ବିକ୍ରମ ମିଶ୍ରି ହେବେ ଭାରତର ନୂଆ ବୈଦେଶିକ ସଚିବ। ନିଯୁକ୍ତି ସଂକ୍ରାନ୍ତ କ୍ୟାବିନେଟ କମିଟି ତାଙ୍କର ନିଯୁକ୍ତି ଉପରେ ମୋହର ମାରିଛି। ଏବେ ଜାତୀୟ ସୁରକ୍ଷା ଉପ-ପରାମର୍ଶଦାତା (Deputy NSA) ଥିବା ବିକ୍ରମ ମିଶ୍ରି ଆସନ୍ତା ଜୁଲାଇ ମାସ ୧୫ ତାରିଖରେ ଭାରତର ବୈଦେଶିକ ସଚିବ ଭାବେ ଦାୟିତ୍ୱ ନେବେ। କାର୍ମିକ ମନ୍ତ୍ରଣାଳୟ ପକ୍ଷରୁ ଏନେଇ ସୂଚନା ଦିଆଯାଇଛି। ଏହା ପୂର୍ବରୁ ବିକ୍ରମ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରେ ମଧ୍ୟ କାର୍ଯ୍ୟ କରି ସାରିଛନ୍ତି । ଚୀନ ସହ ଭାରତର ବିଭିନ୍ନ ବୈଦେଶିକ କାରବାରରେ ସେ ତାଙ୍କ କୂଟନୀତି ଦ୍ୱାରା ଅନେକ ଗୁରୁତ୍ୱପୂର୍ଣ୍ଣ କାର୍ଯ୍ୟ ହାସଲ କରିଥିଲେ ।

୧୯୬୪ ମସିହା ନଭେମ୍ବର ୭ରେ ଏକ କାଶ୍ମିରୀ ହିନ୍ଦୁ ପରିବାରରେ ବିକ୍ରମ ମିଶ୍ରି ଜନ୍ମଗ୍ରହଣ କରିଥିଲେ । ସିନ୍ଧିଆ ସ୍କୁଲ ଗ୍ୱାଲିୟରରୁ ସେ ତାଙ୍କ ସ୍କୁଲ ପାଠପଢ଼ା ଶେଷ କରିବା ପରେ ଦିଲ୍ଲୀ ୟୁନିଭର୍ସିଟିର ହିନ୍ଦୁ କଲେଜରୁ ଇତିହାସରେ ସ୍ନାତକ ଡିଗ୍ରୀ ହାସଲ କରିଥିଲେ । ପରେ ସେ XLRI ଜାଭିୟର ଲେବର ରିଲେସନ୍ସ ଇନ୍ସଟିଟ୍ୟୁଟ ଜାମସେଦପୁରରୁ ଏମବିଏ କରିଥିଲେ । ଏହା ପରେ ସେ ଏକ ଆଡଭାର୍ଟାଇଜିଂ ଏବଂ ଆଡ୍ ଫିଲ୍ମ ମେକିଂ ଇଣ୍ଡଷ୍ଟ୍ରିରେ କାର୍ଯ୍ୟ କରିଥିଲେ । କିନ୍ତୁ ୟୁପିଏସସି ପରୀକ୍ଷା ପାସ କରିବା ତାଙ୍କର ସ୍ୱପ୍ନ ଥିଲା । ୧୯୮୮ରେ ବିକ୍ରମଙ୍କର ସ୍ୱପ୍ନ ବାସ୍ତବତାର ରୂପ ଧାରଣ କଲା ଏବଂ IFS ରେ ତାଙ୍କର ଚୟନ ହୋଇଥିଲା ।

ବିକ୍ରମ ମିଶ୍ରି ହେଉଛନ୍ତି ୧୯୮୯ ବ୍ୟାଚର IFS ଅଧିକାରୀ । ବର୍ତ୍ତମାନର ବୈଦେଶିକ ସଚିବ ବିନୟ କ୍ୱାତ୍ରାଙ୍କ ସ୍ଥାନରେ ତାଙ୍କୁ ନିଯୁକ୍ତ କରାଯାଇଛି । ଗତ ଦୁଇ ବର୍ଷରୁ ସେ ଡେପୁଟି ନ୍ୟାସନାଲ ସିକ୍ୟୁରିଟି ଆଡଭାଇଜର ଭାବେ କାର୍ଯ୍ୟରତ ଥିଲେ । ଏହି ପଦବୀ ପାଇଁ ତାଙ୍କ କାର୍ଯ୍ୟକାଳ ହ୍ରାସ କରାଯାଇ ଦେଶର ପରବର୍ତ୍ତୀ ବୈଦେଶିକ ସଚିବ ଭାବେ ନିଯୁକ୍ତ କରାଯାଇଛି । 

Powered by Froala Editor