ଭିତ୍ତିହୀନ ଚଞ୍ଚକତା ପଦାରେ ପଡ଼ିଲା: ପୋଲିସ ସମନ୍କୁ ଏଡ଼ାଉନାହାନ୍ତି ଭିକେ ପାଣ୍ଡିଆନ୍, ତଦନ୍ତରେ ସମ୍ପୂର୍ଣ୍ଣ ସହଯୋଗର ଚେତାବନୀ
ଭୁବନେଶ୍ୱର: ସମନ୍କୁ ଏଡ଼ାଇ ଯାଉଛନ୍ତି କି ଭିକେ ପାଣ୍ଡିଆନ୍? ନା ରାଜନୈତିକ ସ୍ୱାର୍ଥ ହାସଲ ପାଇଁ ରଚାଯାଉଛି ଅତି ନିମ୍ନମାନର ମିଛ ନାରେଟିଭ୍? ପୂର୍ବତନ ଆଇଏଏସ୍ ତଥା ବିଜେଡି ନେତା ଭିକେ ପାଣ୍ଡିଆନ୍ ପୋଲିସ ସମନ୍କୁ ଅଣଦେଖା କରୁଛନ୍ତି ବୋଲି ପ୍ରଚାର କରାଯାଉଥିବା ଖବର ସମ୍ପୂର୍ଣ୍ଣ ଭିତ୍ତିହୀନ, ମନଗଢ଼ା ଏବଂ ଏକ ଉଦ୍ଦେଶ୍ୟପ୍ରଣୋଦିତ ଷଡ଼ଯନ୍ତ୍ର ବୋଲି ପ୍ରମାଣିତ ହୋଇଛି। ରାଜନୈତିକ ପ୍ରତିପକ୍ଷ ଓ ଗଣମାଧ୍ୟମର ଏକ ଗୋଷ୍ଠୀ ଦ୍ୱାରା ଚାଲିଥିବା ଅପପ୍ରଚାରକୁ ଧୂଳିସାତ୍ କରି ସରକାରୀ ରେକର୍ଡ ଦର୍ଶାଉଛି ଯେ, ନୋଟିସ୍ ପାଇବା ମାତ୍ରେ ହିଁ ପାଣ୍ଡିଆନ୍ ତୁରନ୍ତ ଉତ୍ତର ରଖିଛନ୍ତି ଏବଂ ତଦନ୍ତରେ ସମ୍ପୂର୍ଣ୍ଣ ସହଯୋଗ କରିବାକୁ ନିଜର ଆଗ୍ରହ ସ୍ପଷ୍ଟ କରିଛନ୍ତି।
ପୋଲିସର ନୋଟିସ୍କୁ ନେଇ ସୃଷ୍ଟି କରାଯାଇଥିବା ଏହି ବିବାଦ ପଛରେ ରହିଛି ଚତୁର ଚଞ୍ଚକତା। ଶ୍ରୀ ପାଣ୍ଡିଆନ୍ ଦେଇଥିବା ଆଧିକାରିକ ଜବାବର ପ୍ରମୁଖ ତଥ୍ୟଗୁଡ଼ିକୁ ସେନ୍ସର କରି, କେବଳ ଅଧା-ଅଧୁରା ସୂଚନା ଲିକ୍ କରାଯାଇ ସାଧାରଣ ଜନତାଙ୍କୁ ଭ୍ରମିତ କରିବାକୁ ନୀଚ ପ୍ରୟାସ କରାଯାଇଥିଲା।
ପ୍ରକୃତ ସତ୍ୟ ହେଉଛି, ପୂର୍ବ ନିର୍ଦ୍ଧାରିତ ପେସାଦାର ପ୍ରତିଶ୍ରୁତି ପାଇଁ ବର୍ତ୍ତମାନ ଦେଶ ବାହାରେ ଥିଲେ ହେଁ, ନୋଟିସ୍ ମିଳିବା କ୍ଷଣି ସେ ପୋଲିସ ସହ ତୁରନ୍ତ ଯୋଗାଯୋଗ କରି ତଦନ୍ତ ପ୍ରକ୍ରିୟାରେ ଶତପ୍ରତିଶତ ସହଯୋଗର ବାର୍ତ୍ତା ଦେଇଛନ୍ତି। ସେ ପୋଲିସକୁ ନିଜର ଭ୍ରମଣ ସୂଚୀ ଜଣାଇବା ସହ ସ୍ପଷ୍ଟ କରିଛନ୍ତି ଯେ, ସେ ୧୨ ତାରିଖରେ ଭାରତ ଫେରୁଛନ୍ତି ଏବଂ ଫେରିବା ମାତ୍ରେ ହିଁ ବିନା କୌଣସି ବିଳମ୍ବରେ ପୋଲିସ ସାମ୍ନାରେ ଉପସ୍ଥିତ ହୋଇ ତଦନ୍ତରେ ସିଧାସଳଖ ଭାଗ ନେବେ। ଏହାବାଦ୍, ଯଦି ମାମଲା ଅତି ଜରୁରୀ, ତେବେ ପୋଲିସଙ୍କ ସୁବିଧା ଅନୁସାରେ ସେ ଯେକୌଣସି ସମୟରେ ଭିଡିଓ କନଫରେନ୍ସିଂ ମାଧ୍ୟମରେ ତୁରନ୍ତ ଯୋଡ଼ିହୋଇ ନିଜର ବୟାନ ରଖିବାକୁ ମଧ୍ୟ ସମ୍ପୂର୍ଣ୍ଣ ପ୍ରସ୍ତୁତ ଅଛନ୍ତି।
ଉପସ୍ଥିତ ହେବା ପାଇଁ ଏକ ସ୍ପଷ୍ଟ ତାରିଖ ଦେବା ସହ ଜରୁରୀ ପରିସ୍ଥିତିରେ ଭିଡିଓ କନଫରେନ୍ସିଂ ପାଇଁ ନିଜେ ଆଗ୍ରହ ପ୍ରକାଶ କରିଥିବା ଜଣେ ବ୍ୟକ୍ତିଙ୍କୁ "ଫେରାର୍" କିମ୍ବା "ସମନ୍ ଏଡ଼ାଉଥିବା" ବ୍ୟକ୍ତି ଭାବେ ଚିତ୍ରିତ କରିବା କେବଳ ଏକ ନିମ୍ନମାନର ରାଜନୈତିକ ଚାଲ୍ ଛାଡ଼ି ଆଉ କିଛି ନୁହେଁ। ବିଜେପି ଓ ତାଙ୍କ ସମର୍ଥିତ ଗଣମାଧ୍ୟମର ଏହି ପ୍ରୟୋଜିତ ଓ ମନଗଢ଼ା ନାରେଟିଭ୍ର ମୁଖା ଏବେ ସମ୍ପୂର୍ଣ୍ଣ ଖୋଲିଯାଇଛି। ସାଧାରଣ ଜନତା ଏହି ଭ୍ରାନ୍ତ ପ୍ରଚାରକୁ ପ୍ରତ୍ୟାଖ୍ୟାନ କରି ସତ୍ୟକୁ ଗ୍ରହଣ କରିବାକୁ ଆହ୍ୱାନ ଦିଆଯାଇଛି।
Powered by Froala Editor
