ଦୁନିଆର ସବୁଠୁ ବଡ କର୍ପୋରେଟ କାର୍ୟ୍ୟାଳୟ ଭବନ 'ସୁରଟ ଡାଇମଣ୍ଡ ବୋର୍ସ'ର ଉଦଘାଟନ କଲେ ମୋଦି
ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ଗୁଜୁରାଟ ଗସ୍ତ କରିଛନ୍ତି । ପ୍ରଧାନମନ୍ତ୍ରୀ ସୁରଟ ଗସ୍ତରେ ଆସି ଆଜି ଦୁନିଆର ସବୁଠୁ ବଡ କର୍ପୋରେଟ କାର୍ୟ୍ୟାଳୟ ଭବନ 'ସୁରଟ ଡାଇମଣ୍ଡ ବୋର୍ସ'ର ଉଦଘାଟନ କରିଛନ୍ତି । ଏହି ଡାଇମଣ୍ଡ ବୋର୍ସ ବିଶ୍ବର ବୃହତ୍ତମ ହୀରା ବ୍ୟବସାୟ ପେଣ୍ଠସ୍ଥଳ, ଯାହାକି ଆମେରିକାର ସେନା ମୁଖ୍ୟାଳୟ ପେଣ୍ଟାଗନ ଠାରୁ ମଧ୍ୟ ବହୁତ ବଡ଼ ଅଟେ । ପ୍ରାୟ ୩,୫୦୦ କୋଟି ଟଙ୍କା ବ୍ୟୟରେ 'ସୁରଟ ଡାଇମଣ୍ଡ ବୋର୍ସ' ହୀରା ବଜାର ନିର୍ମିତ ହୋଇଛି । ଦୀର୍ଘ ୮୦ ବର୍ଷ ଧରି ବିଶ୍ୱର ସବୁଠାରୁ ବଡ଼ ଅଫିସ ମାନ୍ୟତା ପାଇଥିଲା ପେଣ୍ଟାଗନ, ଯାହାକୁ ପଛରେ ପକାଇ ଦେଇଛି ସୁରଟ ଡାଇମଣ୍ଡ ବୋର୍ସ ।
୬୭ ଲକ୍ଷ ବର୍ଗଫୁଟ ଜାଗାରେ ନିର୍ମିତ ହୋଇଛି ସୁରଟ ଡାଇମଣ୍ଡ ବୋର୍ସ । ଏଥିରେ ୪ ହଜାର ୫୦୦ରୁ ଅଧିକ ହୀରା ବ୍ୟବସାୟ ଅଫିସ ରହିଛି । ୧୫ ମହଲା ବିଶିଷ୍ଟ ଏହି କୋଠାର ଡିଜାଇନ ଭାରତୀୟ ଆର୍କିଟେକ୍ଟ କମ୍ପାନୀ ମାର୍ଫୋଜେନେସିସ୍ କରିଛି । ଏହି କୋଠାରେ ୧୩୧ଟି ଲିଫ୍ଟ ସହ କ୍ଲବ୍, କନଫରେନ୍ସ ହଲ୍, ହେଲ୍ଥ୍ କ୍ଲବ୍, ରେସ୍ତୋରାଁ, ବଙ୍କେଟ୍ ହଲ ରହିଛି । ଏଠାରେ ୬୭ ହଜାର ଲୋକ ଏକାଠି କାମ କରିପାରିବେ । ଏହି ବିଲ୍ଡିଂ ତିଆରି କରିବାକୁ ପ୍ରାୟ ୪ ବର୍ଷ ସମୟ ଲାଗିଥିଲା ।
Powered by Froala Editor
