୟା କରିଛନ୍ତି। ତାଙ୍କ ମୃତ୍ୟୁ ପରେ ମିଳିଥିବା ସୁଇସାଇଡ୍‌ ନୋଟ୍‌ରେ ଉଲ୍ଲେଖ କରାଯାଇଛି ଯେ ସେ ଅଯଥାରେ ଟଙ୍କା ନ‌ଷ୍ଟ କରିବାକୁ ଚାହାନ୍ତି ନାହିଁ ବୋଲି ଏପରି ଚରମ ନଷ୍ପତ୍ତି ନେଇଛନ୍ତି।

କୁଲଦୀପ ତ୍ୟାଗୀ (୪୬) ଏକ ଆତ୍ମହତ୍ୟା ନୋଟ୍ ଛାଡ଼ିଥିଲେ, ଯେଉଁଥିରେ ସେ ଲେଖିଥିଲେ ଯେ, ”ତାଙ୍କୁ କ୍ୟାନସର ରୋଗ ହୋଇଛି ଏବଂ ସେ ଚିକିତ୍ସା ଉପରେ ଟଙ୍କା ନଷ୍ଟ କରିବାକୁ ଚାହୁଁନାହାଁନ୍ତି କାରଣ ସୁସ୍ଥ ହେବାର ସମ୍ଭାବନା ଅନିଶ୍ଚିତ। ନୋଟ୍‌ରେ ସେ ଆହୁରି ଲେଖିଥିଲେ ଯେ, ସେ ତାଙ୍କ ପତ୍ନୀ ଅଂଶୁ ତ୍ୟାଗୀଙ୍କୁ ହତ୍ୟା କରିଛନ୍ତି କାରଣ ସେମାନେ ଏକାଠି ରହିବାକୁ ଶପଥ ନେଇଥିଲେ।”

ପୋଲିସ ଅନୁଯାୟୀ, କୁଲଦୀପ ବୁଧବାର ସକାଳ ପ୍ରାୟ ୧୧ଟା ସମୟରେ ରାଜ ନଗର ଏକ୍ସଟେନସନର ରାଧା କୁଞ୍ଜ ସୋସାଇଟିରେ ଥିବା ତାଙ୍କ ଘରେ ଲାଇସେନ୍ସପ୍ରାପ୍ତ ରିଭଲଭର ସାହାଯ୍ୟରେ ତାଙ୍କ ପତ୍ନୀଙ୍କୁ ଗୁଳି କରି ହତ୍ୟା କରିଥିଲେ ଏବଂ ପରେ ନିଜକୁ ଗୁଳି କରିଥିଲେ। ଘଟଣା ସମୟରେ ତାଙ୍କ ପୁଅମାନେ ଘରେ ଉପସ୍ଥିତ ଥିଲେ ଏବଂ ଗୁଳିର ଶବ୍ଦ ଶୁଣି ସେମାନେ ତାଙ୍କ ପିତାମାତାଙ୍କ କୋଠରୀକୁ ଦୌଡ଼ି ଯାଇଥିଲେ। କୁଲଦୀପଙ୍କ ମୃତଦେହ ଚଟାଣରେ ଏବଂ ଅଂଶୁଙ୍କ ମୃତଦେହ ଶଯ୍ୟା ଉପରେ ମିଳିଥିଲା। ସେମାନଙ୍କୁ ନିକଟସ୍ଥ ହସ୍ପିଟାଲକୁ ନିଆଯାଇଥିଲା, ଯେଉଁଠାରେ ଡାକ୍ତରମାନେ ସେମାନଙ୍କୁ ମୃତ ଘୋଷଣା କରିଥିଲେ।

ବରିଷ୍ଠ ପୋଲିସ ଅଧିକାରୀ ପୂନମ ମିଶ୍ରା କହିଛନ୍ତି, “କୁଲଦୀପ ତ୍ୟାଗୀ ତାଙ୍କ ଲାଇସେନ୍ସପ୍ରାପ୍ତ ରିଭଲଭର ସାହାଯ୍ୟରେ ତାଙ୍କ ପତ୍ନୀଙ୍କୁ ଗୁଳି କରି ହତ୍ୟା କରିଥିଲେ ଏବଂ ପରେ ନିଜକୁ ଗୁଳି କରିଥିଲେ। ସେ ଚାହୁଁ ନଥିଲେ ଯେ ତାଙ୍କ ଚିକିତ୍ସା ପାଇଁ ଟଙ୍କା ଖର୍ଚ୍ଚ ହେଉ, ତେଣୁ ସେ ତାଙ୍କ ପତ୍ନୀଙ୍କୁ ଏବଂ ନିଜକୁ ହତ୍ୟା କରିବାକୁ ନିଷ୍ପତ୍ତି ନେଇଥିଲେ।

Powered by Froala Editor