କର୍ଣ୍ଣାଟକର ବାଗଲାକୋଟ ଅଞ୍ଚଳସ୍ଥ କସୱେରୁ ଏକ ବିସ୍ଫୋରଣର ଘଟଣା ସାମ୍ନାକୁ ଆସିଛି। ଏଠାରେ ଜଣେ ମହିଳା ହେୟାର ଡ୍ରାୟର ମେସିନ୍‌ରେ ନିଜ ଚୁଟି ଶୁଖାଉଥିଲେ। ଏତିକି ବେଳେ ଏଥିରେ ଭୟଙ୍କର ବିସ୍ଫୋରଣ ହୋଇଛି। ଫଳରେ ମହିଳା ଜଣଙ୍କ ଗୁରୁତର ଆହତ ହେବା ସହ ବିସ୍ଫୋରଣରେ ତାଙ୍କର ଦୁଇ ହାତ ମଧ୍ୟ ଛିଣ୍ଡି ଯାଇଛି। ପୀଡିତ ମହିଳା ଜଣକ ହେଲେ ବସମ୍ମା ୟାରାନଲ୍‌। ସେ ଜଣେ ପୂର୍ବତନ ସେନା ଯବାନଙ୍କ ପତ୍ନୀ।

ପୁଲିସ ସୂତ୍ରରୁ ପ୍ରକାଶ, ବସମ୍ମା ୟାରାନଲ କିଛିଦିନ ତଳେ ଏକ ଘରୋଇ କୋରିୟର କମ୍ପାନି ଦ୍ବାରା ଡେଲିଭରି ହୋଇଥିବା ହେୟାର ଡ୍ରାୟର  ଗ୍ରହଣ କରିଥିଲେ। ଏହି ପାର୍ସଲଟିରେ ଶଶିକଳାଙ୍କ ନାମ ଓ ମୋବାଇଲ ନମ୍ବର ଲେଖାଥିଲା।

କୋରିୟର ସେବା ଶଶିକଳାଙ୍କୁ ସମ୍ପର୍କ କରିବାରୁ ସେ ସହର ବାଇହାରେ ଥିଲେ। ଏହାପରେ ଶଶିକଳା ଫୋନ କରି ବସମ୍ମାଙ୍କୁ ଉକ୍ତ ପାର୍ସଲ ରିସିଭି କରିବାକୁ କହିଥିଲେ। ପାର୍ସଲ ରିସିଭି ପରେ ଶଶିକଳା ବସମ୍ମାଙ୍କୁ କହିଥିଲେ, ‘ମୁଁ ଗୋଟେ ହେୟାର ଡ୍ରାଏର ମଗାଇଛି। ତାହା କେମିତି ଆସିଛି କେମିତି କାମ କରୁଛି ଟିକେ ପରୀକ୍ଷା କରି ଦେଖି ନେବୁ।’ ତେବେ ବସମ୍ମା ଏହାକୁ ଯାଞ୍ଚ କରିବା ବେଳେ ଏଥିରେ ବିସ୍ଫୋରଣ ହୋଇଛି। ଗୁରୁତର ଅବସ୍ଥାରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି।

ସେପଟେ ଏହି ଘଟଣା ସାମ୍ନାକୁ ଆସିବା ପରେ ପୁଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ବର୍ତ୍ତମାନ ପର୍ଯ୍ୟନ୍ତ ଅନୁସନ୍ଧାନରୁ ଜଣାପଡିଛି ଯେ ଏହି ହେୟାର ଡ୍ରାୟର ବିଶାଖାପାଟନମରେ ତିଆରି ହୋଇଥିଲା ଏବଂ ବାଗଲକୋଟରୁ ପଠାଯାଇଥିଲା। ପାର୍ସଲ ପଠାଇଥିବା ଲୋକଙ୍କ ଉପରେ ପୁଲିସ ସନ୍ଦେହ କରୁଛି। ବିଭିନ୍ନ ଏଙ୍ଗେଲରୁ ପୁଲିସ ଏହି ଘଟଣାର ତଦନ୍ତ ଜାରି ରଖିଛି।

Powered by Froala Editor