କାର୍ଯ୍ୟାନୁଷ୍ଠାନ ପରେ ନୂଆ ଆକାଉଣ୍ଟ ସହ ଫେରିଲା ‘କକ୍ରୋଚ ଜନତା ପାର୍ଟି’
ସୋସିଆଲ ମିଡିଆରେ ହଲଚଲ ସୃଷ୍ଟି କରିଥିବା ବ୍ୟଙ୍ଗାତ୍ମକ ଡିଜିଟାଲ ଆନ୍ଦୋଳନ ‘କକ୍ରୋଚ ଜନତା ପାର୍ଟି’ (ସିଜେପି) ଆକାଉଣ୍ଟକୁ ଛୁଟୁଛନ୍ତି ଲକ୍ଷାଧିକ ଫୋଲର୍ସ। CJIଙ୍କ ଛୋଟିଆ ମନ୍ତବ୍ୟ ଏବେ ବଡ଼ ବିପ୍ଲବ ଆଡ଼କୁ ନେଉଛି। କୁହାଯାଉଛି ଦେଶର ଜେନ୍ ଜିଙ୍କ ଇଏ ସ୍ବର। କିନ୍ତୁ ସତରେ କଣ ଏସବୁ ହେଉଛି? ନା ସୋସିଆଲ୍ ମିଡିଆର ଆଢ଼ୁଆଳରେ ରହି ଏହାକୁ କିଏ କରାଉଛି? ‘କକରୋଚ୍ ଜନତା ପାର୍ଟି’ର ରିଙ୍ଗ ମାଷ୍ଟର କିଏ?
ଏହାର ପ୍ରତିଷ୍ଠାତା। (୧) ଅଭିଜିତ ଦିପକେ (୨) ଅର୍ପିତ ଶର୍ମା (୩) ମେଘନାଦ... ଏଇ ତିନି ଜଣଙ୍କ ଭିତରେ ଗୋଟିଏ କନେକ୍ସନ୍...ଏଇ ସମସ୍ତ ବ୍ୟକ୍ତି ଆମ୍ ଆଦମୀ ପାର୍ଟିର ସକ୍ରିୟ ସଦସ୍ୟ। ଅଭିଜିତ ଦିପକେ, ୨୦୨୦ ମସିହାରେ ଆପ୍ ସହ ଯୋଡ଼ି ହୋଇଥିଲେ। ସେତେବେଳେ ଦିଲ୍ଲୀରେ କ୍ଷମତାରେ ଥିଲା ଦଳ, ଆଉ ୟେ ସମ୍ଭାଳୁଥିଲେ ସୋସିଆଲ୍ ମିଡିଆ ଓ ଗଣମାଧ୍ୟମ ବ୍ୟାପାର। ପରେ ଆମେରିକା ଗଲେ, ସେଠୁ ରହି ବି ଆପ୍ ପାଇଁ କାମ କରୁଥିବା ଖୋଦ୍ ତାଙ୍କ ସୋସିଆଲ୍ ମିଡିଆ ପୋଷ୍ଟରୁ ଜାଣି ହେଉଛି। ଆପ୍ ର ଦ୍ବିତୀୟ କ୍ଷମତାଶାଳୀ ନେତା ମନୀଷ ସିସୋଦିଆଙ୍କ ସହ ତାଙ୍କ ସମ୍ପର୍କ ହିଁ ସବୁ ସ୍ପଷ୍ଟ କରିଛି।
ତେବେ କକରୋଚ୍ ଜନତା ପାର୍ଟି’ ବିରୋଧରେ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଗୁରୁବାର ଏହି ପାର୍ଟିର ଅଫିସିଆଲ ‘X’ ଆକାଉଣ୍ଟକୁ ଭାରତରେ ପ୍ରତିବନ୍ଧିତ କରାଯାଇଛି। କାର୍ଯ୍ୟାନୁଷ୍ଠାନର କିଛି ସମୟ ମଧ୍ୟରେ ‘କକ୍ରୋଚ ଇଜ୍ ବ୍ୟାକ୍’ ନାମରେ ଏକ ନୂଆ ହ୍ୟାଣ୍ଡେଲ୍ ଖୋଲାଯାଇ ପ୍ରତିବାଦ ଜାରି ରଖାଯାଇଛି।
ଅପରପକ୍ଷରେ ମେଟା ମାଲିକାନାରେ ଥିବା ‘ଇନ୍ଷ୍ଟାଗ୍ରାମ’ରେ ଏହି ପାର୍ଟିର କ୍ରେଜ୍ ଥମିବାର ନଁା ନେଉନାହିଁ। ମାତ୍ର ୫ ଦିନ ମଧ୍ୟରେ ଏହି ପାର୍ଟିର ଅନୁଗାମୀ (ଫଲୋଅର୍ସ) ସଂଖ୍ୟା ୧୭.୩ ମିଲିୟନ (୧.୭୩ କୋଟି) ଅତିକ୍ରମ କରିସାରିଛି। କେବଳ ସାର୍ଜମେଣ୍ଟ, ରିଲ୍ସ ଏବଂ ଯୁବପିଢ଼ିଙ୍କ ଆକ୍ରୋଶକୁ ଆୟୁଧ କରି ସିଜେପି ଦେଶର ଶାସକ ଦଳ ଭାରତୀୟ ଜନତା ପାର୍ଟି (ଭାଜପା)ର ଅଫିସିଆଲ ଇନ୍ଷ୍ଟାଗ୍ରାମ ଆକାଉଣ୍ଟ (୮.୯ ମିଲିୟନ ଫଲୋଅର୍ସ)କୁ ବହୁ ପଛରେ ପକାଇ ଦେଇଛି।
ସୂଚନାଥାଉ କି, ଗତ ମେ’ ୧୫ରେ ଏକ ମାମଲାର ଶୁଣାଣି ବେଳେ ସୁପ୍ରିମକୋର୍ଟ ପ୍ରଧାନ ବିଚାରପତି ସୂର୍ଯ୍ୟକାନ୍ତ ସୋସିଆଲ ମିଡିଆ ଓ ଆରଟିଆଇ କର୍ମୀ ସାଜି ସମସ୍ତଙ୍କୁ ଆକ୍ରମଣ କରୁଥିବା କେତେଜଣ ଯୁବକଙ୍କ ଆଚରଣକୁ ନେଇ ଅସନ୍ତୋଷ ପ୍ରକାଶ କରିଥିଲେ। ସେ କହିଥିଲେ, ‘କେତେଜଣ ଯୁବକ ଅଛନ୍ତି, ଯେଉଁମାନେ ଅସରପା (କକ୍ରୋଚ) ଭଳି। ସେମାନଙ୍କୁ କୌଣସି ରୋଜଗାର କିମ୍ବା ବୃତ୍ତିରେ ସ୍ଥାନ ମିଳେନାହିଁ। ସେମାନଙ୍କ ମଧ୍ୟରୁ କେତେଜଣ ମିଡିଆ, କେତେଜଣ ସୋସିଆଲ ମିଡିଆ, ଆରଟିଆଇ କର୍ମୀ ସାଜି ସମସ୍ତଙ୍କୁ ଆକ୍ରମଣ କରନ୍ତି।’ ସମ୍ବିଧାନର ରକ୍ଷକଙ୍କ ମୁହଁରୁ ଯୁବପିଢ଼ିଙ୍କ ପାଇଁ ଏଭଳି ଶବ୍ଦ ଶୁଣି ସୋସିଆଲ ମିଡିଆରେ ଜୋରଦାର ଅସନ୍ତୋଷ ପ୍ରକାଶ ପାଇଥିଲା ଏବଂ ଏହାର ପ୍ରତିବାଦ ସ୍ବରୂପ ପୂର୍ବରୁ ଆପ୍ (ଏଏପି) ସହ ଜଡ଼ିତ ଥିବା ଅଭିଜିତ ଦୀପକେ ‘କକ୍ରୋଚ ଜନତା ପାର୍ଟି’ (ସିଜେପି)ର ସୂତ୍ରପାତ କରିଥିଲେ।
Powered by Froala Editor
