ଭୁବନେଶ୍ୱର: ସୋମବାର ବିଧାନସଭାରେ ମୁଖ୍ୟମନ୍ତ୍ରୀଙ୍କ ବିରୋଧରେ ସ୍ୱାଧୀକାର ଭଙ୍ଗ ନୋଟିସ ଆଣିଛି କଂଗ୍ରେସ । ବାଚସ୍ପତି ସୁରମା ପାଢ଼ୀ ଶୂନ୍ୟକାଳରେ କଂଗ୍ରେସର ଏହି ନୋଟିସକୁ ଗ୍ରହଣ କରିଥିବାବେଳେ ଏନେଇ ଆଲୋଚନା ଜାରି ରହିଛି । ତେବେ ମୁଖ୍ୟମନ୍ତ୍ରୀଙ୍କ ଘୋଷଣାକୁ ସଂସଦୀୟ ବ୍ୟାପାର ମନ୍ତ୍ରୀ ମୁକେଶ ମହାଲିଙ୍ଗ ପଢିବା ବେଳେ ହଟ୍ଟଗୋଳ ହୋଇଛି । ଅଗ୍ନିବୀର ସଂରକ୍ଷଣ ଓ ୫ ବର୍ଷ ବୟସ ସୀମା କୋହଳ ଘୋଷଣା ନେଇ ହୋହଲ୍ଲା ହୋଇଛି । ଗୃହଚାଲିଥିବାବେଳେ ମୁଖ୍ୟମନ୍ତ୍ରୀ ଏଭଳି ଘୋଷଣା କାହିଁକି କଲେ ବୋଲି ବିରୋଧୀ ପ୍ରଶ୍ନ କରିଛନ୍ତି । ଏନେଇ ଗୃହ ଭିତରେ ଉଭୟ ବିଜେଡି ଓ କଂଗ୍ରେସ ସଦସ୍ୟ ହୋହାଲ୍ଲା କରିଛନ୍ତି । 

ପ୍ରକାଶ ଯେ  ରାଜ୍ୟରେ ୟୁନିଫର୍ମ ସେବାରେ ଅଗ୍ନିବୀରଙ୍କୁ ୧୦ ପ୍ରତିଶତ ସଂରକ୍ଷଣ ଦେବା ନେଇ ମୋହନ ସରକାରଙ୍କ ଘୋଷଣା ପରେ ଏହାକୁ ନେଇ ଆରମ୍ଭ ହୋଇଯାଇଛି ଆରୋପ-ପ୍ରତ୍ୟାରୋପ । ବିଧାନସଭା ଚାଲିଥିବା ବେଳେ ଗୃହ ବାହାରେ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଏଭଳି ଘୋଷଣାକୁ ସହଜରେ ଗ୍ରହଣ କରିପାରିନି କଂଗ୍ରେସ । କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ମୁଖ୍ୟମନ୍ତ୍ରୀ ମୋହନ ମାଝୀ ନିୟମ ବିରୁଦ୍ଧ କାମ କୁରଛନ୍ତି ବୋଲି କହିଛନ୍ତି । ଏପରି କାର୍ୟ୍ୟ ସ୍ବାଧୀକାର ଭଙ୍ଗ କରିଛି ।

ତାରା କହିଛନ୍ତି,‘ଅଗ୍ନିବୀର ପ୍ରସଙ୍ଗରେ ଯାହାବି ନିଷ୍ପତ୍ତି ବିଧାନସଭାରେ କରିବା କଥା କିନ୍ତୁ ଏହି ନିଷ୍ପତ୍ତି ଗୃହ ବାହାରେ ହୋଇଛି । ବିଧାନସଭା ଚାଲିବା ସମୟରେ ବାହାରେ କୌଣସି ଘୋଷଣା କରିବା କଥା ନୁହେଁ । କିନ୍ତୁ ଗୃହର ନୀତିକୁ ମୁଖ୍ୟମନ୍ତ୍ରୀ ମୋହନ ମାଝୀ ଭଙ୍ଗ କରିଛନ୍ତି । ସେ ନୂଆ ମୁଖ୍ୟମନ୍ତ୍ରୀ ହୋଇଛନ୍ତି । କାହା ପରାମର୍ଶରେ ନିଷ୍ପତ୍ତି ଗ୍ରହଣ କରୁଛନ୍ତି, କିନ୍ତୁ ଏହା ସ୍ବାଧିକାର ଭଙ୍ଗ କରିଛି ।’’

Powered by Froala Editor