ଭୁବନେଶ୍ୱର: ସୋମବାର ବିଧାନସଭାରେ ବିରୋଧୀଙ୍କ ପ୍ରବଳ ହଟ୍ଟଗୋଳ ଯୋଗୁଁ ବାଚସ୍ପତି ସୁରମା ପାଢ଼ୀ ଗୃହ କାର୍ଯ୍ୟକୁ ଅପରାହ୍ନ ୪ଟା ପର୍ଯ୍ୟନ୍ତ ମୁଲତବୀ ଘୋଷଣା କରିଛନ୍ତି । ଆଜି ଉଭୟ ବିରୋଧୀ କଂଗ୍ରେସ ଓ ଶାସକ ବିଜେପି ସଦସ୍ୟଙ୍କ ପକ୍ଷରୁ ସ୍ୱାଧୀକାର ନୋଟିସ ଅଣାଯାଇଥିବାବେଳେ ସବୁ ନୋଟିସ ଉପରେ ଆଲୋଚନା କରି କହିବି ବୋଲି ବାଚସ୍ପତି ଶ୍ରୀମତୀ ପାଢ଼ୀ କହିଛନ୍ତି । ତେବେ ବାଚସ୍ପତିଙ୍କ ବିବୃତ୍ତି ପରେ କଂଗ୍ରେସ ସଦସ୍ୟମାନେ ଗୃହରେ ହଟ୍ଟଗୋଳ କରିଥିଲେ । ଫଳରେ ବାଚସ୍ପତି ଗୃହ କାର୍ଯ୍ୟକୁ ୪ଟା ପର୍ଯ୍ୟନ୍ତ ମୁଲତବୀ ଘୋଷଣା କରିଛନ୍ତି । 

 ପ୍ରକାଶଯେ ବିଧାନସଭାରେ ମୁଖ୍ୟମନ୍ତ୍ରୀଙ୍କ ନାଁରେ ସ୍ବାଧୀକାର ଭଙ୍ଗ ନୋଟିସ ଆଣିଥିଲେ ବିରୋଧୀ । ପୂର୍ବ ନିଷ୍ପତ୍ତି ଅନୁଯାୟୀ ସୋମବାର ବିରୋଧୀ କଂଗ୍ରେସ ପକ୍ଷରୁ ଶୂନ୍ୟକାଳରେ ଏହି ନୋଟିସ ଅଣାଯାଇଥିଲା । ମୁଖ୍ୟମନ୍ତ୍ରୀ ଅଗ୍ନିବୀର ସଂରକ୍ଷଣ ବ୍ୟବସ୍ଥା ସମ୍ପର୍କରେ ବାହାରେ ଘୋଷଣା କରି ବିଧାନସଭା ଏବଂ ସମ୍ବିଧାନକୁ ଅପମାନିତ କରିଛନ୍ତି ବୋଲି କଂଗ୍ରେସ ଅଭିଯୋଗ କରିଥିଲା। ଏହା ପ୍ରତିବାଦରେ ଉଭୟ ବିଜେଡି ଏବଂ କଂଗ୍ରେସ ସଦସ୍ୟମାନେ ଗୃହରେ ପ୍ରବଳ ହଟ୍ଟଗୋଳ କରିଥିଲେ। ମୁଖ୍ୟମନ୍ତ୍ରୀ ନିଜେ ଗୃହକୁ ଆସି କ୍ଷମା ମାଗନ୍ତୁ ବୋଲି ବିରୋଧୀ ଦାବି କରିଥିଲେ।
ଶୂନ୍ୟକାଳରେ କଂଗ୍ରେସ ପକ୍ଷରୁ ସ୍ବାଧୀକାର ଭଙ୍ଗ ନୋଟିସ ଅଣାଯିବା ପରେ ବାଚସ୍ପତି ତାହାକୁ ଗ୍ରହଣ କରିଥିଲେ। ଏହା ପରେ ଗୃହରେ ଆଲୋଚନା ଜାରି ରହିଥିଲା। ଆଲୋଚନା କାଳରେ ବିଜେଡି ମୁଖ୍ୟ ସଚେତକ ପ୍ରମିଳା ମଲ୍ଲିକ କହିଥିଲେ ଯେ, ମୁଖ୍ୟମନ୍ତ୍ରୀ ଗୃହକୁ ଆସି କ୍ଷମା ମାଗନ୍ତୁ। ସେହିପରି ମୁଖ୍ୟମନ୍ତ୍ରୀଙ୍କ ଘୋଷଣା ମର୍ମାହତ କରିଛି ବୋଲି ଗଣେଶ୍ବର ବେହେରା କହିଥିଲେ। କଂଗ୍ରେସ ବିଧାୟକ ତାରାପ୍ରସାଦ ବାହିନୀପତି ମୁଖ୍ୟମନ୍ତ୍ରୀଙ୍କ ଇସ୍ତଫା ଦାବି କରିଥିଲେ। ଗୃହରେ କଳଙ୍କିତ ଅଧ୍ୟାୟ ସୃଷ୍ଟି ହେଲା ବୋଲି ତାରା କହିଥିଲେ। ଗୃହ ଏବଂ ସମ୍ବିଧାନକୁ ମୁଖ୍ୟମନ୍ତ୍ରୀ ଅପମାନିତ କରିଛନ୍ତି ବୋଲି କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ କହିଥିଲେ।ଅନ୍ୟପକ୍ଷରେ ବିଜେପି ସଭ୍ୟ ଇରାଶିଶ ଆଚାର୍ଯ୍ୟ ମଧ୍ୟ ତାରା ବାହିନୀପତିଙ୍କ ବିରୋଧରେ ସ୍ୱାଧୀନକାର ଭଙ୍ଗ ନୋଟିସ ଆଣିଥିଲେ ।

Powered by Froala Editor