ସ୍ପାଇ ଥ୍ରିଲର ଫିଲ୍ମ ‘ଉଲଝ’ର ଟ୍ରେଲର୍ ରିଲିଜ ହୋଇଛି । ଫିଲ୍ମରେ ମୁଖ୍ୟ ଭୂମିକାରେ ଅଭିନୟ କରିଛନ୍ତି ଜାହ୍ନବୀ କପୁର । ସେ ଭାରତୀୟ ବିଦେଶ ସେବା (ଆଇଏଫ୍‌ଏସ୍‌) ଅଧିକାରୀ ଭୂମିକା ନିର୍ବାହ କରିଛନ୍ତି । ଫିଲ୍ମରେ ଜାହ୍ନବୀ ସବୁଠୁ କମ୍ ବୟସ୍କା ଡେପୁଟି ହାଇ କମିଶନର ସୁହାନା ଭୂମିକା ତୁଲାଉଛନ୍ତି । ଲଣ୍ଡନ ଦୂତାବାସରେ ଏକ ଜଟିଳ ମିଶନର କିପରି ସମାଧାନ କରିଛନ୍ତି ତାହା ଏ ଫିଲ୍ମରେ ରହିଛି । ଫିଲ୍ମଟି ଜଙ୍ଗଲୀ ପିକ୍‌ଚର୍ସ ଦ୍ୱାରା ନିର୍ମିତ ହୋଇଥିବାବେଳେ ସୁଧାଂଶୁ ସରିୟା ନିର୍ଦ୍ଦେଶନା ଦେଇଛନ୍ତି । ଯାହାକି ଅଗଷ୍ଟ ୨ ତାରିଖରେ ପ୍ରୋକ୍ଷାଳୟକୁ ଆସିବ । 

ତେବେ ପ୍ରେକ୍ଷାଳୟକୁ ଆସିବା ପୂର୍ବରୁ ପ୍ରଶଂସକ ଟ୍ରେଲର ଦେଖି ଉତ୍ସାହିତ ହୋଇସାରିଲେଣି । ଜାହ୍ନବୀଙ୍କ ଚରିତ୍ର ଓ ନୂଆ ଲୁକ୍‌କୁ ଦର୍ଶକ ଖୁବ୍ ପ୍ରଶଂସା କରୁଛନ୍ତି । ଟ୍ରେଲର୍‌କୁ ୪ କୋଟିରୁ ଅଧିକ ୟୁଜର ଦେଖିଛନ୍ତି, ଯାହା ଫିଲ୍ମ ପାଇଁ ବଡ଼ ମାଇଲଖୁଣ୍ଟ ପ୍ରମାଣିତ ହୋଇଛି । ଦର୍ଶକ ଫିଲ୍ମର କାହାଣୀ ପୂରା ଜାଣିବାକୁ ଚାତକ ପରି ଚାହିଁ ରହିଛନ୍ତି । 

ଟ୍ରେଲର୍‌କୁ ମିଳୁଥିବା ପ୍ରତିକ୍ରିୟାରେ ଖୁସି ହୋଇ ଜାହ୍ନବୀ ଦର୍ଶକଙ୍କୁ ଧନ୍ୟବାଦ ଦେଇଛନ୍ତି । ସେ କହିଛନ୍ତି ‘ପରଦାରେ ପ୍ରଥମ ଥର ମୁଁ ଆଇଏଫ୍‌ଏସ୍ ଅଧିକାରୀ ଭୂମିକା ନିର୍ବାହ କରିଛି । ଏ ଦୁନିଆର ଅନୁଭବ ବେଶ ଆହ୍ୱାନଭରା ଓ ରୋମାଞ୍ଚକର ଥିଲା । ଏଠାରେ ମୁଁ ଅନେକ ନୂଆ କଥା ଶିଖିଲି ଏବଂ ରାଷ୍ଟ୍ରୀୟ ରକ୍ଷା ଓ ଅନ୍ତର୍ଜାତୀୟ ସମ୍ପର୍କର ସମ୍ପୂର୍ଣ୍ଣ ନୂଆ ଦିଗ ବୁଝିବାକୁ ପାଇଲି ।’ ଅଗଷ୍ଟ ୨ରେ ପରଦାକୁ ଆସିବା ପରେ ନିଶ୍ଚୟ ଦର୍ଶକ ପସନ୍ଦ କରିବେ ବୋଲି ସେ ଆଶାବାଦୀ ଅଛନ୍ତି ।  

Powered by Froala Editor