ହରିୟାଣାର ପାନିପଥରୁ ଏକ ଦୁଃଖଦ ଘଟଣା ସାମ୍ନାକୁ ଆସିଛି। ରାସ୍ତାରେ ଯାଉ ଯାଉ ମୁଣ୍ଡ ଉପରୁ ଖସିଲା ମୃତ୍ୟୁ। ପାଖରେ ଥିବା ସିସିଟିଭିରେ କଏଦ ହୋଇଗଲା ଏହି ଛାତିଥରା ଦୃଶ୍ୟ । ସ୍ବାମୀ ଓ ସ୍ତ୍ରୀ ଦୁହେଁ ହସଖୁସିରେ ମାର୍କେଟିଂ ପାଇଁ ଯାଉଥିବା ବେଳେ ଭଙ୍ଗା ଯାଉଥିବା ଘରର କାନ୍ଥ ଦମ୍ପତିଙ୍କ ଉପ‌ରେ ଭୁଶୁଡ଼ି ପଡ଼ିଥିଲା। ଫଳରେ ଘଟଣାସ୍ଥଳରେ ହିଁ ସ୍ତ୍ରୀଙ୍କ ସାମ୍ନାରେ ସ୍ବାମୀଙ୍କ ପ୍ରାଣବାୟୁ ଉଡ଼ିଯାଇଥିଲା। ମୃତ ସ୍ବାମୀଙ୍କ ବୟସ ୩୫ବର୍ଷ ଓ ନାମ ସୁଶୀଲ ବୋଲି ଜଣାପଡ଼ିଛି।

ସୂଚନାଯୋଗ୍ୟ, ପାନିପଥ ନିକଟସ୍ଥ ପଚରଙ୍ଗ ମାର୍କେଟରେ ଥିବା  ଏକ ଘର ଗତକାଲି ଭଙ୍ଗା ଯାଉଥିଲା । ଏହିଘର ୮୦ବର୍ଷ ତଳର ବୋଲି କୁହାଯାଉଛି। ଘର ଭଙ୍ଗା ପାଇଁ ମାଲିକ ଶ୍ରମିକଙ୍କୁ ନିୟୋଜିତ କରିଥିବା ବେଳେ ରାସ୍ତା ଅବରୋଧ କରି ନଥିଲେ କି  କୌଣସି ସତର୍କତାମୂଳକ ପଦକ୍ଷେପ ଗ୍ରହଣ କରାଯାଇ ନ ଥିଲା। ଫଳରେ ଘରଭଙ୍ଗା ଚାଲିଥିବା ବେଳେ ଲୋକେ ସେହି ରାସ୍ତାରେ ଯାତାୟାତ କରୁଥିଲେ।

ଉକ୍ତ ସମୟରେ ଏକ ଦମ୍ପତି ବାଇକ୍‌ରେ ଯାଉଥିବା ବେଳେ ହଠାତ୍‌ ଭଙ୍ଗା ଯାଉଥିବା ଘର ସେମାନଙ୍କ ଉପରେ ଭୁଶୁଡ଼ି ପଡ଼ିଥିଲା। ଇଟା, ସିମେଣ୍ଟ ତଳେ ଚାପି ହୋଇ ଘଟଣାସ୍ଥଳରେ ବ୍ୟକ୍ତିଙ୍କ ମୃତ୍ୟୁ ହୋଇଥିବା ବେଳେ ତାଙ୍କ ପତ୍ନୀ ଆହତ ହୋଇଥିଲେ। ଏହି ଅଘଟଣ ବେଳେ ସେହି ରାସ୍ତାରେ ଯାଉଥିବା ଆଉ ଜଣେ ବ୍ୟକ୍ତିଙ୍କ ଗୋଡ଼ ଭାଙ୍ଗି ଯାଇଥିବା ଜଣାଯାଇଛି।

ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଥିଲା। ଲୋକଙ୍କ ଚଳାଚଳ ବେଳେ ଘର ଭଙ୍ଗା ଯାଉଥିବା ବେଳେ କୌଣସି ପ୍ରତିଷେଧକମୂଳକ ପଦକ୍ଷେପ ଗ୍ରହଣ କରା ନ ଯିବାରୁ ଅକାଳରେ ଏକ ଜୀବନ ଚାଲିଗଲା ବୋଲି ଅଭିଯୋଗ ହେଲା।

Powered by Froala Editor