ନୂଆଦିଲ୍ଲୀ: ଭାରତୀୟ ବଂଶୋଦ୍ଭବ ତଥା ନାସା ମହାକାଶଚାରୀ ସୁନିତା ୱିଲିୟମ୍ସ ମହାକାଶରେ ୯ ମାସ ରହି ପୃଥିବୀ ପୃଷ୍ଠକୁ ପ୍ରତ୍ୟାବର୍ତ୍ତନ କରିବା ପରେ ତାଙ୍କୁ ପ୍ରଶଂସା କରିଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ। ରାଜ୍ୟ ବିଧାନସଭାରେ ମମତା ସୁନିତାଙ୍କୁ ପ୍ରଶଂସା କରିବା ସହିତ ଭାରତ ସରକାର ତାଙ୍କୁ ଦେଶର ସର୍ବୋଚ୍ଚ ପୁରସ୍କାର ‘ଭାରତ ରତ୍ନ’ ପ୍ରଦାନ କରିବାକୁ ଦାବି କରିଛନ୍ତି।

ବିଧାନସଭାରେ ମମତା କହିଥିଲେ, ମହାକାଶ ବିଜ୍ଞାନ କ୍ଷେତ୍ରରେ ମୋର ରୁଚି ରହିଛି। ସୁନିତା ମହକାଶରେ ଫଶିବା ପରେ ତାଙ୍କ ପ୍ରତ୍ୟାବର୍ତ୍ତନ ସମ୍ପର୍କିତ ଖବରକୁ ମୁଁ ବିଭିନ୍ନ ଉତ୍ସରୁ ନିରୀକ୍ଷଣ କରୁଥିଲି। ପ୍ରତିଦିନ ଏ ସମ୍ପର୍କିତ ତଥ୍ୟକୁ ଅନୁସରଣ କରୁଥିଲି। ସୁନିତା ଭାରତର ଝିଅ। ମହାକାଶ ଯାତ୍ରାରେ ତାଙ୍କ ନିଷ୍ଠାପରତା ପ୍ରଶଂସନୀୟ। ସୁନିତା ଏବଂ ବୁଚ୍‌ ୱିଲମୋର ପୃଥିବୀ ପୃଷ୍ଠକୁ ଫେରିବା ପରେ ଆମେ ବହୁତ ଖୁସି ଅନୁଭବ କରୁଛୁ। ସେମାନଙ୍କ ସାହସ ପ୍ରଶଂସାର ପାତ୍ର।

ସୂଚନାଯୋଗ୍ୟ, ଗତବର୍ଷ ଜୁନ ମାସରେ ସୁନିତା ଏବଂ ୱିଲମୋର ୮ ଦିନିଆ ମହାକାଶ ଯାତ୍ରା ଯାଇ ଅନ୍ତର୍ଜାତୀୟ ମହାକାଶ କେନ୍ଦ୍ରରେ ଓହ୍ଲାଇଥିଲେ। ହେଲେ ପ୍ରତ୍ୟାବର୍ତ୍ତନ କରିବାକୁ ଥିବା ଯାନରେ ତ୍ରୁଟି ଯୋଗୁ ସେମାନଙ୍କୁ ୯ ମାସ ଧରି ମହାକାଶରେ ରହିବାକୁ ପଡ଼ିଥିଲା। ଶେଷରେ ନାସାର ସ୍ପେଶଏକ୍ସ ଡ୍ରାଗନ ୯ ଯାନ ଦ୍ବାରା ସେମାନେ ପୃଥିବୀକୁ ଫେରିଥିଲେ।

Powered by Froala Editor