ପୁରୀ : ଏକ ସ୍ବତନ୍ତ୍ର କାର୍ଯ୍ୟକ୍ରମରେ ଓଡ଼ିଶା ଗସ୍ତରେ ଆସି ମହାପ୍ରଭୁ ଶ୍ରୀଜଗନ୍ନାଥଙ୍କୁ ଦର୍ଶନ କରିଛନ୍ତି ରାମାୟଣର ସୀତା ଭୂମିକାରେ ଅଭିନୟ କରିଥିବା ଅଭିନେତ୍ରୀ ଦୀପିକା ଚିଖଲିଆ ଓ ତାଙ୍କ ସ୍ବାମୀ। ରବିବାର ଭିଡ ସତ୍ତ୍ବେ ମହାପ୍ରଭୁଙ୍କ ଦର୍ଶନ ସହ ଆଶିଷ ଲାଭ କରି ଖୁସି ପ୍ରକାଶ କରିଛନ୍ତି। ଶ୍ରୀଜୀଉଙ୍କ ସମେତ ମାଆ ବିମଳା, ଲକ୍ଷ୍ମୀ ଓ ଅନ୍ୟାନ୍ୟ ପାର୍ଶ୍ବ ଦେବଦେବୀଙ୍କ ଦର୍ଶନ କରିବା ସହିତ କୋଣାର୍କ ସୂର୍ଯ୍ୟମନ୍ଦିର ପରିଦର୍ଶନ କରିଥିବା ଜଣାପଡ଼ିଛି। ଭୁବନେଶ୍ୱର ବିମାନ ବନ୍ଦରରେ ପହଞ୍ଚିବା ପରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ସେ କହିଥିଲେ ଯେ, ଓଡିଶାର ଏହି ପବିତ୍ର ଧାମରେ ପହଞ୍ଚି ବହୁତ ଖୁସି ଲାଗୁଛି। ମହାପ୍ରଭୁ ଶ୍ରୀ ଜଗନ୍ନାଥଙ୍କ ଡୋରି ଯୋଗୁଁ ଦର୍ଶନ ସମ୍ଭବ ହୋଇପାରିଛି। ପ୍ରାୟ ୩୦ ବର୍ଷ ପୂର୍ବେ ମୁଁ ପୁରୀ ଆସିଥିଲି। ଏବେ ଏଠାରେ ଅନେକ ପରିବର୍ତ୍ତନ ହୋଇଛି। ମନ୍ଦିର ଚତୁଃପାର୍ଶ୍ବ ନୂଆରୂପ ପାଇଛି। ପ୍ରଭୁ ସମସ୍ତଙ୍କ ମଙ୍ଗଳ କରନ୍ତୁ ବୋଲି ସେ ପ୍ରାର୍ଥନା କରିଥିବା ବେଳେ ସନାତନ ଧର୍ମକୁ ସମସ୍ତେ ରକ୍ଷା କରିବା ସହ ଏହାର ପ୍ରଚାର ପ୍ରସାର କରିବା ଉପରେ ସେ ଗୁରୁତ୍ବାରୋପ କରିଥିଲେ। ସେହିପରି ଓଡ଼ିଶାର କଳାସଂସ୍କୃତି ମହାନ କେବଳ ଓଡ଼ିଶା କାହିଁ ଭାରତର କଳାସଂସ୍କୃତିର ସ୍ବତନ୍ତ୍ରତା ରହିଛି। ଏହାସହ ଓଡ଼ିଶାର ସମ୍ବଲପୁର ଶାଢ଼ି ମତେ ବହୁତ ଭଲ ଲାଗେ ଏବଂ ଯାହା ହେଲେ ବି ଶାଢି ନିଶ୍ଚୟ ନେଇକି ଯିବି ବୋଲି କହିଥିଲେ। ସୂଚନାଯୋଗ୍ୟ, ସୀତା ଭୂମିକାରେ ଅଭିନୟ କରି ସେ ସାରା ଦେଶରେ ସମସ୍ତଙ୍କ ଦୃଦୟରେ ରହିଛନ୍ତି। ଅଯୋଧ୍ୟା ରାମମନ୍ଦିର ଶୁଭାରମ୍ଭରେ ମଧ୍ୟ ସେ ଯୋଗଦେଇ ବିଶେଷ ଆକର୍ଷଣ ପାଲଟିଥିଲେ।

Powered by Froala Editor