ଅନେକ ଲୋକଙ୍କ ମତରେ ଖରାଦିନେ ଅଣ୍ଡା ଖାଇବାଠାରୁ ଦୂରେଇ ରହିବା ଭଲ। ଅଣ୍ଡା କେବଳ ଶୀତ ଦିନେ ଖାଇବା ଶରୀର ପାଇଁ ଲାଭଦାୟକ ହୋଇଥାଏ। ଖରା ଦିନରେ ଅଣ୍ଡା ଖାଇବା ଦ୍ୱାରା ଶରୀର ଆହୁରି ଗରମ ହୋଇଯାଏ ଏବଂ ପିଲାମାନେ ଖାସ କରି ଏହାକୁ ଖାଇବା ଦ୍ୱାରା ବିଶେଷ ସମସ୍ୟାର ସମ୍ମୁଖୀନ ହୋଇପାରନ୍ତି। ବାସ୍ତବରେ ଏହା ସମ୍ପୂର୍ଣ୍ଣ ସତ୍ୟ ନୁହେଁ। ଅଣ୍ଡା ଏକ ସୁପର ଫୁଡ୍‌‌ ଏହା ଶରୀରରେ ଅନେକ ପୋଷକ ତତ୍ତ୍ୱର ଅଭାବକୁ ସହଜରେ ଦୂର କରିପାରିବ। କିନ୍ତୁ ଯଦି ଆପଣ ଗ୍ରୀଷ୍ମ ଋତୁରେ ଆପଣଙ୍କ ପିଲାଙ୍କୁ ଅଣ୍ଡା ଖାଇବାକୁ ଦେବେ କି ନାହିଁ ଭାବୁଛନ୍ତି ତେବେ ଡାକ୍ତରଙ୍କ ପରାମର୍ଶ ନେବା ଉଚିତ୍‌‌।
ଶିଶୁରୋଗ ବିଶେଷଜ୍ଞଙ୍କ ମତରେ ଅଣ୍ଡାରେ ପ୍ରଚୁର ପରିମାଣର ପ୍ରୋଟିନ୍‌‌, କ୍ୟାଲସିୟମ୍‌‌, ଭିଟାମିନ୍‌‌-ଏ, ଭିଟାମିନ୍‌‌-ଡି, ଏବଂ ଆଇରନ୍‌‌ ରହିଥାଏ। ଯାହା ପିଲାଙ୍କ ବଢିବାରେ ସାହାଯ୍ୟ କରିବା ସହ ବୃଦ୍ଧି ଶକ୍ତିକୁ ବଢାଇଥାଏ। ଅଣ୍ଡାରେ କୋଲିନ୍‌‌ ମଧ୍ୟ ରହିଛି। ଯାହାକି ଶିଶୁର ମସ୍ତିଷ୍କ ବିକାଶ ପାଇଁ ଜରୁରୀ ଅଟେ। ତେଣୁ ଆପଣ ପ୍ରତ୍ୟେକ ଋତୁରେ ପିଲାଙ୍କୁ ଅଣ୍ଡା ଖାଦ୍ୟ ଭାବେ ଦେବା ଜରୁରୀ। ଗ୍ରୀଷ୍ମ ଋତୁରେ ପିଲାଙ୍କୁ ଗୋଟିଏ ଲେଖାଏଁ ଅଣ୍ଡା ଖାଇବାକୁ ଦେଇପାରିବେ। ଗୋଟିଏ ଅଣ୍ଡା ଖାଇବା ଦ୍ୱାରା ପିଲାଟିର ଶରୀରକୁ ପୁଷ୍ଟିକର ଖାଦ୍ୟ ଯୋଗାଇଥାଏ ଏବଂ ସହଜରେ ହଜମ ହୋଇଥାଏ। ଯଦି ଗୋଟିଏରୁ ଅଧିକ ଅଣ୍ଡା ଗ୍ରୀଷ୍ମଋତୁରେ ଖାଇବାକୁ ଦେଉଛନ୍ତି ତେବେ ଏହା ଶରୀର ପାଇଁ ହାନିକାରକ ହୋଇପାରେ। କାରଣ ଅଣ୍ଡାରେ ପ୍ରୋଟିନ୍‌‌ ଭାରି ମାତ୍ରାରେ ରହିଥିବାରୁ ପିଲାଙ୍କର ହଜମ ହେବା କଷ୍ଟକର ହୋଇପାରେ।

Powered by Froala Editor