ଗେମ୍ରୁ ଟଙ୍କା ରୋଜଗାର ନିଶା, ଚାଲିଗଲା ଛାତ୍ରଙ୍କ ଜୀବନ
କମ୍ ସମୟରେ ଅଧିକ ରୋଜଗାର ଲୋଭରେ ପଡିଛନ୍ତି ଯୁବପିଢି । ଏଥିପାଇଁ ବିଭିନ୍ନ ଗେମ୍ର ସାହାରା ନେଉଛନ୍ତି । ହେଲେ ଏହି ଲୋଭ ଯେ ଜୀବନ ନେଇଯିବ ତାହା ଜାଣିପାରିଲେନି ୧୮ ବର୍ଷୀୟ ଇଞ୍ଜିନିୟରିଂ ଛାତ୍ର ପ୍ରତୀକ ସାହୁ ।
ପ୍ରତୀକଙ୍କ ଘର ଭଦ୍ରକ ଜିଲ୍ଲା ଭଣ୍ଡାରିପୋଖରୀ ଥାନା ନେରଡ଼ା ପଞ୍ଚାୟତ ପୁରିପଡ଼ା ଗ୍ରାମରେ । ସେ ଅସୁରାଳି ସ୍ଥିତ ଏକ ଘରୋଇ କଲେଜର ଡିପ୍ଲୋମା ଛାତ୍ର । ଅନଲାଇନ୍ ଗେମ୍ ଜାଲରେ ପଡ଼ି ଅର୍ଥ ଉପାର୍ଜନ ଲୋଭରେ ସାଙ୍ଗସାଥୀଙ୍କଠାରୁ କରଜ କରିବାକୁ ଲାଗିଥିଲେ । ଗତ ୨୦ ତାରିଖରେ ଛୁଟିରେ ଘରକୁ ଆସି ଗେମ୍ ଖେଳିଥିଲେ ପ୍ରତୀକ । ପ୍ରଥମେ ୨୦ ହଜାର ଟଙ୍କା ଦେଇଥିଲେ । ୫୦ ହଜାର ଲାଭ ହୋଇଛି ବୋଲି ହ୍ୟାକର୍ ପାଖରୁ ଖବର ଆସିଲା । ହେଲେ ଅତିରିକ୍ତ ୩୦ ହଜାର ଟଙ୍କା ଡିପୋଜିଟ୍ କଲେ ସମସ୍ତ ଅର୍ଥ ଫେରିପାଇବ ବୋଲି ହ୍ୟାକର୍ କହିଥିଲା । ନିଶାରେ ପଡ଼ିଯାଇଥିବା ପ୍ରତୀକ ସାଙ୍ଗଙ୍କ ପାଖରୁ ୩୦ ହଜାର ଟଙ୍କା କରଜ କରି ଡିପୋଜିଟ୍ କରିଥିଲେ । ମାତ୍ର ଅର୍ଥ ଫେରସ୍ତ ମିଳି ନଥିଲା କି କୌଣସି ଉତ୍ତର ମିଳି ନ ଥିଲା ।
ଏହା ପୂର୍ବରୁ ମଧ୍ୟ ପ୍ରତୀକ ବହୁ ଅର୍ଥ କରଜ କରିସାରିଥିଲେ । ଯେଉଁଥିପାଇଁ ମାନସିକ ଭାବେ ଚାପଗ୍ରସ୍ତ ହୋଇପଡିଥିଲେ । ପରେ ଘରେ ଥିବା ବିଷ ଖାଇ ଦେଇଥିଲେ । କିନ୍ତୁ ବିଷ ଖାଇବା ଆଗରୁ କାହାଠାରୁ କେତେ ଅର୍ଥ କରଜ ନେଇଥିଲେ ମୋବାଇଲ୍ରେ ଅଡିଓ କରି ସାଙ୍ଗମାନଙ୍କୁ ସେୟାର କରିଥିଲେ । ତାଙ୍କୁ ଗୁରୁତର ଅବସ୍ଥାରେ ପରିବାର ଲୋକେ ଏକ ଘରୋଇ ହସ୍ପିଟାଲରେ ଭର୍ତ୍ତି କରିଥିଲେ । ହେଲେ ଚିକିତ୍ସାଧୀନ ଅବସ୍ଥାରେ ପ୍ରତୀକଙ୍କ ମୃତ୍ୟୁ ଘଟିଛି ।
Powered by Froala Editor
