ଐତିହ୍ୟ ସଂପନ୍ନ ପୁରୀ ଶ୍ରୀମନ୍ଦିରର ମେଘନାଦ ପାଚେରିରୁ ଅନବରତ ଗଳୁଛି ପାଣି। ଏହାକୁ ନେଇ ଭକ୍ତଙ୍କ ମହଲରେ ଅସନ୍ତୋଷ ଦେଖାଦେଇଥିବା ବେଳେ ମେଘନାଦ ପାଚେରି ଭୁଶୁଡିଲା ଭଳି ଆଶଙ୍କା ସୃଷ୍ଟି କରୁଛି ।

ଶ୍ରୀମନ୍ଦିର ଭିତର ଏବଂ ବାହାର ବେଢାକୁ ସୁରକ୍ଷା ଦେଇ ଆସୁଛି ମେଘନାଦ ପାଚେରି । ତେବେ ଏହାର ରକ୍ଷଣାବେକ୍ଷଣ ଦାୟିତ୍ବ ଭାରତୀୟ ପ୍ରତ୍ନତତ୍ତ୍ବ ସର୍ବକ୍ଷେଣ ସଂସ୍ଥା ବା ଏଏସଆଇ ନେଇଥିବା ବେଳେ ଏହି ଦିଗରେ ଗୁରୁତ୍ବ ଦେଇନଥିବା କାରଣରୁ ସଂସ୍ଥାର ଗୁରୁତର ଅବହେଳା ବୋଲି କୁହାଯାଇପାରେ ।

ପାଚେରିରୁ ଅନବରତ ଝରୁଛି ପାଣି। ଶିଉଳି ମଧ୍ୟ ମାଡ଼ି ଗଲାଣି। ସିଂହଦ୍ୱାର ସମ୍ମୁଖସ୍ଥ ଲଙ୍ଗୁଳି ମଠ ଧୂନିକୁଣ୍ଡ ଠାରୁ ରାମଦୟା ପରିଷଦ ପର୍ଯ୍ୟନ୍ତ ପ୍ରାୟ ୬୦ ଫୁଟ୍ ଲମ୍ବରେ ମେଘନାଦ ପାଚେରିର ଏକାଧିକ ସ୍ଥାନରେ ଫାଟ ଦିଶୁଛି। ହେଲେ ଶ୍ରୀମନ୍ଦିର ପ୍ରଶାସନ ହେଉ କି ପୁରୀ ଜିଲ୍ଲା ପ୍ରଶାସନ ସମସ୍ତେ ଏହାକୁ ଦେଖି ନଦେଖିଲା ପରି ହେଉଛନ୍ତି।

ତେବେ ଏବେଠୁ ମରାମତି ନକରିଲେ ଆଗାମୀ ଦିନରେ ଶ୍ରୀମନ୍ଦିର ଉପରେ ମଧ୍ୟ ବିପଦ ଆସିପାରେ ବୋଲି କୁହାଯାଉଛି । ଶ୍ରୀମନ୍ଦିର ପରିକ୍ରମା ପ୍ରକଳ୍ପ ପାଇଁ ଉଚ୍ଛେଦ ବେଳେ ସଂହଦ୍ବାରା ସମ୍ମୁଖ ମେଘନାଦ ପାଚେରିରେ ମାଡ ହୋଇଥିଲା । ଏକାଧିକ ସ୍ଥାନରେ ଗର୍ତ୍ତ ସୃଷ୍ଟି ହୋଇଥିଲା । ବର୍ତ୍ତମାନ ସେହି ଆକାରରେ ବୃଦ୍ଧି ଘଟୁଛି ଯାହାକି ଶ୍ରୀମନ୍ଦିର ପାଇଁ ବିପଦର କାରଣ ସୃଷ୍ଟି କରିପାରେ ।

 ଏହାକୁ ଦେଖି ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ କହିଛନ୍ତି, ଅତୀତର କିଛି ଭୁଲ କାରଣରୁ ଭବିଷ୍ୟତର ଭୁଲ ହୁଏ। ଯାହା ଅସୁବିଧା ହୋଇଛି ତା’ର ତୁରନ୍ତ ମରାମତି କରାଯିବ। ସେହିପରି ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ କହିଛନ୍ତି, ଜଗନ୍ନାଥ ମନ୍ଦିରର ସୁରକ୍ଷା ଓ ସ୍ଥାୟିତ୍ୱ ଆମ ପ୍ରାଥମିକତା। ଏଏସଆଇ ଓ ଟେକ୍ନିକାଲ ଟିମକୁ ଏ ସମ୍ପର୍କରେ ଜଣାଇ ଦିଆଯାଇଛି। ମେଘନାଦ ପାଚେରିର ଖୁବଶୀଘ୍ର ମରାମତି କାମ ହୋଇଯିବା ନେଇ ସେ ପ୍ରତିଶ୍ରୁତି ଦେଇଛନ୍ତି।

Powered by Froala Editor