ବିହାର ରାଜ୍ୟର ଜାମୁଇ ଜିଲ୍ଲାର ଚନ୍ଦ୍ରଦୀପ ଥାନା ଅନ୍ତର୍ଗତ ଇସ୍‌ଲାମ୍‌ନଗରରେ ସ୍ତ୍ରୀ ପାଖକୁ ଭିଡିଓ କଲ୍‌ କରି ଜଣେ ବ୍ୟକ୍ତି ନିଜେ ନିଜକୁ ଗୁଳି ମାରି ଦେଇଛି । ଘଟଣାସ୍ଥଳରେ ହିଁ ତାର ମୃତ୍ୟୁ ଘଟିଛି । ଉଭୟ ପ୍ରେମ ବିବାହ କରିଥିଲେ। କିନ୍ତୁ ପାରିବାରିକ ପ୍ରସଙ୍ଗକୁ ନେଇ ଉଭୟଙ୍କ ମଧ୍ୟରେ କିଛି ଦିନ ହେବ ତିକ୍ତତା ଚାଲିଥିଲା। ସମ୍ଭବତଃ ଏଥିରେ ଉତକ୍ଷିପ୍ତ ହୋଇ ବ୍ୟକ୍ତି ଜଣଙ୍କ ନିଜକୁ ନିଜେ ଗୁଳି କରି ଦେଇଥିବା କୁହାଯାଉଛି।

ମୃତ ସ୍ବାମୀ ହେଉଛନ୍ତି ଯମୁନା ଚୌଧୁରୀଙ୍କ ୨୮ ବର୍ଷିୟ ପୁଅ ଜିତେନ୍ଦ୍ର କୁମାର। ଗତ କେତେ ବର୍ଷ ହେବ ମିର୍ଜାଗଞ୍ଜବାସିନୀ ଭାରତୀ କୁମାରୀଙ୍କ ସହିତ ଜିତେନ୍ଦ୍ରଙ୍କର ପ୍ରେମ ସମ୍ପର୍କ ଥିଲା। ତାଙ୍କୁ ବିଭା ହେବା ପାଇଁ ଜିତେନ୍ଦ୍ର ନିଜ ପରିବାର ଲୋକଙ୍କୁ କୌଣସି ମତେ ବୁଝାଇ ରାଜି କରାଇଥିଲେ। ତା’ପରେ ସିମାରିଆ ଅଞ୍ଚଳରେ ଥିବା ଗୋଟାଏ ଶିବ ମନ୍ଦିରରେ ଜିତେନ୍ଦ୍ର ଓ ଭାରତୀଙ୍କର ବାହାଘର ହୋଇଥିଲା। ସେମାନଙ୍କର ୪ ବର୍ଷର ପୁଅଟିଏ ମଧ୍ୟ ଅଛି। ସବୁ କିଛି ଠିକ ଠାକ ଚାଲିଥିବା ବେଳେ ସପ୍ତାହକ ତଳେ ପାରିବାରିକ କଳହ ଦେଖିବାକୁ ମିଳିଥିଲା। ଏଥିରେ ରାଗି ଯାଇ ଭାରତୀ ମିରାଗଞ୍ଜ ଅଞ୍ଚଳରେ ଥିବା ତାଙ୍କ ବାପାଙ୍କ ଘରକୁ ଚାଲି ଯାଇଥିଲେ।

ଜିତେନ୍ଦ୍ର ଏଥିରେ ବ୍ୟସ୍ତ ହୋଇ ଭାରତୀଙ୍କୁ ବୁଝାଇବାକୁ ଲାଗିଥିଲେ। ତାଙ୍କ ଘରକୁ ଫେରି ଆସିବାକୁ ଅନୁରୋଧ କରିଥିଲେ। କିନ୍ତୁ ଭାରତୀ ଏତେ ରାଗିଥିଲେ ଯେ ସେ ଜିତେନ୍ଦ୍ରଙ୍କ କୌଣସି କଥା ଶୁଣି ନଥିଲେ। ଏପରି କି ମୋବାଇଲ ଅଫ କରିଦେଇଥିଲେ।

ଶନିବାର ରାତି ଅଧରେ ଜିତେନ୍ଦ୍ର ଭାରତୀଙ୍କ ପାଖକୁ ଭିଡିଓ କଲ୍‌ କରି ଘରକୁ ଫେରାଇ ଆଣିବାକୁ ବୁଝାଇ ଥିଲେ। କିନ୍ତୁ, ଭାରତୀ ରାଜି ହେଲେ ନାହିଁ। ଦୁହେଁ ଝଗଡ଼ା ଲାଗିଲେ ଏବଂ ଜିତେନ୍ଦ୍ର ଦେଶୀ ପିସ୍ତଲ ବାହାର କରି ନିଜ ମୁଣ୍ଡକୁ ଗୁଳି ମାରିଲେ। ଗୁଳି ଫୁଟିବା ଶବ୍ଦ ଶୁଣି ପରିବାର ଲୋକ‌େ ଜିତେନ୍ଦ୍ରଙ୍କ କୋଠରିକୁ ଧାଇଁ ଆସିଲେ। ସେତେବେଳକୁ ଜିତେନ୍ଦ୍ରଙ୍କର ମୃତ୍ୟୁ ହୋଇଯାଇଥିଲା।

Powered by Froala Editor