ମନ୍ତ୍ରୀଙ୍କ ବିବାଦୀୟ ମନ୍ତବ୍ୟ : ଋଣ ଛାଡ଼ ପାଇଁ କୃଷକ ଚାହୁଁଛନ୍ତି ମରୁଡ଼ି ହେଉ
![ମନ୍ତ୍ରୀଙ୍କ ବିବାଦୀୟ ମନ୍ତବ୍ୟ : ଋଣ ଛାଡ଼ ପାଇଁ କୃଷକ ଚାହୁଁଛନ୍ତି ମରୁଡ଼ି ହେଉ](https://odishanewslens.com/news_gallery/26837_1703531477.jpg)
କର୍ନାଟକର ମୁଖ୍ୟମନ୍ତ୍ରୀ ସିଦ୍ଧରମେୟା ସରକାରରେ ଆଖୁ ବିକାଶ ମନ୍ତ୍ରୀ ଶିବାନନ୍ଦ ପାଟିଲଙ୍କ ବିବୃତ୍ତି ସୋସିଆଲ ମିଡିଆରେ ଭାଇରାଲ ହେଉଛି। ଭିଡିଓରେ ସେ କହୁଛନ୍ତି 'କୃଷକମାନେ ଚାହୁଁଛନ୍ତି ମରୁଡ଼ି ପଡୁ। ଏଭଳି ହେଲେ ସରକାର ତାଙ୍କ ଋଣ ଛାଡ଼ କରିଦେବେ।' କୃଷକମାନଙ୍କୁ ନେଇ ଏଭଳି କିଛି ବିବାଦୀୟ ମନ୍ତବ୍ୟକୁ ନେଇ ଏବେ ବିବାଦ ଉପୁଜିବାରେ ଲାଗିଛି। ସିଦ୍ଧରମେୟା ସରକାରଙ୍କ ମନ୍ତ୍ରୀଙ୍କୁ ଚାରୁଆଡୁ ଟାର୍ଗେଟ୍ କରାଯାଇଛି।
ନିକଟରେ ଚିକ୍କୋଡିରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗଦେଇ କର୍ଣ୍ଣାଟକ ସରକାରଙ୍କ ଆଖୁ ଚାଷ ବିକାଶ ମନ୍ତ୍ରୀ ଶିବାନନ୍ଦ ପାଟିଲ କୃଷକମାନଙ୍କୁ ନେଇ ଏକ ବିବାଦୀୟ ମନ୍ତବ୍ୟ ଦେଇଛନ୍ତି। ସେ କହିଦେଇଛନ୍ତି ଯେ, ଚାଷୀମାନେ ମାଗଣାରେ କୃଷ୍ଣା ନଦୀ ଜଳ ପାଆନ୍ତି। ଏହା ବ୍ୟତୀତ ବିଦ୍ୟୁତ ମଧ୍ୟ ମାଗଣା । ବିଭିନ୍ନ ମୁଖ୍ୟମନ୍ତ୍ରୀ ମଧ୍ୟ ମାଗଣାରେ ସାର ଓ ମଞ୍ଜି ଦେଉଛନ୍ତି। ଏଭଳି ପରିସ୍ଥିତିରେ, ଚାଷୀମାନଙ୍କର କେବଳ ଗୋଟିଏ ଇଚ୍ଛା ଅଛି, ଯେକୌଣସି ଉପାୟରେ ପ୍ରତିବର୍ଷ ମରୁଡ଼ି ପରିସ୍ଥିତି ସୃଷ୍ଟି ହେବା ଉଚିତ ଯାହାଦ୍ୱାରା ସେମାନଙ୍କର ଋଣ ଛାଡ଼ ହୋଇ ପାରିବ।
ଭିଡିଓ ଭାଇରାଲ ହେବା ପରେ ଭାଜପା କଂଗ୍ରେସ ସରକାରଙ୍କୁ କଡ଼ା ସମାଲୋଚନା କରିଛି। ଭାଜପା କହିଛି ସିଦ୍ଦରାମାୟାଙ୍କ କ୍ୟାବିନେଟରେ କେବଳ ମୂର୍ଖ ରହିଛନ୍ତି। ଭାଜପା କହିଛି କଂଗ୍ରେସର କୃଷକ ବିରୋଧୀ ସରକାର ଚାଷୀଙ୍କୁ ପରିହାସ କରୁଛନ୍ତି। ଏଥିସହ ତୁରନ୍ତ ଶିବନନ୍ଦ ପାଟିଲ ଦେଇଥିବା ବୟାନକୁ ଫେରାଇ ନେବା ସହ କୃଷକମାନଙ୍କୁ କ୍ଷମା ମାଗନ୍ତୁ ବୋଲି ଭାଜପା ଦାବି କରିଛି।
Powered by Froala Editor