ଗଞ୍ଜାମ ଖଲ୍ଲିକୋଟ ଥାନା ୧୬ନଂ ଏନ୍‌ଏଚ୍ ଡିମିରିଆ ଛକ ନିକଟରେ ଶନିବାର ମର୍ମନ୍ତୁଦ ଦୁର୍ଘଟଣା ଘଟିଛି । ଏଥିରେ ୨ କାଉଡ଼ିଆ ଓ ଜଣେ ଶ୍ରମିକଙ୍କ ମୃତ୍ୟୁ ହୋଇଛି । ମୃତ କାଉଡ଼ିଆ ହେଲେ ଖୋର୍ଦ୍ଧା ଜିଲ୍ଲା ବାଣପୁର ହରିଜନ ସାହିର ରଞ୍ଜିତ ନାୟକ (୩୬) ଓ ପପୁ ନାୟକ (୩୪) । ମୃତ ଶ୍ରମିକ ଏ ବନମାଳୀ ପାତ୍ର (୪୫) । ବନମାଳୀଙ୍କ ଘର ଖଲ୍ଲିକୋଟ ଥାନା ଦଲିବାଟି ଗାଁରେ । 

ସୂଚନା ଅନୁଯାୟୀ, ରଞ୍ଜିତ ଓ ପପୁ ଗଞ୍ଜାମ ସହର ନିକଟ ଋଷିକୁଲ୍ୟା ନଦୀରୁ ପାଣି ଭାର ଉଠାଇ ବାଲୁଗାଁ ଉମା ମହେଶ୍ୱର ମନ୍ଦିର ଅଭିମୁଖେ ଯାଉଥିଲେ । ବନମାଳୀ ରାଜପଥରେ ସାଇକେଲ୍ ଯୋଗେ ଯାଉଥିଲେ । ଏହି ସମୟରେ ଆନ୍ଧ୍ରପ୍ରଦେଶରୁ ଭୁବନେଶ୍ୱର ଆସୁଥିବା ମାଛ ବୋଝେଇ ଟ୍ରକ୍ ଡିମିରିଆ ଛକଠାରେ ୩ ଜଣ ଉପରେ ମାଡ଼ି ଯାଇ ପରେ ରାସ୍ତାରେ ଓଲଟି ପଡ଼ିଥିଲା । ଦୁଇ କାଉଡ଼ିଆଙ୍କ ମୃତ୍ୟୁ ଘଟିଥିଲା । ବନମାଳୀଙ୍କୁ ଖଲ୍ଲିକୋଟ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । 

ଅନ୍ୟପଟେ ଦୁର୍ଘଟଣାଗ୍ରସ୍ତ ଟ୍ରକ୍ ଭିତରେ ଦୁଇ ଜଣ ଡ୍ରାଇଭର୍ ଫସି ରହିଥିଲେ । ପୁଲିସ ଉଭୟଙ୍କୁ ଖଲ୍ଲିକୋଟ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଆଣିଥିଲା । ଜଣଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ବ୍ରହ୍ମପୁର ବଡ଼ ଡାକ୍ତରଖାନା ସ୍ଥାନାନ୍ତର କରାଯାଇଛି । ଅନ୍ୟ ଜଣଙ୍କୁ ପୁଲିସ ସନ୍ଧ୍ୟାରେ କୋର୍ଟଚାଲାଣ କରିଛି । 

Powered by Froala Editor