ଅଜା ସହ ଗାଧୋଇବାକୁ ଯାଇଥିଲେ, ବୁଡ଼ିଗଲେ ୨ ଭଉଣୀ
ଗଞ୍ଜାମ ଜିଲ୍ଲା ଶେରଗଡ଼ ବ୍ଲକ ହିଂଜିଳି ଥାନା ନରେନ୍ଦ୍ରପୁର ପଞ୍ଚାୟତର କୀର୍ତ୍ତିପୁର ଗାଁରେ ପୋଖରୀରେ ବୁଡ଼ି ଦୁଇ ଭଉଣୀଙ୍କ ମୃତ୍ୟୁ ଘଟିଛି। ମୃତ ୨ ନାବାଳିକା କବିସୂର୍ଯ୍ୟନଗର ଥାନା ଜରଡ଼ ଗ୍ରାମର ଅବକାଶ ରାଉତଙ୍କ କନ୍ୟା ରୋଷନୀ (୧୦) ଓ ସନ୍ଧ୍ୟାରାଣୀ (୭)।
ଗ୍ରାମର ଅବକାଶ ରାଉତଙ୍କ ପାରିବାରିକ କଳହ ଯୋଗୁ ସ୍ତ୍ରୀ ଓ ନାବାଳିକା ୨ ଝିଅ ଦୀର୍ଘ ଦିନ ଧରି ଅଜାଙ୍କ ଘର କୀର୍ତ୍ତିପୁର ଗ୍ରାମରେ ରହି ଆସୁଥିଲେ। ରବିବାର ୨ ଭଉଣୀ ଟିଉସନରୁ ଫେରି ଗାଁ ମୁଣ୍ଡରେ ଥିବା ପାତ୍ର ବନ୍ଧକୁ ଗାଧୋଇବା ପାଇଁ ଅଜା ନାର୍ସୁ ପୋଲାଇଙ୍କ ସହ ଆସିଥିଲେ। ୨ ଭଉଣୀଙ୍କୁ ଗାଧୋଇବା ପରେ ପୋଖରୀ କୂଳରେ ଛିଡ଼ା କରି ଅଜା ପୋଷାକ ସଫା କରିବା ପାଇଁ ପୋଖରୀକୁ ଯାଇଥିଲେ। ଏହି ସମୟରେ ୨ ଭଉଣୀ ଗାଧୋଇବା ପାଇଁ ପୁଣି ପୋଖରୀ ଭିତରକୁ ଯାଇ ବୁଡ଼ି ଯାଇଥିଲେ।
ପୋଖରୀ ନିକଟରେ ୨ ନାତୁଣୀ ନ ଥିବା ଦେଖି ଘରକୁ ଫେରିଥିଲେ ଅଜା। ଘରକୁ ଫେରିବା ପରେ ଘରେ ୨ ନାତୁଣୀଙ୍କୁ ନ ଦେଖି ଗ୍ରାମବାସୀଙ୍କ ସହାୟତାରେ ପୋଖରୀରେ ଖୋଜାଖୋଜି କରିଥିଲେ। ପୋଖରୀ ଭିତରୁ ଗ୍ରାମବାସୀ ୨ ଭଉଣୀଙ୍କ ମୃତଦେହକୁ ଉଦ୍ଧାର କରିଥିଲେ।
Powered by Froala Editor
