ଲାଲୁଙ୍କୁ କୌଣସି ମୁହୁର୍ତ୍ତରେ ଗିରଫ କରିପାରେ ପୋଲିସ
![ଲାଲୁଙ୍କୁ କୌଣସି ମୁହୁର୍ତ୍ତରେ ଗିରଫ କରିପାରେ ପୋଲିସ](https://odishanewslens.com/news_gallery/29184_1712484395.jpg)
ପାଟନା: ବିହାରର ପୂର୍ବତନ ସିଏମ ତଥା ରାଷ୍ଟ୍ରୀୟ ଜନତା ଦଳ ସୁପ୍ରିମୋ ଲାଲୁ ପ୍ରସାଦ ଯାଦବଙ୍କୁ କୌଣସି ମୁହୁର୍ତ୍ତରେ ଗିରଫ କରିପାରେ ପୋଲିସ । ୨୭ ବର୍ଷ ତଳର ଏକ ପୁରୁଣା ଅସ୍ତ୍ରଶସ୍ତ୍ର ମାମଲାରେ ଗ୍ବାଲିଅର ପୋଲିସ ଲାଲୁଙ୍କୁ ଆରେଷ୍ଟ ଓ୍ବାରେଣ୍ଟ ଜାରି କରିଛି । ମଧ୍ୟପ୍ରଦେଶର ଏମପି-ଏମଏଲ କୋର୍ଟ ତାଙ୍କ ବିରୋଧରେ ଗିରଫ ପରୱାନା ଜାରି କରିବା ପରେ ଗ୍ୱାଲିଅର ପୋଲିସ ପାଟନା ଅଭିମୁଖେ ବାହାରିଛନ୍ତି। ଏହା ପରେ ମଧ୍ୟପ୍ରଦେଶ ପୋଲିସ ପାଟନାର ବରିଷ୍ଠ ପୋଲିସ ଅଧୀକ୍ଷକଙ୍କ ସହ ଯୋଗାଯୋଗ କରି ଅଧିକ ସହଯୋଗ ଲୋଡିଥିଲେ। ୧୯୯୭ ମସିହାରେ ଜଣେ ଅସ୍ତ୍ରଶସ୍ତ୍ର ବ୍ୟବସାୟୀ ଲାଲୁଙ୍କ ବିରୋଧରେ ବେଆଇନ ଅସ୍ତ୍ରଶସ୍ତ୍ର କାରବାର ନେଇ ଅଭିଯୋଗ ଆଣିଥିଲେ । ଏହାପରେ ତାଙ୍କୁ ସ୍ଥାୟୀ ଓ୍ବାରେଣ୍ଟ ଜାରି କରାଯାଇଥିଲା । ପରେ କୋର୍ଟ ଲାଲୁଙ୍କୁ ପଳାତକ ଘୋଷଣା କରିଥିଲେ ।
୧୯୯୭ ରେ ଗ୍ବାଲିଅରର ବାସିନ୍ଦା ପ୍ରକାଶ ଆର୍ମସ୍ ଷ୍ଟୋର୍ର ଅପରେଟର ପ୍ରଭାସ କୁମାର ଚତୁର୍ବେଦୁ ଇନ୍ଦରଗଞ୍ଜ ଥାନାରେ ଉତ୍ତରପ୍ରଦେଶର ମହୋବାରେ ଅବସ୍ଥିତ ଏକ ଅସ୍ତ୍ରଶସ୍ତ୍ର ଦୋକାନର ଅପରେଟର ରାଜକୁମାର ଶର୍ମାଙ୍କ ବିରୋଧରେ ବେଆଇନ ଅସ୍ତ୍ରଶସ୍ତ୍ର କାରବାର ନେଇ ପୋଲିସ ଷ୍ଟେସନରେ ଅଭିଯୋଗ କରିଥିଲେ। ସେ ଅଭିଯୋଗ କରିଥିଲେ ଯେ, ରାଜକୁମାର ଗ୍ୱାଲିୟର୍ ଏକ ଫାର୍ମରୁ ଅସ୍ତ୍ରଶସ୍ତ୍ର ଏବଂ କାର୍ଟ୍ରିଜ୍ କିଣି ବିହାରରେ ବିକ୍ରି କରିଥିଲେ। ଏହି ମାମଲାରେ ଲାଲୁ ପ୍ରସାଦ ଯାଦବଙ୍କ ସମେତ ୨୩ ଜଣ ସମ୍ପୃକ୍ତ ଥିଲେ ।
ଗତ ଜାନୁଆରୀ ମାସରେ ବହୁଚର୍ଚ୍ଚିତ ରେଳବାଇରେ ଚାକିରି ପାଇଁ ଜମି ହଡପ ମାମଲାରେ ଲାଲୁ ପ୍ରସାଦ ଯାଦବଙ୍କୁ ଜେରା କରିଥିଲା ଇଡି । ଏହି ମାମଲାରେ ଲାଲୁ ଓ ତାଙ୍କ ସାଂସଦ ଝିଅ ମିଶା ଭାରତୀ ପାଟନା ସ୍ଥିତ ପ୍ରବର୍ତ୍ତନ ନିର୍ଦ୍ଦେଶଳାୟରେ ହାଜର ହୋଇଥିଲେ । ଦୀର୍ଘ ୯ ଘଣ୍ଟାରୁ ଅଧିକ ସମୟ ଧରି ଉଭୟଙ୍କୁ ଜେରା କରିବା ପରେ ଛାଡିଥିଲା କେନ୍ଦ୍ରୀୟ ତଦନ୍ତକାରୀ ସଂସ୍ଥା । କାର୍ୟ୍ୟାଳୟ ବାହାରେ ଆରଜେଡି ସମର୍ଥକ ମାନେ ହୋହଲ୍ଲା କରିଥିଲେ । ଚାରା ଘୋଟାଲା ମାମଲାରେ ୧୯୯୭ରେ ଲାଲୁଙ୍କୁ ଗିରଫ ଓ୍ୱାରେଣ୍ଟ୍ ଜାରି ହୋଇଥିଲା । ଏହାପରେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବା ପରେ ପୋଲିସ ତାଙ୍କୁ ଗିରଫ କରିଥିଲା ।
Powered by Froala Editor