ଭୁବନେଶ୍ବର: ଉତ୍କଳ କେଶରୀ ଡ଼ଃ ହରେକୃଷ୍ଣ ମହତାବଙ୍କ ଉପରେ ନିର୍ମାଣ ହେବ ବାୟୋପିକ । ମହତାବଙ୍କ ସ୍ମୃତିକୁ ଉଜ୍ଜୀବିତ କରି ରଖିବା ପାଇଁ ଏହି ନିଷ୍ପତ୍ତି ନେଇଛନ୍ତି ରାଜ୍ୟ ସରକାର । ଆଜି ହରେକୃଷ୍ଣ ମହତାବଙ୍କ ୧୨୫ତମ ଜୟନ୍ତୀ ଅବସରରେ ଏହି ଘୋଷଣା କରିଛନ୍ତି ମୋହନ ସରକାର । ସେହିପରି ମହତାବଙ୍କ ସ୍ମୃତିକୁ ସାଇତି ରଖିବା ପାଇଁ ଭଦ୍ରକର ଅଗରପଡ଼ାରେ ଏକ ସ୍ମୃତି ସଂଗ୍ରହାଳୟ ନିର୍ମାଣ ହେବ ।
ଭୁବନେଶ୍ବର ସ୍ଥିତ ରବୀନ୍ଦ୍ର ମଣ୍ଡପ ଠାରେ ଓଡ଼ିଆ ଭାଷା, ସାହିତ୍ୟ ଏବଂ ସଂସ୍କୃତି ବିଭାଗ ତରଫରୁ ଆୟୋଜିତ ମହାନ ଜନନାୟକ 'ଉତ୍କଳ କେଶରୀ' ଡ଼ଃ ହରେକୃଷ୍ଣ ମହତାବଙ୍କ ୧୨୫ତମ ଜୟନ୍ତୀ ଅନୁଷ୍ଠିତ ହୋଇଯାଇଛି । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମୁଖ୍ୟ ଅତିଥି ଭାବେ ଯୋଗ ଦେଇ କାର୍ୟ୍ୟକ୍ରମରେ ଉଦଘାଟନ କରିଛନ୍ତି । ଓଡ଼ିଆ ଭାଷା ସାହିତ୍ୟ ଓ ସଂସ୍କୃତି ବିଭାଗ ପକ୍ଷରୁ ଆୟୋଜିତ ଏହି କାର୍ୟ୍ୟକ୍ରମରେ ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ ଅନ୍ୟତମ ଅତିଥି ଭାବେ ଯୋଗ ଦେଇଥିଲେ । ଏହି ଅବସରରେ ହରେକୃଷ୍ଣ ମହତାବଙ୍କ ଫଟୋ ପ୍ରଦର୍ଶନୀ ଗ୍ୟାଲେରୀ ମଧ୍ୟ ମୁଖ୍ୟମନ୍ତ୍ରୀ ଉଦଘାଟନ କରିଛନ୍ତି ।ଏହି ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ନିଜ ଅଭିଭାଷଣରେ କହିଛନ୍ତି ଯେ, ଡ଼ଃ ହରେକୃଷ୍ଣ ମହତାବ ଥିଲେ ଓଡ଼ିଶାର ସର୍ଦ୍ଦାର ବଲ୍ଲଭଭାଇ ପଟେଲ । ଆଧୁନକି ଓଡ଼ିଶା ନିର୍ମାଣର ନିର୍ମାତା ଥିଲେ ମହତାବ । ତାଙ୍କ ବିନା ଓଡ଼ିଶାର ବିକାଶ ସମ୍ଭବ ନୁହେଁ । ଆଗକୁ ଏକ ବର୍ଷ ପ୍ରତି ଜିଲ୍ଲାରେ ମହତାବଙ୍କ ଜନ୍ମ ଜୟନ୍ତୀ କାର୍ୟ୍ୟକ୍ରମ ଆୟୋଜିତ ହେବ । ମହତାବ ହେଉଛନ୍ତି ଦେଶର ବରପୁତ୍ର । ତାଙ୍କର ଦେଶ ସେବାରେ ପ୍ରଥମ ସୁଯୋଗ ଥିଲା ସ୍ଵାଧୀନତା ସଂଗ୍ରାମରେ ଯୋଗ ଦେବା । ବୃହତ ଓଡ଼ିଶା ଗଠନରେ ତାଙ୍କର ପ୍ରମୁଖ ଭୂମିକା ଥିଲା । ସେ ଥିଲେ ଓଡ଼ିଶାର ସର୍ଦ୍ଦାର ପଟେଲ । ଆଧୁନିକ ଓଡ଼ିଶାର ନିର୍ମାତାଙ୍କୁ ଲୁଚେଇକି ରଖି ତାଙ୍କୁ ଅବହେଳା କରାଯାଇଥିଲା । ଏପରିକି ରାଜ୍ୟସ୍ତରୀୟ ତାଙ୍କ ଜନ୍ମ ଜୟନ୍ତୀ ପାଳନ ବନ୍ଦ କରି ଦେଇଥିଲେ ।ମୁଖ୍ୟମନ୍ତ୍ରୀ ଆହୁରି କହିଛନ୍ତି ଯେ, ମହତାବ ନିଜେ ଏକ ଅନୁଷ୍ଠାନ ଥିଲେ । ଆଜି ଯେଉଁଠି ଆଙ୍ଗୁଳି ଦେଖାଇବା ତାହା ତାଙ୍କୁ ଅବଦାନ ଥିଲା । ରାଉରକେଲା ଷ୍ଟିଲ ପ୍ଲାଣ୍ଟ ହୀରାକୁଦ ନଦୀ ବନ୍ଧ, ଆକାଶବାଣୀ କଟକ, ନନ୍ଦନ କାନନଙ୍କ ଭଳି ଅନେକ ତାର ବଡ ଉଦାହରଣ । ମହତାବ ବାବଦରେ ଅନେକ କଥା ଲୁଚେଇ ଦିଆଯାଇଥିଲା । ମୁଖ୍ୟମନ୍ତ୍ରୀ ଭାବେ ତାଙ୍କ ଜନ୍ମ ଜୟନ୍ତୀରେ ଯୋଗ ଦେବା ମୋ ପାଇଁ ସୌଭାଗ୍ୟ । ବରପୁତ୍ରମାନଙ୍କୁ ସମ୍ମାନ ଦେବା ପାଇଁ ବିଜେପି ସରକାର ତତ୍ପର । ବିଗତ ଅନେକ ବର୍ଷ ଧରି ଓଡ଼ିଶା କେବଳ ଗୋଟିଏ ପରିବାରର ଅବଦାନ ବୋଲି କୁହାଯାଉଥିଲା । ଓଡ଼ିଶାର ସାଢେ ଚାରି କୋଟି ଓଡ଼ିଆ ଜାଣିବା ଦରକାର ମହତାବ ଅବଦାନ ନିରପେକ୍ଷ ଭାବେ ସମସ୍ତଙ୍କ ଆଗକୁ ଆସିବ ।

Powered by Froala Editor