ଭୁବନେଶ୍ୱର: ରାଜ୍ୟ ସରକାରଙ୍କ ନିର୍ଦ୍ଦେଶକୁ ମାନିବେନି ଅଙ୍ଗନବାଡି ସଂଘ । ଶିକ୍ଷକ ଆନ୍ଦୋଳନ ଚାଲିଥିବାରୁ ଅଙ୍ଗନବାଡି କର୍ମୀଙ୍କୁ ସ୍କୁଲର ମଧ୍ୟାହ୍ନ ଭୋଜନ ଦାୟିତ୍ୱ ଦେବାକୁ କେତେକ ଡିଇଓ ଯୋଜନା କରିଛନ୍ତି । ହେଲେ ଏହା ବିରୋଧରେ ସ୍ୱର ଉଠିଲାଣି । ବିଦ୍ୟାଳୟରେ ଅଙ୍ଗନବାଡି କର୍ମୀ ରୋଷେଇ କରିବେ ନାହିଁ ବୋଲି କହିଛନ୍ତି । ଶିକ୍ଷକ ଆନ୍ଦୋଳନରେ ସେମାନେ ମୁଣ୍ଡ ପୁରାଇବେ ନାହିଁ ବୋଲି କହିଛି ଅଙ୍ଗନବାଡି ସଂଘ । ଆବଶ୍ୟକ ପଡ଼ିଲେ ଶିକ୍ଷକ ଆନ୍ଦୋଳନକୁ ସେମାନେ ସମର୍ଥନ ଜଣାଇବେ ବୋଲି କହିଛନ୍ତି ।
ହାଇସ୍କୁଲ ଶିକ୍ଷକ ଶିକ୍ଷୟିତ୍ରୀ ପ୍ରାଥମିକ ବିଦ୍ୟାଳୟରେ ପଢ଼ାଇବା କିମ୍ବା ମଧ୍ୟାହ୍ନଭୋଜନ କାର୍ୟ୍ୟ ବୁଝିପାରିବେ ନାହିଁ ବୋଲି ଓଡ଼ିଶା ମାଧ୍ୟମିକ ସ୍କୁଲ ଶିକ୍ଷକ ସଂଘ  ରୋକଠୋକ୍‌ ଶୁଣାଇ ଦେଇଛି। ଓଷ୍ଟା ସାଧାରଣ ସମ୍ପାଦକ ରଞ୍ଜନ ଦାଶ ଗଣଶିକ୍ଷା ସଚିବ ଅଶ୍ବଥୀ ଏସ୍‌ଙ୍କୁ ପତ୍ର ଲେଖି କହିଛନ୍ତି, ହାଇସ୍କୁଲ ଶିକ୍ଷକ ଶିକ୍ଷୟିତ୍ରୀଙ୍କୁ ପ୍ରାଥମିକ ବିଦ୍ୟାଳୟ ଦାୟିତ୍ବ ବୁଝିବା ଓ ମଧ୍ୟାହ୍ନଭୋଜନ ପରିଚାଳନା କରିବାକୁ କିଛି ଡିଇଓ ନିର୍ଦ୍ଦେଶ ଦେଇଛନ୍ତି । ଚଳିତ ଶିକ୍ଷାବର୍ଷରେ ହାଇସ୍କୁଲ ଶିକ୍ଷକ ଅନେକ ଓରିଏଣ୍ଟେସନ କାର୍ୟ୍ୟକ୍ରମରେ ସାମିଲ ହୋଇଥିବାରୁ ପିଲାଙ୍କ ପାଠପଢ଼ା ପଛାଇଛି ।

ଯେଉଁଥିପାଇଁ ଦଶମ ଷାଣ୍ମାସିକ ପରୀକ୍ଷା ଗୋଟିଏ ମାସ ଘୁଞ୍ଚାଇ ଅକ୍ଟୋବରରେ କରିବାକୁ ନିଷ୍ପତ୍ତି ହୋଇଛି । ଏଭଳି ସ୍ଥିତିରେ ଯଦି ଶିକ୍ଷକ ଶିକ୍ଷୟିତ୍ରୀ ପ୍ରାଥମିକ ବିଦ୍ୟାଳୟରେ ପଢ଼ାଇବେ ତେବେ ପିଲାଙ୍କ ପାଠପଢ଼ା ପ୍ରଭାବିତ ହେବ ଏବଂ ଅଭିଭାବକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇବ । ତେଣୁ ରାଜ୍ୟ ସରକାର ଏଭଳି ନିଷ୍ପତ୍ତିରୁ ଓହରିବା ସହ ପ୍ରାଥମିକ ଶିକ୍ଷକ ଶିକ୍ଷୟିତ୍ରୀଙ୍କ ଦାବିଗୁଡ଼ିକ ପୂରଣ ଦିଗରେ ପଦକ୍ଷେପ ନିଅନ୍ତୁ । କିମ୍ବା ଅନ୍ୟ କୌଣସି ଉପାୟ ଅବଲମ୍ବନ କରନ୍ତୁ ।

Powered by Froala Editor