ନୂଆଦିଲ୍ଲୀ : ବହୁ ଚର୍ଚ୍ଚିତ ୱାକଫ୍ ସଂଶୋଧନ ବିଧେୟକ ଆଜି ଲୋକସଭାରେ ଆଗତ କରାଯିବାକୁ ଦିନ ଧାର୍ଯ୍ୟ ହୋଇଛି। ବିଧେୟକ ଉପରେ ବିସ୍ତୃତ ଆଲୋଚନା ଲାଗି ୮ଘଣ୍ଟା ସମୟ ଧାର୍ଯ୍ୟ ହୋଇଛି। ଆଲୋଚନା ପରେ ବିଧେୟକ ଉପରେ ଭୋଟିଂ କରାଯିବ ବୋଲି ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ କହିଛନ୍ତି। ବିଧେୟକକୁ ଗୃହୀତ କରାଇବା ଲାଗି ସରକାର ଯୋଜନା କରିଥିବାରୁ ବିଜେପି ଏହାର ସମସ୍ତ ସାଂସଦଙ୍କୁ ଗୃହରେ ଉପସ୍ଥିତ ରହିବା ଲାଗି ହୁଇପ୍ ଜାରି କରିଛି। ବିଜେପିର ସହଯୋଗୀ ଦଳ ତଥା ଶାସକ ଏନଡିଏର ବିଭିନ୍ନ ଅଂଶୀଦାର ଦଳ ଯଥା ତେଲୁଗୁ ଦେଶମ ପାର୍ଟି , ଶିବସେନା, ଲୋକ ଜନଶକ୍ତି ପାର୍ଟି ନିଜ ନିଜ ସାଂସଦଙ୍କୁ ଲୋକସଭାରେ ବୁଧବାର ଉପସ୍ଥିତ ରହିବା ଲାଗି ହୁଇପ୍‌ ଜାରି କରିଛନ୍ତି। ଅନ୍ୟପଟେ ବିରୋଧୀ ଇଣ୍ଡି ମେଣ୍ଟ ବିଧେୟକକୁ ଗୃହୀତ କରାଇ ନଦେବା ଲାଗି ନିଜର ଯୋଜନା କରିଛି। ଏଥିପାଇଁ ମଙ୍ଗଳବାର ସନ୍ଧ୍ୟାରେ ଇଣ୍ଡି ମେଣ୍ଟର ଅଂଶୀଦାର ଦଳଗୁଡିକୁ ବୈଠକ ଅନୁଷ୍ଠିତ ହୋଇଛି। ବୈଠକରେ ବିରୋଧୀ ଦଳଗୁଡିକ ବିଧେୟକକୁ ବିରୋଧ କରିବା ଲାଗି ସର୍ବସମ୍ମତି କ୍ରମେ ନିଷ୍ପତ୍ତି ନେଇଛନ୍ତି। ‌ବିରୋଧୀ ଦଳଗୁଡିକ ବିଧେୟକ ବିରୋଧରେ ଭୋଟ ଦେବାର ଯୋଜନା କରିଛନ୍ତି। ଏଥିପାଇଁ କଂଗ୍ରେସ, ସମାଜବାଦୀ ପାର୍ଟି ସମେତ ବିଭିନ୍ନ ବିରୋଧୀ ଦଳ ନିଜ ନିଜର ସାଂସଦଙ୍କୁ ଗୃହରେ ଉପସ୍ଥିତ ରହିବା ଲାଗି ହୁଇପ୍ ଜାରି କରିଛନ୍ତି। ଲୋକସଭାରେ ଏନଡିଏର ୨୯୩ ସଦସ୍ୟ ଥିବାବେଳେ ଏହା ଗୃହୀତ ହେବାରେ କୌଣସି ସମସ୍ୟା ନାହିଁ। ରାଜ୍ୟସଭାରେ ମଧ୍ୟ ଏନଡିଏର ସଂଖ୍ୟା ଗରିଷ୍ଠତା ରହିଛି। ବୁଧବାର ୱାକଫ୍ ବିଧେୟକକୁ ଲୋକସଭାରେ ଗୃହୀତ କରାଇବା ପରେ ଗୁରୁବାର ଏହାକୁ ରାଜ୍ୟସଭାରେ ଆଗତ କରିବାକୁ ସରକାର ଯୋଜନା କରିଛନ୍ତି। କାରଣ ଗୁରୁବାର ରାଜ୍ୟସଭାରେ ଉପସ୍ଥିତ ରହିବା ଲାଗି ବିଜେପି ଏହାର ସାଂସଦଙ୍କୁ ହୁଇପ୍ ଜାରି କରିଛି। ୧୯୯୫ ୱାକଫ୍ ଆଇନର ପରିବର୍ତ୍ତନ କରିବା ଲାଗି ସରକାର ୱାକଫ୍ ସଂଶୋଧନ ବିଧେୟକ ପ୍ରସ୍ତୁତ କରିଛନ୍ତି। ଏହି ବିଧେୟକ ଗତବର୍ଷ ଅଗଷ୍ଟରେ ଲୋକସଭାରେ ଆଗତ କରାଯାଇଥିଲା। ବିଧେୟକ ଆଗତ ପରେ ଏହାକୁ ତର୍ଜମା ଲାଗି ଯୁଗ୍ମ ସଂସଦୀୟ କମିଟି କୁ ପଠାଯାଇଥିଲା। ବିଧେୟକ ଉପରେ ତର୍ଜମା ପୂର୍ବକ ଜେପିସି ଦେଇଥିବା ୧୪ଟି ସଂଶୋଧନ ପ୍ରସ୍ତାବକୁ ସରକାର ଅନୁମୋଦନ କରିଛନ୍ତି। ଏବେ ଏହି ସଂଶୋଧିତ ବିଧେୟକ ଲୋକସଭାରେ ଆଗତ କରାଯିବ।

Powered by Froala Editor