ବାଘ ମୁହଁରୁ ୭ ବର୍ଷର ଭାଇକୁ ଟାଣି ଆଣିଲା ଭଉଣୀ
![ବାଘ ମୁହଁରୁ ୭ ବର୍ଷର ଭାଇକୁ ଟାଣି ଆଣିଲା ଭଉଣୀ](https://odishanewslens.com/news_gallery/24754_1695928812.jpg)
ଉତ୍ତରାଖଣ୍ଡର ପୌଡି ଜିଲ୍ଲାର ଭଟୋଲି ଗାଁରେ ଜଣେ ଭଉଣୀ ବାଘ ମୁହଁରୁ ତାର ୭ ବର୍ଷ ଭାଇକୁ ଟାଣି ଆଣିଛି। ଏହି ଘଟଣାପରେ ୧୦ବର୍ଷର ଝିଅକୁ ଗ୍ରାମବାସୀ ଭୁରିଭୁରି ପ୍ରଶଂସା କରୁଛନ୍ତି।
ଭଟୋଲି ଗାଁରେ ସୋମବାର ସନ୍ଧ୍ୟାରେ ପ୍ରିୟାଂଶି ନାମ୍ନୀ ନାବାଳିକା ନିଜ ୭ ବର୍ଷର ଭାଇ ପ୍ରିନ୍ସ ସହ ଘର ଅଗଣାରେ ପାଠ ପଢ଼ୁଥିଲେ। ଉକ୍ତ ସମୟରେ ଏକ ବାଘ ଆସି ହଠାତ୍ ପ୍ରିନ୍ସ ପିଠି ଉପରକୁ ଝାମ୍ପିଥିଲା। ଏହାଦେଖି ପ୍ରିୟାଂଶି ହଠାତ୍ ଚିଲାଇବା ସହ ନିଜ ଭାଇକୁ ଟାଣି ଆଣିଥିଲେ। ଫଳରେ ଉଭୟ କିଛି ଦୂରରେ ଛିଟିକି ପଡ଼ିଥିଲେ।
ଘର ଅଗଣାରେ ଭାଇଭଉଣୀଙ୍କ କାନ୍ଦ ଶୁଣି ପରିବାର ଓ ପଡ଼ିଶା ଲୋକ ଧାଇଁ ଆସିଥିଲେ। ଲୋକଙ୍କ ଗହଳି ଦେଖି ବାଘ ନିକଟସ୍ଥ ଜଙ୍ଗଲକୁ ଦୌଡ଼ି ଚାଲି ଯାଇଥିଲା। ତେବେ ବାଘ ଆକ୍ରମଣରେ ପ୍ରିନ୍ସ ଆହତ ହୋଇଥିବା ଦେଖି ପରିବାର ଲୋକେ ପୁଅକୁ ଘଟଣାସ୍ଥଳରୁ ଉଦ୍ଧାର କରି ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରିଥିଲେ। ସେଠାରେ ଚିକିତ୍ସା ପରେ କିଛି ଔଷଧ ଦେଇ ଡାକ୍ତର ପ୍ରିନ୍ସକୁ ଘରକୁ ପଠାଇ ଦେଇଥିଲେ।
Powered by Froala Editor