ଲଘୁଚାପ ଜନିତ ବର୍ଷା ଯୋଗୁ ଝଞ୍ଜାବତୀ ନଦୀରେ ପ୍ରବଳ ବନ୍ୟା ପାଣି ପ୍ରବାହିତ ହେଉଛି। ତାହାରି ଭିତରେ ଏକ ଅଭାବନୀୟ ଘଟଣା ଘଟିଛି। କୋରାପୁଟ ଜିଲା ନାରାୟଣପାଟଣା ବ୍ଲକ ତଳଗୁମାଣ୍ଡି ଡକରିଘାଟି ଅନ୍ତର୍ଗତ ଝଞ୍ଜାବତୀ ନଦୀରେ ୮ମାସର ଗର୍ଭବତୀ ଓ ତାଙ୍କ ୬ ବର୍ଷର ଝିଅ ଶନିବାର ଭାସିଯାଇଛନ୍ତି। ତାଙ୍କର ଅଗଷ୍ଟ ୧୮ରେ ପ୍ରସବ ଥିଲା। ମା’ ଗୃହରୁ ସେ ଶୌଚ ହେବାପାଇଁ ନଦୀକୁ ଯାଇଥିବା ବେଳେ ଏ ଘଟଣା ଘଟିଛି।

ନାରାୟଣପାଟଣା ଥାନା ଡୋକରିଘାଟି ଗାଁର ରାମ ତାଡିଂଙ୍କ ପତ୍ନୀ ହେଉଛନ୍ତି ମତି ତାଡିଂ। ତାଙ୍କର ୬ ବର୍ଷର ଝିଅଟିଏ ଅଛି। ଏବେ ସେ ୮ ମାସର ଗର୍ଭବତୀ। ଅଗଷ୍ଟ ୧୮ ତାରିଖରେ ପ୍ରସବ ପାଇଁ ଡାକ୍ତର ଡେଟ୍‌ ଦେଇଥିଲେ। ତେବେ ଗୁରୁବାର ମତି ପ୍ରସବ ବେଦନା ପାଇଥିଲେ। ତେଣୁ ତାଙ୍କ ସ୍ୱାମୀ ତାଙ୍କୁ ନାରାୟଣପାଟଣା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ। ଚେକ୍‌ଅପ୍‌ ପରେ ଡେଟ୍‌ ହୋଇନଥିବା କହିଥିଲେ ଡାକ୍ତର। ତେଣୁ ସେ ନାରାୟଣପାଟଣା ଉପକଣ୍ଠରେ ନିର୍ମାଣ ହୋଇଥିବା ମାଆ ଗୃହରେ ରହିଥିଲେ।

ସ୍ୱାମୀଙ୍କୁ ନକହି ମତି ତାଡିଂ ଓ ତାଙ୍କ ଝିଅ ମାଆ ଗୃହଠାରୁ ୧୦୦ ମିଟର ଦୂରରେ ଥିବା ଝାଞ୍ଜାବତୀ ନଦୀ ପଠାକୁ ଯାଇଥିଲେ। ଅଭିଯୋଗ ଅନୁସାରେ ମତିଙ୍କ ଝିଅ ନଦୀ ପାଣିରେ ଶୈଚ ବେଳେ ଭାସି ଯାଇଥିଲେ। ତାଙ୍କୁ ଉଦ୍ଧାର କରିବାକୁ ଯାଇ ମତି ଭାସି ଯାଇଥିବା ଆଲୋଚନା ହେଉଛି। ଘଟଣା ସ୍ଥଳକୁ ଅଗ୍ନିଶମବାହିନୀ ଓ ପୋଲିସ ଯାଇ ଖୋଜାଖୋଜି କରୁଛି। ମା’ ଗୃହରେ ଥିବା ଶୌଚାଳୟ ବ୍ୟବହାର କରିଥିଲେ ଏଭଳି ଘଟଣା ଘଟି ନ ଥାନ୍ତା ବୋଲି ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।

Powered by Froala Editor